Bændablaðið - 07.10.2021, Blaðsíða 14

Bændablaðið | Fimmtudagur 7. október 202114
FRÉTTIR
Ertu með ökuréttindi?
– ef svo er áttu að vita, að lögum samkvæmt eiga full
ökuljós alltaf að vera kveikt í akstri, líka afturljós
• Veistu að ef lögboðin ökuljós eru ekki kveikt er lögreglu heimilt að
sekta þig um 20.000 krónur fyrir hvert ljós sem slökkt er á.
• Veistu að ljósin eru ekki skraut, heldur öryggisbúnaður til að láta
aðra vegfarendur vita af þér í umferðinni.
• Veistu að þegar skyggja tekur, svo ekki sé talað um versnandi skyggni
vegna rigningar eða snjókomu, skiptir gríðarlegu máli að afturljósin
séu kveikt til að koma í veg fyrir alvarleg slys.
• Veistu að ef þú ert ekki með afturljósin kveikt stóreykst hættan á að
það verði keyrt aftan á þig.
• Veistu að stefnuljós eru heldur ekki til skrauts. Þau eru öryggistæki
til að láta aðra ökumenn vita tímanlega hvert þú ætlar að beygja.
• Mundu að þú ert ekki eini ökumaðurinn í umferðinni og samferðafólk
þitt þarf að geta treyst á þína hegðun.
• Megi gæfan vera með ykkur í umferðinni,
Margar nýjar bifreiðar eru búnar ljósum sem kvikna þegar bíllinn er
ræstur og í fyrstu má halda að um sé að ræða ökuljós en sú er ekki
raunin. Víða má sjá í umferðinni ökumenn nýrra bíla sem gera sér
ekki grein fyrir þessu og aka um með takmörkuð ljós og eru jafnvel
ljóslausir að aftan.
Bændablaðið / HKr.
Góður gangur hefur verið í
byggingu Þjóðgarðsmiðstöðvar
á Hellissandi frá því að fram­
kvæmdir hófust þar í fyrrasumar.
Byggingin er nú fokheld og inni­
vinna hafin. Umhverfisráðuneytið
og Umhverfisstofnun standa að
byggingu þjónustumiðstöðvarinnar
sem rís í Þjóðgarði Snæfellsjökuls
á Hellissandi.
Byggingin mun hýsa þjón ustu­
miðstöð þjóðgarðsins með sýningar­
og kennsluaðstöðu, auk rýma fyrir
starfsmenn þjóðgarðsins, svo sem
skrifstofur, geymslur og aðstöðu
fyrir þjóðgarðsverði, alls um 710 m2.
Byggingin samanstendur af
tveimur meginbyggingum sem
tengjast saman með miðrými. Önnur
byggingin hýsir umsýslu fyrir dag­
legan rekstur þjóðgarðsins en hin
starfsemi sem snýr að kennslu,
fræðslu og upplýsingastarfi á hans
vegum.
Verktakafyrirtækið Húsheild
bauð lægst í byggingu Þjóðgarðs­
miðstöðvarinnar í útboði sumar­
ið 2020. Tilboð þess var um 420
milljónir króna, en kostnaðaráætlun
Framkvæmdasýslu ríkisins hljóðaði
upp á 475 milljónir króna. Greint
er frá gangi mála við bygginguna
á vefsíðu Framkvæmdasýslunnar.
Flókið verkefni
Þar kemur einnig fram í máli Ólafs
Ragnarssonar, annars eigenda
Húsheildar, að framkvæmdir séu
jafnvel aðeins á undan áætlun. Hann
segir bygginguna einstaklega fallega
og þrátt fyrir að vel gangi þá sé verk­
efnið flókið. Byggingin sé í laginu
eins og skip sem kalli á flókið stál­
burðarvirki sem kostuðu heilabrot í
hönnun, smíði og uppsetningu.
Starfsemi Þjóðgarðsmiðstöðvar­
innar getur hafist í hinu nýja húsnæði
næsta sumar, en gert er ráð fyrir að
verktaki skili húsinu í júní árið 2022.
/MÞÞ
Hellissandur:
Bygging þjóðgarðs-
miðstöðvar á áætlun
Alls voru í ár veitt fimm
umhverfis verðlaun í Sveitar­
félaginu Skaga firði í fjór um
flokkum, en þau voru afhent
nýverið.
Þetta er í 17. sinn sem verð­
launin er afhent en Soroptim­
istaklúbbur Skagafjarðar stendur
fyrir þeim auk Umhverfis­ og
samgöngunefndar Sveitarfélagsins
Skagafjarðar.
Fram kom við athöfn sem efnt
var til af þessu tilefni að margt gott
hefði verið gert í fegrun umhverf­
is í Skagafirði á liðnum árum og
margt í gangi.
Tvenn verðlaun voru veitt í
flokknum lóð í þéttbýli og þau hlutu
annars vegar Pálmi S. Sighvats og
Birgitta Pálsdóttir fyrir Drekahlíð
7 á Sauðárkróki og Hafsteinn
Harðarson og Amelía Árnadóttir
fyrir Reynimel í Varmahlíð.
Högni Elfar Gylfason og Mon­
ika Björk Hjálmarsdóttir fengu
viðurkenningu í flokki sveitabýla
með hefðbundinn búskap, en þau
búa á Korná í Lýtingsstaðahreppi.
Reynisstaðakirkja hlaut viðurkenn­
ingu sem lóð við opinbera stofn­
un en Sigurlaug Guðmundsdóttir,
formaður sóknarnefndar, veitti
verðlaununum viðtöku.
Verðandi, endurnýtingarmið­
stöð á Hofsósi, hlaut viðurkenn­
ingu fyrir einstakt framtak og tóku
forsvarskonur þess, Þuríður Helga
Jónasdóttir og Solveig Pétursdóttir,
við viðurkenningunni. /MÞÞ
Umhverfisverðlaun í Sveitarfélaginu Skagafirði:
Fimm verðlaun veitt í ár
Umhverfisverðlaun voru veitt í 17. sinn í athöfn sem efnt var til nýverið. Mynd / Vefsíða Sveitarfélagsins Skagafjarðar
Óvenju mikil umsvif hafa verið
við lagningu háspennustrengja
í dreifbýli á vegum RARIK
í sumar. Á Norðurlandi hafa
aldrei áður verið jafn mörg
jarðstrengsverkefni í gangi
samtímis.
Á tímabili voru fjórir plæginga­
flokkar að plægja niður strengi
samtímis á Norðurlandi og þessa
dagana er unnið að jarðstrengslögn
í Svarfaðardal sem reiknað er með
að ljúki um þessar mundir og verð­
ur Svarfaðardalur þá spennusettur.
Í Öxarfirði er einn plæginga­
flokkur að vinna og annar við
Raufarhöfn og ráðgert er að
hefja jarðstrengslögn í Fljótum
nú í vikunni. Þrátt fyrir að jarð­
strengslagnir hafi gengið vel í
sumar og að nú sé farið að hausta
verður vinnunni haldið áfram á
meðan veður leyfir.

Ýmis verkefni fram undan
Fyrir liggur m.a. að því er fram
kemur á vefsíðu RARIK að leggja
jarðstrengi í síðasta bútinn milli
Kópaskers og Raufarhafnar en að
því verki loknu verður Raufarhöfn
komin með tengingu um jarðstreng
alla leið frá aðveitustöðinni við
Kópasker. Þá verður lagður jarð­
strengur í stað loftlínu frá aðveitu­
stöð í Árskógi í Dalvíkurbyggð
og út á Hámundarstaðaháls. Loks
verður lagður jarðstrengur frá
Skeiðsfossvirkjun að Ketilási í
Fljótum. Strengurinn kemur í stað
einnar elstu loftlínu RARIK sem
reist var 1946. Umræddur strengur
verður á næstu árum rekinn á 22
kV spennu, eins og tengingin til
Siglufjarðar er nú.
Þegar þessum verkefnum er
lokið verður búið að plægja og
tengja 50 kílómetra af háspennu­
strengjum á Norðurlandi á árinu og
tengja 25 spennistöðvar og þar með
verða flestar línur sem skemmd­
ust í óveðrinu á Norðurlandi
2019 komnar í jörðu nema línan
til Ólafsfjarðar og út á Skaga og
línan neðst í Fnjóskadal frá Þverá
að Skarði. /MÞÞ
Lagning háspennustrengja:
Flestallar línur að komast í jörð
Plægingaflokkur á vegum RARIK að störfum í Öxarfirði. Myndir / Vefsíða RARIK
Tengivinna við Jökulsá á fjöllum í Öxarfirði.