Gerðir kirkjuþings - 2021, Blaðsíða 58

58 59
Atkvæðagreiðsla skal fara fram á tímabilinu 1. til 20. maí á því ári sem kjósa skal, en
atkvæðagreiðsla skal standa yfir í fimm sólarhringa samfellt.
Kjörstjórn auglýsir á vefsvæði þjóðkirkjunnar og á öðrum fréttamiðlum hvenær kosning
hefst og hvenær henni lýkur. Auglýsing skal birt a.m.k. viku áður en kosning hefst.
Allar upplýsingar um undirbúning og framkvæmd kosninga skulu vera aðgengilegar á
vefsvæði þjóðkirkjunnar, rekstrarskrifstofu þjóðkirkjunnar og hjá próföstum.
Prófastar hvetji fulltrúa til að nýta kosningarrétt sinn.
13. gr.
Afkóðun og talning atkvæða.
Talning atkvæða skal hefjast innan sólarhrings frá lokum kosningar. Áður en talning
hefst skulu atkvæðin afkóðuð.
Aðgengi að dulkóðun kosningakerfisins skal stýrt með tvískiptu leyniorði. Fulltrúi
kjörstjórnar og fulltrúi forsætisnefndar kirkjuþings búa til og varðveita hvor sinn helming
leyniorðsins meðan kosning varir.
Áður en talning atkvæða hefst koma fulltrúarnir hinu tvískipta leyniorði fyrir í
afkóðunarhluta kosningakerfisins.
Að lokinni afkóðun atkvæða í kosningakerfinu skulu atkvæðin talin og niðurstöður
kosningarinnar teknar saman í talningarhluta kerfisins.
14. gr.
Niðurstöður kosninga.
Þeir, sem flestir merkja við með atkvæði sínu, eru kjörnir aðalmenn í hverju kjördæmi
fyrir sig og skal fjöldi atkvæða ráða röðun þeirra. Varamenn eru þeir sem næstir koma að
atkvæðum eftir aðalmönnum og skal fjöldi atkvæða ráða röðun þeirra. Hafi tveir eða fleiri
hlotið jafnmörg atkvæði og geta ekki báðir eða allir náð kjöri ræður hlutkesti.
Kjörstjórn staðfestir niðurstöður og birtir á vefsvæði þjóðkirkjunnar nöfn þeirra er
kjörnir hafa verið svo fljótt sem verða má.
Niðurstöður kosningaþátttöku í hverju kjördæmi skulu enn fremur birtar á vefsvæði
þjóðkirkjunnar.
15. gr.
Útgáfa kjörbréfa.
Kjörstjórn gefur út kjörbréf til aðalmanna og varamanna og skal röð varamanna greind
sérstaklega.
16. gr.
Innköllun varamanna.
Ef kirkjuþingsmaður andast á kjörtímabilinu, forfallast tímabundið eða varanlega, eða
missir kjörgengi sitt til kirkjuþings, tekur varamaður hans sæti í þeirri röð sem hann er
til kjörinn. Hafi kirkjuþingsmaðurinn gegnt embætti forseta kirkjuþings, skal kirkjuþing
kjósa til embættisins að nýju.