Skessuhorn - 29.03.2023, Síða 15

MIÐVIKUDAGUR 29. MARS 2023 15
Fundur með foreldrum barna sem
stunda nám í Laugargerðisskóla í
Eyja­ og Miklaholtshreppi fór fram
síðastliðinn fimmtudag. Þar kynnti
stjórn foreldrafélagsins hugmyndir
sínar sem miða að því að koma í
veg fyrir að skólanum verði lokað.
Skessuhorn greindi frá því í lok síð­
asta mánaðar að 20. febrúar síðast­
liðinn hefði sveitarstjórn tekið
ákvörðun um að loka skólanum
eftir yfirstandandi skólaár, næðust
samningar við annað sveitar félag
um skólaþjónustu. Íbúar í Eyja­
og Miklaholtshreppi voru 1. mars
síðastliðinn 117 og því er sveitar­
félagið eitt af þeim fámennari á
landinu sem enn reka grunnskóla.
Ellefu einkareknir
skólar til
Hugmyndir foreldrafélagsins eru á
þá leið að stofnað verði einkahluta­
félag sem kaupa myndi skólahús­
næðið og reka áfram grunnskóla
í Laugargerði. Einkahlutafélagið
yrði stofnað af foreldrum en jafn­
framt opið öllum þeim sem vilja
taka þátt. Nú eru 18 nemendur í
skólanum en enginn mun útskrifast
næsta vor og þrír nemendur munu
bætast við næsta vetur sem vitað
er um. Samkvæmt þessum hug­
myndum yrði skólinn þá einkarek­
inn en ellefu slíkir grunnskólar eru
á landinu í fjórum sveitarfélögum,
sjö þeirra á höfuðborgarsvæðinu. Í
flestum einkareknum skólum borga
nemendur skólagjöld en ekki er
áætlað að innheimta skólagjöld fyrir
nemendur Laugargerðisskóla.
Nýta svæðið til
uppbyggingar
Fram kom á fundinum að foreldra­
félagið vill sjá börnunum sínum
fyrir menntun á heimaslóðum og
stuðla að frekari uppbyggingu á
svæðinu. Félagið sér fyrir sér mikla
möguleika með því að stofna til
reksturs sem fjárhagslega gæti stutt
við starf grunnskólans. Á svæðinu
er gott íþróttahús, tjaldsvæði og
útivistarsvæði. Skólahúsnæðinu
fylgir 25 hektara land þar sem
m.a. eru skipulagðar ellefu lóðir
og hesthúsahverfi með reiðhöll en
skipulagið er nú í auglýsingaferli
hjá sveitarfélaginu. Bróðurpartur
lóðarinnar er svo óskipulagt svæði
og sér foreldrafélagið þar fyrir sér
möguleika á uppbyggingu.
Ýmsar hugmyndir eru uppi
um hvernig hægt verði að nýta
byggingarnar. Nefnt var far­
fuglaheimili, sumarbúðir og lista­
mannasetur sem dæmi. Gert er ráð
fyrir meiri nýtingu á sundlaug og
íþróttahúsi samhliða tjaldsvæðinu,
m.a. með viðburðahaldi. Foreldra­
félagið vill gera umhverfið heill­
andi fyrir barnafjölskyldur, byggja
upp skólann og skapa fleiri störf.
Fram kom á fundinum að ljóst
sé að ráðast þarf í framkvæmdir á
skólabyggingunni. Áætlun þar að
lútandi er í undirbúningi svo sem
um hvað gera þurfi og í hvaða
tímaröð. Brýnt yrði að hefja
framkvæmdir sem fyrst og stefna
á að nauðsynlegustu verkþáttum
verði lokið á næstu fimm árum.
Hugmyndir foreldrafélagsins eru
á frumstigi en ekki er langt síðan
sveitarstjórn tók þá ákvörðun að
stefna að lokun skólans. Foreldra­
félagið ákvað því að bregðast við.
Til að skólastarf haldi áfram í hús­
næðinu næsta haust þarf ferlið því
að ganga hratt fyrir sig. Sveitar­
stjórn hefur þegar verið kynnt
málið og segja talsmenn foreldra­
félagsins samtalið hafa verið á
jákvæðum nótum. Sveitarstjórn
hefur þó ekki gefið formlega út
hvort húsnæðið sé falt. Ekkert er
því fast í hendi um framtíð skóla­
starfsins, en foreldrafélagið vonast
eftir faglegu samstarfi um þróun
mála í jákvæða átt.
Hreppsnefnd Eyja­ og
Miklaholtshrepps var boðuð til
fundar í gær, þriðjudag, en honum
var ekki lokið þegar Skessuhorn fór
í prentun.
sþ
Pottar
Heitir og kaldir
Lok
og festingar
trefjar.is
Óseyrarbraut 29, Hafnarfirði
Eldstæði
í þremur stærðum
Hafðu samband
sala@trefjar.is
550 0100
Góðar
stundir
Sauna
tilbúin til notkunar
Verð frá
1.167.000 kr.
Verð frá
220.150 kr.
Sindraskel
tilvalin í ferðaþjónustuna Aukahlutir
Tröppur, yfirbreiðslur o.fl.
Foreldrafélag Laugargerðisskóla vill stofna
einkahlutafélag og kaupa skólahúsnæðið
Laugargerðisskóli. Ljósm. sþ. Svipmynd af foreldrafundinum. Ljósm. sþ.