Framkvæmdafréttir Vegagerðarinnar - 31.03.2023, Page 15

14 Framkvæmdafréttir nr. 724
2. tbl. 31. árg.
Framkvæmdafréttir nr. 724
2. tbl. 31. árg.
15
Nýja tengingin stóðst prófraunina
Þegar kom að því að velja BS verkefni lá beinast við
að nýta tengslin við Vegagerðina. „Það var í gangi
rannsóknaverkefni sem meistaranemi var að vinna að
undir leiðsögn Ólafs Sveins og Bjarna Bessasonar. Ég
fékk að stíga inn í það og vinna BS verkefni mitt út frá
því.“
Verkefnið snerist um að þróa nýja tengingu milli
staðsteypts sökkuls og forsteypts stöpulveggjar. „Það
er til mikils að vinna að geta stytt byggingartíma brúa
og ein leið til þess er að nota forsteyptar einingar í stað
þess að steypa á staðnum. Með því er hægt að stytta
tímann á verkstað og menn eru ekki eins bundnir af
veðri og vindum,“ útskýrir Rúnar Steinn.
Hann bendir hins vegar á að það geti verið erfitt
að nota forsteyptar einingar á jarðskjálftasvæðum
eins og víða eru á Íslandi. „Aðal rannsóknarspurningin
í verkefninu var sú hvort nýja tengingin gæti yfirfært
álag frá vegg yfir í sökkul án þess að hún gæfi sig, og
hvort þessi lausn væri jafn góð og staðsteypt útgáfa.“
Þegar Rúnar Steinn kom inn í verkefnið var þegar búið
hanna tenginguna og steypa prófstykkin sem voru tvö,
annars vegar hefðbundin staðsteypt útfærsla og hins
vegar útfærsla með nýrri tengingu.
En hvernig er þessi tenging? „Við þróun
tengingarinnar var horft til tiltölulega nýrrar brúar
yfir Jökulsá á Dal þar sem var notaður forsteyptur
stöpulveggur með útistandandi U-járn sem stungust
niður í sökkul sem var staðsteyptur. Slík útistandandi
járn eru mjög viðkvæm og geta skemmst í flutningum.
Þess vegna var ákveðið að skoða hvort hægt væri
að hanna annars konar tengingu sem ekki væri
jafn viðkvæm fyrir hnjaski. Í okkar rannsókn var
stöpulveggurinn forsteyptur án útistandandi járna
en í staðinn stingst hann niður í sökkulmót og er
steyptur fastur samhliða því sem sökkull er steyptur á
staðnum.“
Næsta skref var að gera prófanir sem var gert á
tilraunastofu Umhverfis- og byggingarverkfræðideildar
Háskóla Íslands. „Þar er spennigólf sem er hentugt
fyrir próf eins og þessi. Síðan var komið fyrir 100 kN
vökvatjakki til að setja spennu á prófstykkin til að
kanna hversu vel þær stæðu af sér slíkt álag.“
Og hver var niðurstaðan? „Hún var sú að nýja
tengingin hélt styrk yfir 80% fram í síðustu lotu.
Hún stóðst því mjög vel og alveg sambærilega og
staðsteypta viðmiðunarútgáfan. Þetta er því tenging
sem virkar,“ svarar Rúnar Steinn.
→
Rúnar Steinn segir eitt það skemmtilegasta við starfið að fá
að fara í eftirlitsferðir á verkstað. Hér er hann á nýju brúnni yfir
Þorskafjörð.
↘
Rúnar Steinn var tilnefndur til nemendaverðlauna á
Steinsteypudeginum. Hér er hann með Børge Johannesi Wigum,
formanni Steinsteypufélags Íslands.
Svaka skemmtilegur
steinsteypudagur
Rúnar Steinn fékk boð um að kynna verkefni sitt á
Steinsteypudeginum 10. febrúar. „Ég ákvað að slá
til þó ég hafi verið dálítið kvíðinn fyrir að flytja erindi
fyrir hundrað manns. Ég komst hins vegar að því að
lykillinn að því að kynna fyrir framan stóran hóp af
fólki er að vera vel æfður. Þetta reyndist svo vera alveg
svakalega skemmtilegur dagur. Fyrirlesturinn gekk vel
og svo var ég tilnefndur til nemendaviðurkenningar
sem ég hlaut,“ segir hann glaður.
Rúnar Steinn hefur unnið á framkvæmdadeild
Vegagerðarinnar meðfram náminu frá síðasta sumri.
„Ég stekk í þau verkefni sem falla til og reyni að
aðstoða umsjónarmenn og verkefnastjóra. Verkefnin
sem ég starfa við eru fjölbreytt og ég er spenntur fyrir
framtíðarverkefnum tengd samgöngusáttmálanum,“
segir hann og brosir.