Fréttir - Eyjafréttir - 20.07.2023, Page 14
14 | | 20. júlí 2023
„Innan fjölskyldunnar ræddum
við það á Covid árunum að gaman
væri að minnast þess að pabbi
hefði orðið 100 ára á síðasta ári.
Ekkert varð af því frekar en á 50
ára afmæli Magnúsarbakarís á
sjálfan gosdaginn 23. janúar 1973.
Það var svo skrýtið sagði pabbi,
þau höfðu ekkert gert af því sem
þau ætluðu sér afmælisdaginn
fyrir 50 árum. Það var svo ólíkt
okkur að framkvæma ekki það
sem við plönuðum, sagði hann
- eins og það hafi verið skrifað í
skýin að það ætti ekki að verða af
veislunni. Gosið hófst og engin
veisla,“ sagði Óskar Sigmundsson
einn afkomenda Magnúsar Bergs-
sonar, bakara og útgerðarmanns
og Halldóru Valdimarsdóttur.
Hugmyndin um að tengja 100
ár frá stofnun Magnúsarbakarís
við 50 ára goslokaafmæli fékk
hljómgrunn. „Það var eins og það
kæmi allt upp í fangið á okkur
– allir tilbúnir og allt gekk eins
og í sögu. Fjölskyldan afhjúpaði
minnisvarða uppi á hrauni beint
fyrir ofan þann stað þar sem
húsið Tunga, Hótel Berg stóð við
Heimagötu 4. Við erum virkilega
stolt af því og viljum þakka öllum
sem að hjálpuðu til við að gera
þetta að veruleika. Mér leið a.m.k.
allan tímann þannig að það hafi
líka verið einhver sem skrifaði
handritið af þessu og að akkúrat
svona ætti þetta að vera,“ bætti
Óskar við.
Það var eftir hádegi föstudaginn
7. júlí sem minnisvarðinn var
afhjúpaður og seinna um daginn
var komið saman í Safnahúsi.
Við afhjúpunina bauð Óskar gesti
velkomna, þakkaði bæjaryfir-
völdum þeirra velvilja og frænda
sínum Gunnari Júlíussyni fyrir
hönnun og uppsetningu minn-
isvarðans sem hann á allan heiður
að. Andrés, bróðir hans stýrði
síðan athöfn þar sem Íris Róberts-
dóttir bæjarstjóri þakkaði fyrir
þetta frumkvæði fjölskyldunnar.
Yngstu börnin af hverjum legg
afkomenda Magnúsar Bergsson-
ar og Halldóru Valdimarsdóttur
afhjúpuðu síðan minnisvarðann
og síðan voru sungin tvö Eyjalög
Gamla gatan mín og Heima undir
stjórn Halldórs S. Magnússonar
og Oddnýjar Huginsdóttur. Séra
Guðmundur fór síðan með bæn og
lokaði athöfninni.
Í Sagnheimum fór Halldór S.
Magnússon fyrir yfir sögu hússins
fram til ársins 1957 þar til hjónin
Sigmundur Andrésson og Dóra
Hanna Magnúsdóttir, Bíbí, tóku
við rekstri Magnúsarbakarís á
Heimagötu 4 og ráku til ársins
1989, síðast að Vestmannabraut
37. Óskar fór yfir söguna frá
1957 til ársins 1989 og þar til
rekstri var hætt árið 2003 eftir
80 ára samfelldan rekstur. Eftir
þá yfirferð var kaffi, konfekt og
spjall þar sem farið var yfir liðna
tíma og fólk hitti samferðafólk
sem það hafði ekki hitt lengi. Það
vissu ekki allir að systurnar Bíbí
og Dídi, Þóra Magnúsdóttir, hefðu
átt yngri bróðir en hann fæddist á
því örlagaríka ári 1942, árið sem
móðir þeirra lést og Halldóri var
komið til ættingja í Reykjavík þar
sem hann ólst upp. Dóra Hanna,
aðeins 16 ára gömul, tók að sér
heimilið og að hugsa um yngri
systkini sín.
„Um kvöldið var veisla sem
Bergur M. Sigmundsson stýrði.
Þar var slegið á léttari strengi
og sýndi Sigurjón Andrésson
myndupptökur af afa sínum sem
hafði tekið af honum loforð um
að ekki mætti sýna fyrr en hann
væri orðinn 100 ára eða látinn.
Sigmundur Andrésson var því í
stóru hlutverki á skjánum og vakti
mikla gleði með frásögnum sínum
af liðnum tíma. Hluti sem hann
var ekki endilega að tala um á
sínum tíma og langflestir gestanna
því að heyra í fyrsta skipti,“ sagði
Óskar eftir vel heppnaðan og
eftirminnilegan dag. Vill hann
þakka Kára Bjarnasyni og hans
fólki í Safnahúsi fyrir aðstoð og
hjálpsemi.
Afmælisveisla hálfri öld síðar
- Bekkurinn er á fallegum stað í vinsællri gönguleið. - Fullt var út úr dyrum á dagskránni um Magnúsarbakaríið.
- Bræðurnir Bergur, Andrés og Óskar Sigmundssynir