Framkvæmdafréttir Vegagerðarinnar - 23.10.2023, Síða 8

8 Framkvæmdafréttir nr. 727
5. tbl. 31. árg.
Nýir rafgeymar í
Málmeyjarvita
Vegagerðin fékk aðstoð frá Landhelgisgæslunni í
sumar við að hífa tíu rafgeyma, samtals 270 kíló,
í Málmey á Skagafirði.
Árlega fara rafvirkjar Vegagerðarinnar í sjóferð,
hringinn í kringum landið, með varðskipi
Landhelgisgæslunnar og huga að viðhaldi og eftirliti á
þeim vitum, sjómerkjum og ljósduflum sem aðeins má
komast að sjóleiðina.
„Við fórum í þessa ferð í maí á þessu ári. Þegar
við komum í Málmeyjarvita uppgötvaðist að allir
rafgeymarnir í vitanum voru ónýtir. Á þeim tímapunkti
vorum við búnir að nota alla rafgeyma sem við höfðum
lagt af stað með og því vandi á höndum,“ segir
Guðmundur Jón Björgvinsson rafvirki sem farið hefur
ófáar vitaeftirlitsferðir síðustu árin.
„Þegar heim var komið fórum við í það að reyna að
útvega fleiri rafgeyma sem gekk framar vonum. Síðan
höfðum við samband við Landhelgisgæsluna til að
fá aðstoð við að koma þeim út í eyjuna og ná í gömlu
rafgeymana,“ lýsir Guðmundur en rafgeymarnir voru
tíu, samtals 270 kíló að þyngd.
Varðskipið Freyja var fengið til verksins ásamt þyrlunni
TF-EIR.
↑
Málmeyjarviti.