Lögmannablaðið - 2024, Blaðsíða 25

LÖGMANNABLAÐIÐ TBL 02/24 25
Baldur Guðlaugsson, sem hafði tekið við vinnu minni þegar
ég fór í Hæstarétt, varð ráðuneytisstjóri á þessum tíma svo
það vantaði lögmann í þessi sömu störf og ég hafði verið að
vinna að áður en ég fór. Ég ákvað að stökkva til en þetta var
mjög skemmtileg vinna, þó svo virkjunin væri umdeild, og
tók mörg ár. Fyrstu þrjú árin fóru í að gera samninga vegna
rafmagnssölu til álversins, endanlega við Alcoa. Svo tóku við
verksamningar, einkum við ítalska fyrirtækið Impregilo sem tók
að sér hættusömustu verkin, byggingu stíflunnar í Jökulsá á Brú
og hin löngu jarðgöng frá lóninu þar yfir í Lagarfljót. Þetta voru
erfiðir verksamningar sem ég fékk að sinna með verkfræðingnum
Jóhanni heitnum Kröyer, móðurfrænda mínum frá Hrísey.
Dómarastörfin áhugaverð
Hvað kom til að þú yfirgafst lögmannsstarfið fyrir dómarasæti?
Við Benedikt Blöndal skólabróðir minn fengum báðir þá bakteríu
á 9. áratugnum að stefna á að verða dómarar í Hæstarétti.
Benedikt fékk skipun á undan mér en á sama tíma vantaði
dómara vegna veikinda og ég var settur dómari frá 20. febrúar
til 30. júní 1988. Þegar áfram vantaði dómara tímabundið
sagðist ég ekki geta verið lengur frá lögfræðistofunni og þá
var Haraldur Henrýsson settur tímabundið. Hann hafði áður
verið í sakadómi og stuttu síðar, þegar staða losnaði, var hann
svo skipaður. Þegar Magnús Thoroddsen sagði af sér þá var ég
skipaður dómari í hans stað. Það var sárt að þurfa að taka við af
honum, en Gaukur Jörundsson skólabróðir okkar beggja sagði
að ég yrði bara að bíta á jaxlinn.
Svo þarf ég að nefna að Arnljótur B jörnsson prófessor, enn einn
skólabróðir okkar, var heimavanur í Hæstarétti sem varadómari
og var að lokum skipaður í réttinn skömmu á eftir mér. Þá vorum
við orðnir fimm stúdentar frá MR 1954, sem urðu dómarar við
Hæstarétt og hlýtur það að vera met. En við sátum þar ekki
allir á sama tíma og kannski taldist það til þjóðarheilla, þó að
við hefðum verið ágætir saman – ekki alltaf sammála, en með
virðingu hver fyrir öðrum.
Hvernig fannst þér að vera dómari í samanburði við lögmannsstörfin?
Mér fundust dómarastörfin áhugaverð og ábyrgðarmikil og ég
held að reynsla mín af lögmennskunni hafi haft jákvæð áhrif
á störf mín. Þannig var mér auðvelt að líta á málsaðila sem
skjólstæðinga, er sinna þyrfti af samviskusemi og virðingu.
Meðal starfa hæstaréttardómara var að vera við innsetningar forseta
Íslands. Hjörtur og Nanna Þorláksdóttir prúðbúin við síðustu innsetningu
Vigdísar Finnbogadóttur 1992.