Háðfuglinn - 01.07.1949, Síða 4

KOLBEINN KALDALJÓS:
VORÞANKAR
1949
Nú klæðir sig Fjallkonan fagnaðarheit
úr fatnaði vetrarins snjóa,
og kýrnar hans Jörundar komnar á beit
í Kaldaðarnesi í Flóa,
því vorið er komið með sólfar í sveit
og Silfurtún byrjað að gróa.
Vart ertu samt Fjallkona ámælisverð
sé angur í látbragði þínu.
Því riðið er þökum og reidd eru sverð
og Rússarnir dorga á línu.
En Emil og Bjarni í utanlandsferð
með Eystein — í farinu sínu.
Og fjölskylda Trumans er gjafmild og góð
við gestkomur langferðamanna,
sem auðmjúkir leita á erlenda slóð
frá ásóknum hafíss og fanna.
Að eymdin sé mergrunnin íslenzkri þjóð,
var Eysteins hlutverk að sanna.
En örlaganornin er grimmlynd og grá
og greiðir með ómjiikum höggum.
Með ölmusu komu þeir kóngsgarði frá
og klyfjaðir hildarböggum,
því Marchall er brjóstgóður maður — og sá
að mennirnir voru í kröggum.
Á kauphöllum westra er krónan vor smáð
og kreppan er auglýst í blöðum.
En feitlagnir kratar — sem fyrrum var spáð
sjást fremstir í þeirra röðum,
er komast í nefndir og klíkur og ráð
og kaffi á Bessastöðum.
Og vorið fer örmum um engi og hlíð
nú útspringa túnin og Flóinn.
Um hafflötin bærir sig hafræna þýð
svo Hæringur kemst ekki á sjóinn.
En vorið er kærkomið landi og lýð
og leysir af Esjunni snjóinn.
4
HÁÐFUGLINN