Félagsbréf - 01.07.1957, Page 72

70
FELAGSBREF
að hinu auvirðilega saman við hið háleita, talað um forina og
stjörnurnar í sömu andrá, án þess þar heyrðist falskur tónn.
Hann átti sinn þátt í að frelsa enska ljóðlist undan oki Viktoríu-
tímans með allar hans rammfölsku tilfinningar og innantómt
orðagjálfur.
En eftir að Yeats komst í kynni við Ezra Pound var sem
hann kæmi algerlega niður á jörðina og gæti horfzt í augu við
veruleikann umhverfis sig. Með ljóðabókinni „Responsibilities“
(1914) hófst nýtt skeið í skáldskap hans. Hann reyndi að losna
við mælgina og útflúrið, lagði áherzlu á einfaldara og hvers-
dagslegra orðfæri og dýpri tilfinningu. „Tilfinningasemi er það
að blekkja sjálfan sig, mælgi það að blekkja aðra“, sagði hann.
Hann hafði um þetta leyti orðið fyrir ýmsum skakkaföllum
í lífinu og leit yfir farinn veg með sviða í hjarta. Vinur hans
og samherji Synge var horfinn, ástarævintýri hans við hina
glæsilegu Maud Gonne hafði runnið út í sandinn. Hann fann ald-
urinn færast yfir sig, og upp frá þessu verður tíminn hinn
mikli óvinur, sem hann glímir við í ljóðum sínum: tíminn og
vaxandi aldur.
f ljóðasafninu ,,The Tower“, sem kom út árið 1928, þegar
Yeats var 63 ára gamall, var hann á hátindi sköpunarmáttar
síns. Þar er að finna nokkur af beztu Ijóðum hans, t. d. „Sailing
to Byzantium“ og „Among Schoolchildren“, þar sem hann fjallar
um lífið og listina á meistaralegan hátt. Á þessu skeiði er and-
inn honum mikilvægari en holdið, en hann reynir að sætta þess-
ar andstæður, sameina þær. Það verður aðeins gert í listaverk-
um. Eining allra hluta er eitt af meginhugtökunum í öllum skáld-
skap Yeats. Á efri árum fékk hann sérstakan áhuga á gangi
sögunnar og skrifaði heila bók um skilning sinn á hringrás sög-
unnar, hjóli tímans, sem hefur komið mörgum undarlega fyrir
sjónir.
Á síðasta skeiði ævi sinnar hvarf Yeats meira og meira frá
dulhyggju yngiú ára og varð æ „holdlegri". Hann var orðinn
bitur og vonsvikinn, en hann örvænti aldrei. Á þessu skeiði
lofsöng hann líkamann og ástríður hans, oft í allgáskafengnum
og bersöglum kvæðum. Honum svipar um sumt til D. H. Law-