Ljóðormur - 01.03.1987, Síða 22

JOHANN WOLFGANG VON GOETHE:
Mignon
(Úr ballöðum)
Veiztu hvar liggur land með pálma auð,
í laufi dökku glóa aldin rauð.
Af himinvegum líður ljúfur blær,
hjá lárvið háum netta myrtan grær.
Segðu mér hvar,
þann veg, þann veg,
við skulum ganga ástvin, þú og ég.
Veiztu hvar stendur stolt á súlum höll?
Þar stafar ljóma um salarkynni öll.
Og höggsteinslíkön horfa í spurn á mig:
Hvað hefir veröld, barn mitt, gjört við þig?
Segðu mér hvar,
þann veg, þann veg,
verndari minn nú leiðumst, þú og ég.
Veiztu hvar gnæfir skýjum faldað fjall?
Þar fetar ess í þoku tæpan stall.
Og hamraskútar hýsa drekakyn,
þar hrynja björg,
þau svelgir flóðsins gin.
Segðu mér hvar,
þann veg, þann veg,
við munum leiðast, faðir, þú og ég.
Sigurkarl Stefánsson þýddi.
20
LJOÐORMUR