Frjáls verslun - 01.02.1987, Side 60

Bréf frá útqefanda
auglýsingamarkaðurinn
Ekki fer fram hjá neinum að bylting hefur orðið í fjölmiðlun hér
á landi eftir að rekstur útvarps og sjónvarps var gefinn frjáls. Með
fjölgun sjónvarps-og útvarpsstöðva hefur komið fram áður óþekkt
samkeppni í fréttaflutningi sem leitt hefur til þess að frétta-
mennskan hefur harðnað. Fréttamenn sem áður voru oft eins og
feimnir skólastrákar þegar þeir spurðu ráðamenn um hvað „héngi
á spýtunni" eins og það var tíðum orðað eru nú eins og grimmir
úlfar sem reka hljóðnemana í andlit viðmælenda og krefjast
skýrra svara. Framboð sjónvarps-og útvarpsefnis til afþreyingar
og fróðleiks hefur einnig stóraukist. Engum manni er mögulegt að
taka á móti öllu þessu efni hversu gott sem það er. Og þegar ekki
verður vikist undan því að velja komast menn ef til vill að þeirri
niðurstöðu að best er að verja kvöldinu við lestur góðra bóka.
Utvarpsfrelsið hefur ekki aðeins blásið keppnisanda í brjóst
fréttamanna og aukið framboð afþreyingar fyrir landsmenn. Eftir
að fjölmiðlum á öldum ljósvakans fjölgaði hafa auglýsendur
einnig þurft að standa frammi fyrir nýju vali. Hér áður fyrr þegar
einokun var á sjónvarpsrekstri töldu margir auglýsendur að þeir
næðu til þorra landsmanna með því að auglýsa eingöngu í ríkis-
sjónvarpinu. Sjónvarpið var því notað á annan hátt sem auglýs-
ingamiðill en gerist í mörgum öðrum löndum. Annars staðar er al-
gengt að nota sjónvarpið með öðrum auglýsingamiðlum til dæmis
til að fylgja auglýsingaherferð í tímaritum og blöðum eftir. Með til-
komu nýrrar sjónvarpsrásar dreifist áhorfendahópurinn og ein
birting á auglýsingu nær sjónum færri manna en áður. Þessi stað-
reynd kallar á það að fyrirtæki endurskipuleggi stefnu sína í
auglýsingamálum til að finna bestu og hagkvæmustu leiðina að
hjarta og hug neytandans.
Tímaritin hafa um langt skeið átt fastan og tryggan sess á
auglýsingamarkaðnum vegna sérstöðu sinnar. í fyrsta lagi hafa
tímaritin langan líftíma og hvert eintak ber fyrir augu margra. í
öðru lagi fjalla flest tímarit um eitthvert sérsvið lesenda hvort sem
um er að ræða áhugamál eða atvinnu. Slík tímarit verða til þess að
auglýsingar í þeim hitta beint í mark þar sem fyrirfram er vitað
um áhugamál og þarfir lesendanna. Með þeim breytingum sem eru
að verða á auglýsingamarkaðnum og þeirri ríku þörf auglýsenda
að finna sinn markhóp til að tryggja sem besta nýtingu á auglýs-
ingafé sínu hefur mikilvægi tímarita vaxið enn meira.
Frjálst framtak er útgáfufyrirtæki sem hefur sérhæft sig í útgáfu
tímarita og bóka. Fyrirtækið gefur út 11 tímarit og eitt vikublað.
Markmið þessarar útgáfu er að svara þörf lesenda fyrir gott og
vandað lesefni. Slíkt markmið næst aldrei endanlega og alltaf má
gera betur. Það er þó ljóst að þessi mikla útgáfa er vænlegur kost-
ur fyrir auglýsendur og tímarit Frjáls framtaks sem og önnur
tímarit eiga eftir að vaxa sem auglýsingamiðill.
60