Fréttablaðið - 24.03.2003, Blaðsíða 2

2 24. mars 2003 MÁNUDAGUR
„Nei! Tveggja stiga forysta er
lítið sem ekkert. Úrslitin í enska
boltanum ráðast ekki fyrr en um
páska, talaðu við mig þá.“
Bjarni Felixson er einn dyggasti stuðningsmaður
Arsenal hér á landi. Arsenal er í efsta sæti ensku
úrvalsdeildarinnar þegar örfáar umferðir eru eftir.
Spurningdagsins
Bjarni, er Arsenal búið að tryggja sér
enska meistaratitilinn?
STJÓRNMÁL Stjórn Félags fram-
sóknarmanna í Vestmannaeyjum
vill starfa áfram með Sjálfstæð-
isflokknum í meirihluta bæjar-
ráðs. Eini fulltrúi Framsóknar-
flokksins í bæjarstjórninni,
Andrés Sigmundsson, tekur hins
vegar ekki í mál að starfa áfram
með sjálfstæðismönnum.
Stjórn framsóknarfélagsins
ræddi málið á fundi síðdegis í
gær. Víkingur Smárason, for-
maður félagsins, sagði þá að
ágreiningurinn við sjálfstæðis-
menn væri ekki óleysanlegur. En
ef ekki yrði af áframhaldandi
samstarfi við þá væri athugandi
að taka upp samstarf við Vest-
mannaeyjalistann eins og Andr-
és vilji gera. „Ef við náum ekki
sáttum í eigin röðum og Andrés
fær ekki umboð frá okkur á
hann þann möguleika að kljúfa
sig úr flokknum og fara einn í
samstarf við Vestmannaeyjalist-
ann,“ sagði Víkingur.
Víkingur sagði að á fulltrúa-
ráðsfundi framsóknarmanna
sem halda átti í gærkvöld yrði
reynt til þrautar að ná sáttum
við Andrés. ■
VESTMANNAEYJAR
Víkingur Smárason, formaður Félags fram-
sóknarmanna í Vestmannaeyjum, sagði
ágreining bæjarfulltrúa flokksins við sjálf-
stæðismenn ekki vera óleysanlegan.
Greiða ætti úr málinu og halda meirihluta-
samstarfinu áfram.
Andrés Sigmundsson vill Vestmannaeyjalistann:
Gæti klofið sig úr
Framsóknarflokknum
HALLDÓR ÁSGRÍMSSON
Ungliðar Framsóknar hafa andmælt stefnu
ríkisstjórnarinnar. Nokkurrar óánægju
gætir innan þingflokksins.
Þingmenn ekki á eitt
sáttir um innrás:
Nokkur and-
staða innan
Framsóknar
STJÓRNMÁL Ljóst er að nokkurrar
andstöðu gætir í þingflokki
Framsóknarflokksins við innrás
Bandaríkjamanna og Breta í
Írak. Þingmenn sem blaðið náði
tali af í gær eru ekki allir hrifnir
af skilaboðum stjórnvalda til
Bandaríkjastjórnar og hvernig
þau hafa verið túlkuð sem stuðn-
ingur við innrás.
Mjög erfiðlega gekk að fá
þingmenn til að tjá sig um málið.
Sumir neituðu alfarið að ræða
það eða viku sér undan því að
svara hvort þeir styddu stuðn-
ingsyfirlýsingu við innrás eða
ekki. „Ég er mjög lítið hrifin af
þessu,“ sagði þó einn þingmaður,
sem ekki vildi láta nafns síns get-
ið. Annar þingmaður sagði að
þetta væri ákvörðun sem ríkis-
stjórnin hefði tekið, ekki þing-
flokkurinn. Ekki var annað á hon-
um að skilja en hann teldi sig
ekki bera ábyrgð á þeirri ákvörð-
un.
Hvorki var borið undir þing-
flokk Framsóknarflokks né Sjálf-
stæðisflokks hvort lýsa ætti
stuðningi við innrás Breta og
Bandaríkjamanna áður en ríkis-
stjórnin ákvað að heimila aðgang
að lofthelgi og stuðning við að-
gerðir. ■
UTANRÍKISMÁL Áður en Bandaríkja-
menn og Bretar og bandalag hinna
viljugu ákváðu að ráðast inn í Írak
á mánudaginn hafði Halldór Ás-
grímsson utanríkisráðherra, í við-
tölum við fjölmiðla og á Alþingi,
sagt að ekki kæmi til greina að
styðja innrás án samþykkis Örygg-
isráðs Sameinuðu þjóðanna.
Ekkert varð af því að öryggis-
ráðið greiddi atkvæði um ályktun-
artillögu Bandaríkjamanna, Breta
og Spánverja um heimild til inn-
rásar. Ályktunin var dregin út af
borðinu skömmu áður en öryggis-
ráðið átti að fjalla um hana, eftir
að endanlega varð ljóst að ályktun-
in yrði ekki samþykkt.
Stjórnarandstaðan hefur bent á
að miðað við fyrri yfirlýsingar ut-
anríkisráðherra hefði mátt ætla að
hann styddi ekki innrásina sem
hófst á fimmtudaginn. Á blaða-
mannafundi bandaríska utanríkis-
ráðuneytisins á þriðjudaginn var
það hins gert opinbert að Ísland
væri á lista yfir þau ríki sem
styddu innrásina. Stjórnarand-
staðan hefur túlkað þennan stuðn-
ing sem skýra stefnubreytingu ut-
anríkisráðherra. Halldór þvertek-
ur fyrir það og segir að afstaða
sín hafi alltaf verið klár. Ríkis-
stjórnin hafi aldrei útilokað að
hægt væri að fara í stríð á grund-
velli ályktunar 1441.
„Þegar það kemur upp að ör-
yggisráðið nær ekki niðurstöðu þá
var málið gjörsamlega komið í
þrot,“ segir Halldór. „Mín afstaða
hefur verið sú allan tímann að ég
útilokaði ekki aðgerðir á grund-
velli ályktunar 1441. Enda hefur
mitt orðalag verið með þeim
hætti.“
Þó ríkisstjórnin styðji innrás-
ina hefur Halldór sagt að það hafi
verið afar óheppilegt að sá stuðn-
ingur skyldi fyrst hafa verið gerð-
ur opinber þegar Bandaríkja-
stjórn birti lista hinna viljugu. Þá
hefur hann einnig sagt að Banda-
ríkjamenn oftúlki þennan lista því
lönd komi inn á hann við mismun-
andi aðstæður.
trausti@frettabladid.is
HALLDÓR ÁSGRÍMSSON UTANRÍKISRÁÐHERRA
„Mín afstaða hefur verið sú allan tímann að ég útilokaði ekki aðgerðir á grundvelli álykt-
unar 1441. Enda hefur mitt orðalag verið með þeim hætti,“ segir Halldór.
Stefnubreyting
utanríkisráðherra?
Utanríkisráðherra hefur verið harðlega gagnrýndur fyrir stefnubreyt-
ingu í Íraksmálinu. Hann segist aldrei hafa útilokað aðgerðir.
Stöð 2, 23. janúar:
● Það liggja ekki á þessu stigi fyrir nægi-
legar sannanir til þess að fara í árás á Írak
á grundvelli þeirra upplýsinga sem núna
liggja fyrir. Þess vegna er ég þeirrar skoð-
unar að Öryggisráðið þurfi að fjalla um
málið á nýjan leik. Það er mín afstaða.
Stöð 2, 23. janúar:
● Ég tel að það sé alveg ljóst í mínum
huga að það má ekki framkvæma eitthvað
á grundvelli þess sem eitt ríki ákveður.
Þetta þarf að vera alþjóðleg aðgerð á
grundvelli þess sem Sameinuðu þjóðirnar
segja. Það er mín afstaða.
Alþingi, 27. janúar:
● Það er alveg ljóst af okkar hálfu að við
teljum algjörlega nauðsynlegt að þetta
mál komi til umfjöllunar Öryggisráðsins á
nýjan leik, það höfum við margsagt.
Ríkisútvarpið, 17. mars:
● Það hefur verið afstaða íslensku ríkis-
stjórnarinnar að það væri mjög mikilvægt
að Öryggisráð samþykkti nýja ályktun.
Fréttablaðið, 21. mars:
● Við teljum mikilvægt að afvopna
Saddam Hussein og þar sem ekki náðist
samstaða í öryggisráði Sameinuðu þjóð-
anna teljum við rétt að gera það á grund-
velli ályktunar 1441.
KVIKMYNDIR Fyrsta kvikmynd
Dags Kára Péturssonar, „Nói Al-
binói“, vann aðalverðlaunin á
kvikmyndahátíðinni í Rúðuborg í
Frakklandi á laugardag. Þar kepp-
ti hún á móti níu myndum, þar á
meðal sænsku myndinni „Lilja 4
Ever“ eftir Lukas Moodysson,
sem nú er sýnd í Reykjavík, og
dönsku myndina „Open Hearts“
eftir Susanne Bier. „Hafið“ eftir
Baltasar Kormák og mynd Frið-
riks Þórs „Fálkar“ voru einnig
sýndar á hátíðinni.
„Hátíðin er haldin árlega og
þarna keppa myndir frá norður-
hluta Evrópu, meðal annars frá
Norðurlöndum, Belgíu, Hollandi
og Eystrasaltsríkjunum,“ segir
Skúli Malmquist hjá ZikZak, sem
framleiðir myndina ásamt Þóri
Snæ Sigurjónssyni. „Sigurinn hef-
ur heilmikla þýðingu fyrir dreif-
inguna í Frakklandi. Hún hefur
tekið þátt á tveimur hátíðum í
landinu og unnið á þeim báðum.
Dreifiaðilinn þar vill dreifa
myndinni í 80 eintökum sem er
alveg með ólíkindum.“ „Nói Al-
binói“ hefur nú tekið þátt á fjór-
um hátíðum í Evrópu og unnið
verðlaun á þeim öllum.
Skúli segist hissa hversu erf-
iðlega gangi að fá ungt fólk á
myndina og veltir fyrir sér
hvort ástæðan geti verið sú að
myndin hafi unnið til verðlauna
á kvikmyndahátíðum. Mikið
framboð á góðum myndum í bíó-
húsum gæti einnig verið skýring
en flestar myndirnar sem til-
nefndar voru til Óskarsverð-
launa í ár voru frumsýndar um
svipað leyti og Nói. ■
NÓI ALBINÓI
Dagur Kári leikstjóri er nú staddur í París í
samningaviðræðum við frönsk plötufyrir-
tæki um að gefa út tónlistina. Það er
hljómsveit hans Slowblow sem vann
hana alla.
Nói albínói:
Vann aðalverðlaun
í Rúðuborg
NATO-AÐILD SAMÞYKKT Sam-
kvæmt útgönguspám virðist sem
kjósendur í Slóveníu hafi sam-
þykkt aðild landsins að Atlants-
hafsbandalaginu. Sextíu prósent
studdu aðild en 40 prósent voru á
móti. Undanfarna daga hafði ríkt
óvissa um útkomu kosninganna.
Andstaða við aðild hafði vaxið
mjög eftir að Bandaríkin hófu
innrás sína í Írak.
■ Evrópa
RÍKIÐ SKULDAR LAUN Rússnesk-
ir ríkisstarfsmenn eiga inni and-
virði 90 milljarða króna í van-
greiddum launum, að sögn ITAR-
Tass fréttastofunnar. Launaskuld-
irnar halda áfram að aukast þrátt
fyrir að rússneskur efnahagur
hafi eflst nokkuð að undanförnu.
■ Hlutabréf
REYKUR ÁN ELDS Íbúa á Akur-
eyri brá nokkuð í brún þegar
hann sá reyk stíga upp úr húsi í
næstu götu. Hann brást fljótt við
og hringdi í Neyðarlínuna með
upplýsingar um að það væri
kviknað í húsi. Þegar málið var
athugað kom þó í ljós að hættan
var minni en virtist. Tveimur Ak-
ureyringum hafði dottið í hug að
grilla úti til tilbreytingar. Reyk
lagði af grillinu og blekkti það
hinn árvökula nágranna.
■ Lögreglufréttir
TEKNIR MEÐ FÍKNIEFNI Tveir
piltar voru stöðvaðir við venju-
bundið eftirlit í Hafnarfirði síð-
degis á laugardag. Leitað var á
þeim og í bíl þeirra, þar sem
fundust 4 g af amfetamíni og 10
grömm af hassi. Lagðar voru
fram kærur á hendur þeim og
telst málið upplýst að sögn lög-
reglunnar í Hafnarfirði.
DECODE Í TVO DOLLARA Gengi
DeCode Genetics, móðurfélags
Íslenskrar erfðagreiningar,
hækkaði um 10,5% á föstudag.
Gengið stendur nú í tveimur
dollurum sléttum á hlut.