Fréttablaðið - 08.08.2004, Blaðsíða 14

Ólafur F. Magnússon gekk úr Sjálf-
stæðisflokknum í árslok 2001 eftir
þrjátíu ár í flokknum. Í bor-
garstjórnarkosningunum 2002 varð
hann borgarstjórnarfulltrúi fyrir
hönd F-lista, Frjálslyndra og
óháðra með rösklega sex prósenta
fylgi. Frá því í mars á þessu ári hef-
ur hann átt í baráttu við Ríkisút-
varpið því hann telur að framboð
hans fái ekki nægilega umfjöllun í
frétta- og umræðutímum. Hann
sendi bréf til útvarpsráðs þann 24.
mars til að leita svara við spurning-
um sínum varðandi umfjöllun Kast-
ljóss á borgarmálunum. Á dögun-
um barst honum svarbréf sem hann
telur að svari ekki á viðunandi hátt
spurningum hans er varða kerfis-
bundna mismunun umsjónarmanna
Kastljóss á hendur honum. Ólafur
hefur sent annað bréf dagsett
20.júlí til útvarpsráðs þar sem hann
krefst skýrra svara.
Hagræðing kosningaúrslita
Hvernig hefur umfjöllunin um veru
þína í borgarstjórn farið fram í Rík-
issjónvarpinu síðastliðin tvö ár?
Fljótlega eftir kosningarnar
sumarið 2002 varð ég var við þá til-
hneigingu að þriðja aflið í borgar-
stjórn ætti ekki að fá þá umfjöllun
sem eðlileg mætti teljast í ríkisfjöl-
miðli sem starfar samkvæmt regl-
um um hlutlægni í umfjöllun. Þá
sérstaklega í Kastljósinu sem ekki
hefur séð ástæðu til að nefna það að
það eru þrír flokkar í borgarstjórn.
Það hafa þeir svo sannarlega gert í
landsmálapólitíkinni.
Það er sérkennilegt að aðeins sé
rætt við tvo af þremur flokkum í
borgarstjórn, meira að segja í mál-
um sem F-listinn hefur verið leið-
andi í. Það er eins og það sé vilji
einhverra manna sem þarna hafa
áhrif að við komust ekki fram í
næstu kosningum og að framboð
mitt þurrkist út. Þetta er þrátt
fyrir ítrekaðar ábendingar mínar
til umsjónarmanna Kastljóssins.
Það er ekkert launungarmál að í
Kastljósþáttunum virðist alltaf
vera eftirspurn eftir mönnum eins
og Guðlaugi Þór Þórðarsyni eins
ágætur og hann er. Sem betur fer er
ennþá til staðar verulegt mótvægi í
frjálsum fjölmiðlum í landinu.
Mér finnst það hart í lýðræðis-
þjóðfélagi að hálfpartinn sé hægt
að snúa við kosningaúrslitum eftir
á í gegnum umfjöllun um pólitík í
ríkisreknum fjölmiðli. Það er ekki
nema von að menn spyrji, bæði út
af þessu og svo mörgu öðru hvort
við búum ekki í bananalýðveldi.
Það verður að stöðva pólitíska mis-
notkun RÚV.
Hvernig hefur þér gengið að koma
þínum málum á framfæri í borgar-
stjórn?
Ég verð að hrósa meirihluta
borgarstjórnar fyrir það að reglur
lýðræðisins hafa verið virtar út í
ystu æsar á síðustu tveimur árum.
Málfrelsis- og tillöguréttur hefur
verið virtur fullkomlega og við í F-
listanum höfum látið mikið að
okkur kveða þó það hafi ekki endur-
speglast í fjölmiðlaumfjölluninni.
Einnig tel ég að ég hafi náð að
vinna ágætlega með fyrrverandi
samherjum mínum úr borgar-
stjórnarflokki Sjálfstæðisflokks-
ins.
Mikið breyst síðastliðin tvö ár
Ef þú lítur til baka sérðu þá eftir því
að hafa hætt í Sjálfstæðisflokkn-
um?
Ég held að ég hafi verið eins
heiðarlegur og stjórnmálamenn
eiga að vera. Í íslenskri pólitík í dag
þá verða kannski ekki margir
stjórnmálamenn til, sem eru ein-
arðir og trúir sinni sannfæringu,
því þessum mönnum er einfaldlega
ýtt til hliðar af flokksforystunni,
sem átti að gera við mig í kyrrþey
eftir að ég hóf andóf mitt í um-
hverfisverndarmálum. Ég átti ekk-
ert val því mér leið orðið mjög illa
að vera í Sjálfstæðisflokknum sam-
visku minnar og réttlætiskenndar
vegna.
Hvernig sérðu þinn gamla flokk í
dag nú þegar bráðum þrjú ár eru
liðin síðan þú sagðir þig úr honum?
Sjálfstæðisflokkurinn er fyrst
og fremst hagsmunagæsla þeirra
stóru, sterku og ríku. Það speglast
mjög rækilega í því að skattalög
hafa verið sniðin sérstaklega að
þörfum þessara aðila. Sumir þeirra
eru skapaðir af stjórnarflokkunum
með kvótakerfinu og einkavina-
væðingunni eins og ég kalla hana
þar sem útvaldir aðilar hafa fengið
ýmsar auðlindir og almenningsfjár-
magn afhent á silfurfati. Á sama
tíma og þessi stórkostlega mismun-
un eykst í samfélaginu eru hinir
ungu og nýju þingmenn Sjálfstæð-
isflokksins fremstir í flokki um að
láta skattskrár ekki liggja frammi.
Það á ekki einu sinni að hafa mis-
mununina sýnilega heldur á að fela
hana líka.
Ég hefði viljað að upp úr nýliðun
Sjálfstæðisflokksins kæmu réttlæt-
issinnaðir uppreisnarseggir sem
vildu vinna að því að bæta það sem
bæta þarf. Mig óar við því ef allir
hinir nýju ungu þingmenn Sjálf-
stæðisflokksins eru já-menn
þeirrar stórauknu mismununar og
spillingar sem á sér stað í þessu
þjóðfélagi.
Svo er annað sem mér finnst
vera afskaplega hættulegt, þegar
ættingjar stóreignamanna komast
inn á þing fyrir Sjálfstæðisflokkinn
án þess að hafa unnið fyrir því. Það
er alveg ljóst að ýmsir aðilar og
ættir á Íslandi höfðu forskot þegar
einkavæðingin hófst. Það er
áhyggjuefni að þeir sem hafa grætt
hvað mest á þessari þróun eiga
hvað mestan þátt í að sveigja stefnu
flokksins enn lengra í þessa átt.
Hvernig myndir þú lýsa þeim breyt-
ingum sem átt hafa sér stað í lífi
þínu síðastliðin tvö ár?
Ég hef alltaf litið á mitt pólitíska
starf sem aukastarf því ég hef
alltaf verið í fullu starfi sem heim-
ilislæknir. Eftir kosningasigurinn
komu margir menn að máli við mig
og sögðu mér að ég hafi gert þeim
persónulega skráveifu með kosn-
ingasigrinum. Það er ljóst að það
fyrirfinnast einstaklingar sem hafa
hætt sem sjúklingar hjá mér eftir
margra ára samstarf.
Því miður held ég að íslensk
pólitík snúist mun meira um hags-
muni en hugsjónir, að fólk umberi
ekki í nægilegum mæli skoðanir
hvers annars. Það er hins vegar
mikill misskilningur að ég láti und-
an þessum þrýstingi og láti hrekja
mig af hinum pólitíska vettvangi
því ég tel mig eiga þar mikið erindi.
Áttu heima á vinstri kantinum í
stjórnmálunum?
Ég legg mikla áherslu á frjálst
framtak einstaklingsins. Almennt
séð held ég að margir vinstrimenn
séu ekki nógu hollir kröftugu fram-
taki einstaklingsins. Eftir langa
valdasetu núverandi ríkisstjórnar-
flokka eru stjórnarhættir þeirra
orðnir óttalega sovéskir og stirð-
busalegir og farnir að ganga út á
allt annað en það sem ég kalla heil-
brigt einstaklingsframtak.
Ég tel að það sé nauðsynlegt að
finna afl sem er svolítið til hægri við
Samfylkinguna og að mínu mati svo-
lítið frjálslyndara til að geta hoggið
í raðir Sjálfstæðisflokksins. Það er
vonandi að Frjálslyndir sem ég hef
starfað með í tvö ár, styrki sig með
því að fá fleiri sterka og reynslu-
mikla einstaklinga til liðs við sig til
að skapa raunverulegt mótvægi við
Sjálfstæðisflokkinn. Sjálfstæðis-
flokkurinn ætti ekki að njóta þess
fjöldafylgis sem flokkurinn hefur
miðað við þá hugmyndafræði sem
hann stendur fyrir. ■
ingi@frettabladid.is
14 8. ágúst 2004 SUNNUDAGUR
Ólafur F. Magnússon, borgarfulltrúi F-lista stendur í deilum við Ríkisútvarpið því hann telur að ríkisfjölmiðillinn vegi að rétti framboðs
hans til að taka þátt í umfjöllun um borgarmál í Ríkissjónvarpinu.Hann tjáir sig hér um málið og síðastliðin tvö og hálft ár í lífi sínu eftir að
hann sagði skilið við Sjálfstæðisflokkinn eftir þrjátíu ára veru:
Pólitísk misnotkun RÚV
Um tillögu fulltrúa
Frjálslynda flokksins
(Ólafs F. Magnússonar) þá
ætla ég ekki að tjá mig að
öðru leyti en því að segja
að samsæriskenningar hans
um vinnubrögð í Kastljósinu
og öðrum þáttum Sjón-
varpsins eru „farsakennt
rugl“ svo ég vitni í ágætt
orðalag Kristjáns Kristjáns-
sonar eins umsjónarmanna
Kastljóssins með leyfi for-
seta.“ Gísli Marteinn Bald-
ursson tjáir sig um ályktun-
artillögu Ólafs F. Magnús-
sonar um fjölmiðlafrumvarp
í borgarstjórn þann 18.maí.
,,
ÓLAFUR F. MAGNÚSSON berst fyrir því að framboð hans í borgarstjórn fái réttmæta umfjöllun í ríkissjónvarpinu.