Fréttablaðið - 21.06.2007, Qupperneq 42

21. JÚNÍ 2007 FIMMTUDAGUR4 fréttablaðið gott á grillið
Eigendur fiskverslunarinnar
Hafsins-fiskiprinsins eftirláta
lesendum uppskriftir að grill-
réttum.
„Hérna svigna borðin undan góm-
sætum grillréttum yfir sumartím-
ann,“ segir Eyjólfur Pálsson hress
í bragði, en hann rekur fiskversl-
unina Hafið-fiskiprinsinn í Hlíða-
smára 8, ásamt félaga sínum Hall-
dóri Halldórssyni.
Eyjólfur segir prinsaspjótin
einna vinsælust á grillið. „Þau eru
náttúrulega lostæti. Sömuleiðis
lúða í smjörkryddi, lax í teriyaki og
forréttaspjót, en á því eru risarækj-
ur og hörpudiskur. Þá þykja keilan
og langan, sem eru mjög þéttar í
sér, ekki síður góðar á grillið.“
Ásamt því að bjóða upp á tilbúna
rétti, gera félagarnir einnig mikið
út á ferskan fisk. Í því samhengi
bendir Eyjólfur á að risarækjur,
stór hörpudiskur og allar stærð-
ir af góðum humri fáist í búðinni.
„Þá er ótalin humarsúpa Prinsins,
súpa sem er löguð til úr rjóma eða
kókosmjólk með uppáhalds fiskteg-
undum hvers og eins,“ bætir hann
við.
Félagarnir í Hafinu-Fiskiprins-
inum eftirláta lesendum uppskrift-
ir að nokkrum gómsætum grillrétt-
um. Þar á meðal að fiskspjótunum
vinsælu. roald@frettabladid.is
HUMARVEISLA
12 stórir humarhalar í skel
hvítlaukssmjör með steinselju
Maldon-sjávarsalt
fersk steinselja
Klippið skeljar humarhal-
anna eftir þeim endilöngum og
notið þumlana til að opna skelina.
Smyrjið hvítlaukssmjörinu ofan í
skeljarnar. Stráið fingurbjörg af
Maldon-salti og vel saxaðri stein-
selju yfir hvítlaukssmjörið. Legg-
ið halana á vel heitt grill og látið
grillast í um það bil sex mínútur.
PRINSASPJÓT
200 g lax roðlaus og beinlaus
200 g lúða roðlaus og beinlaus
200 g langa roðlaus og beinlaus
200 g steinbítur roðlaus og beinlaus
Hotspot teriyaki-sósa
grænt pesto
curry paste frá Rajah
satay-sósa frá Thai Choise
4 stór grillspjót
Skerið fisk í 50 gramma bita.
Leggið hann svo í lög, lax í ter-
iyaki, lúðu í karrýmauk, löngu í
grænt pestó og steinbít í satay-
sósu í um það bil fjóra tíma. Setj-
ið svo einn bita af hverri tegund
upp á spjótin. Grillið á heitu grilli
í fimm mínútur á hvorri hlið.
KEILA Í INDVERSKU KARRÍI
1 kg keila roðlaus og beinlaus, skor-
in í steikur
1 hvítur laukur
1 chili
1/2 hvítlauksgeiri
50 g ólívur, bæði svartar og grænar
50 g sólþurrkaðir tómatar
1 tsk. salt
1 tsk. pipar
2 tsk. karrí
1 tsk. paprikuduft
1 tsk. arómat-krydd
2 dl ólívuolía
Setjið krydd, grænmeti og olíu
í matvinnsluvél og maukið saman.
Látið keiluna liggja í um það bil
fjóra tíma í leginum. Setjið keil-
una á vel heitt grill í fjórar mín-
útur á hvorri hlið. Tilvalið er að
pensla hana með kryddleginum á
meðan grillað er.
LAX Í SWEETCHILI TERYAKI
1 kg laxaflak
1 dl teryaki frá Hotspot
1 dl sweet chili frá Thai Choice
1 msk. af sesamfræum
Skerið laxinn í fjóra góða bita
og hafið hann með roðinu. Bland-
ið saman teryaki-sósu og sweet
chili sósu og setjið sesamfræ út í.
Penslið laxinn síðan með leginum.
Grillið í tvær mínútur á roðlausu
hliðinni, til að fá flottar rendur í
laxinn. Snúið honum síðan við á
roðhliðina og grillið í fjórar mín-
útur. Gott er að pensla hann nokkr-
um sinnum með leginum.
Sælkeraveisla úr sjónum
Eyjólfur og Halldór eru aðeins 25 ára, en vantar ekki reynsluna. Eyjólfur byrjaði í fiski
aðeins 12 ára og hóf 16 ára störf í Fiskbúðinni Vör, þar sem hann fékk viðurnefnið
fiskiprinsinn. Þannig er heiti búðarinnar tilkomið. FRÉTTABLAÐIÐ/HÖRÐUR
Prinsaspjótin eru meðal þeirra rétta sem eru vinsælir í versluninni, sem er nú einnig
opin á laugardögum frá klukkan 12.00 til 14.00.
Keila í indversku karríi og lax í sweet-chili teryaki.
Humarhalarnir eru látnir grillast í um það bil sex mínútur, þaktir hvítlaukssmjöri.