Morgunblaðið - 13.08.2007, Qupperneq 16

16 MÁNUDAGUR 13. ÁGÚST 2007 MORGUNBLAÐIÐ
VESTURLAND
Eftir Steinþór Guðbjartsson
steinthor@mbl.is
„ÞETTA er stór stund og ég er
ánægður með að við skyldum hafa
gefið okkur nægan tíma í verkið,“
sagði Curtis Olafson, formaður
kirkjunefndar Eyford í Þingvalla-
sveit í Norður-Dakóta í Bandaríkj-
unum, eftir að minnismerki um
Þingvallakirkju var afhjúpað þar
sem kirkjan stóð.
Menningararfleifð
Þingvallakirkja, lúterska kirkjan í
Eyford, var eitt helsta kennileiti ís-
lensku byggðarinnar í nágrenninu
og einn helsti fjársjóður íslenskrar
menningararfleifðar í Norður-
Dakóta. Íslendingar fluttu fyrst til
svæðisins frá Kanada 1878, kirkju-
söfnuðurinn í Eyford var stofnaður
1889 og kirkjan byggð 1892 og 1893.
Hún var vígð 9. ágúst 1893 og um
110 árum síðar brann hún til kaldra
kola þegar unnið var við endurbætur
á henni.
Kirkjan stóð austan við þjóðveg
númer 32, um 6 km sunnan við
Mountain. Norðan við hana var reist
minnismerki um skáldið Káin, Krist-
ján Níels Júlíus, 1936 og var það lag-
að og endurgert 1999. Minnismerkið
slapp við skemmdir í brunanum 3.
júní 2003 en eftir hann var þegar
farið að huga að uppbyggingu svæð-
isins. Til greina kom að reisa nýja
kirkju en fljótlega var ákveðið að
koma þess í stað upp minningarreit
á svæðinu. Sumarið 2004 var sáð í
reitinn og nú eru þar villtar plöntur
sem eru einkennandi fyrir Norður-
Dakóta. Upplýsingaskilti og myndir
segja sögu svæðisins og ekki síst ís-
lensku frumbyggjanna auk tengsla
við Ísland. Um tveggja metra há eft-
irlíking úr bronsi af Kristsstyttu eft-
ir Bertel Thorvaldsen var síðan af-
hjúpuð á reitnum föstudaginn 3.
ágúst síðastliðinn en um það sáu
listamaðurinn Dee Jay Bawden frá
Utah, sem gerði eftirlíkinguna, og
Pam Furstenau að viðstöddu miklu
fjölmenni.
Þakkir
Hin árlega Íslendingahátíð í
Mountain fór nú fram í 108. sinn og
að þessu sinni voru sérstakir heið-
ursgestir þeir Geir H. Haarde, for-
sætisráðherra, og John Hoeven, rík-
isstjóri Norður-Dakóta. Vegna
afhjúpunar minnismerkisins bárust
meðal annars kveðjur frá forseta Ís-
lands Ólafi Ragnari Grímssyni, bisk-
upi Íslands Karli Sigurbjörnssyni og
Ólafi Skúlasyni biskup.
Curtis Olafson segir að íbúar
þessa litla samfélags séu mjög þakk-
látir fyrir kveðjurnar og komu gest-
anna frá Íslandi í tengslum við af-
hjúpun minnismerkisins. Það væri
mikill heiður að fá forsætisráðherra,
ríkisstjóra og sendiherra Íslands í
heimsókn og ákveðnum kafla væri
lokið. Margar hugmyndir hefðu ver-
ið á lofti um uppbygginguna eftir
brunann og vonandi hefðu þær bestu
orðið ofan á. „Upplýsingaskiltin og
myndirnar halda ekki aðeins sögu
Þingvallakirkju á lofti heldur sögu
íslenska landnámsins á svæðinu.“
Ljósmynd/Kent Lárus Björnsson
Minningarreiturinn Villtar plötnur, upplýsingaskilti með texta og myndum
auk Kristsstyttunnar prýða svæðið þar sem Þingvallakirkja stóð áður.
Ljósmynd/Susan Powers
Minnismerki Listamaðurinn Dee Jay Bawden við eftirlíkinguna af Krists-
styttu Bertels Thorvaldsens þar sem áður var Þingvallakirkja í Eyford.
Minnismerki afhjúpað um
Þingvallakirkju og landnámið
Ljósmynd/Susan Powers
ÚR VESTURHEIMI
Eftir Guðrúnu Völu Elísdóttur
gve@ismennt.is
Akranes | Fáir ef nokkir hafa eins
gaman af því að eiga afmæli eins og
hún Guðríður Haraldsdóttir betur
þekkt sem Gurrí Har, sú sama og
bloggar frá Himnaríki á Mogga-
blogginu við miklar vinsældir. Hún
hélt upp á afmælið sitt í gær í tutt-
ugasta skiptið í röð frá því hún varð
29 ára. Og Gurrí heldur alltaf stór-
afmæli og fær um 60-80 gesti í
hvert sinn.
Þess má einnig geta að margir
bloggvinir komu og kættust í af-
mælinu. En er ekki Gurrí bara að
sækjast eftir afmælisgjöfum með
þessum veisluhöldum? ,,Nei,
veistu,“ segir Gurrí ,,ég á nóg af
kertastjökum, en ég er ógurlega fé-
lagslynd og finnst gaman að fá
gesti. Upphaflega fór ég að halda
upp á afmælið af því að ég hafði
kynnst svo mörgu frábæru fólki
þarna í kringum 1986 og langaði að
halda veislu. Ég er heldur ekkert
fyrir fyllirí og finnst kaffi mun
betra en vín. Enda passa ég alltaf
upp á að hafa mjög gott kaffi í mín-
um veislum. Sumir hafa til dæmis
rándýrt bakkelsi en klikka á kaffinu
en ég er ekki svoleiðis. Gestirnir
mínir tárast af unaði þegar þeir
drekka kaffið mitt.“
Fjórum dögum eldri
en Madonna
Gurrí upplýsir leyndardóminn á
bak við kaffið en hún býður upp á
Expresso Krakatá frá Kaffitári sem
hún segir ekki geta klikkað. ,,Svo
finnst mér heldur ekkert leiðinlegt
að eldast, ég minni sjálfa mig á að
ég er bara fjórum dögum eldri en
Madonna og sjáðu hvað hún er að
gera, hlaða niður börnum og
skemmta sér.“
Dagurinn í gær var ákaflega
ánægjulegur segir Gurrí, afmæl-
isveislan hófst klukkan þrjú og stóð
fram á kvöld. ,,Reyndar fór minna
kaffi en venjulega en ég held
kannski að ástæðan hafi verið veð-
urblíðan. Hins vegar fór mikið af
kóki og brauðterturnar voru búnar
fyrir klukkan sex.“
Gurrí hefur fyrir sið að panta
eina stóra marsípantertu fyrir hvert
afmæli og hefur hún haft nokkuð
sérstakar áletranir á þeim. Í ár stóð
á tertunni ,,Elsku Þrúða, láttu þér
batna“. Gurrí segir húmorinn um
ódýra tertu ráða ríkjum og það
þema hafi gilt í nokkur ár. ,,Eitt ár-
ið stóð á tertunni: Dofri Hvannberg,
til hamingju með fyrsta fallhlíf-
arstökkið“ og einhverjir héldu virki-
lega að ég hefði fengið tertuna
ódýrt.“ Gurrí hlær og bætir við að á
fyrstu tertunni hafi staðið „29 ára í
fyrsta sinn“ en árið eftir ,,þrítug og
enn þokkafull“.
Einn siður varðandi afmælið er á
undanhaldi en það er að afmælið
hefur verið fullorðinsafmæli og
börn ekki velkomin.
,,Þetta er ekki vegna
þess að ég sé ekki hrifin
af börnum, heldur var
það þannig að ég bjó í 56
fermetra íbúð lengst af
og þá var varasamt að
hafa börn í veislunum.
Þau voru hreinlega
gengin niður og svo var
að hellast niður appelsín
og svoleiðis, þannig að
ég tók fyrir að gestir
kæmu með börnin með
sér. Hins vegar er
rýmra í Himnaríki og nú
hef ég gefið grænt ljós á
börn og meira segja
stungið því að gestunum að koma
með þau með en flestir vilja nú bara
hafa þetta áfram fullorðinsafmæli,“
segir Gurrí. ,,En talandi um litlu
íbúðina mína, þá er mér minnistætt
að eitt árið þegar margir gestir
voru komnir í afmælið og fleiri
bættust við þurfti ég að hrópa inn
og biðja fólkið að færa sig aftar,
bara eins og í strætó.“
Reikna með fleiri
gestum að ári
Að ári nær Gurrí nýjum tug.
Hvernig ætlar hún að halda upp á
það? ,,Ég kann svo vel við mig í
Himnaríki,“ segir hún og er að tala
um íbúðina sína við Langasandinn,
,,útsýnið er svo æðislegt og svo er
komin hefð á svona kaffi og köku-
afmæli heima hjá mér sem ég ætla
bara að halda mig við. En ég reikna
samt með fleiri gestum að ári af því
ég á stórafmæli.“
Afmælisbarn
í Himnaríki
Morgunblaðið/Guðrún Vala
Bloggvinkonur Guðríður heldur alltaf stórafmæli. Með henni eru Anna Kristjánsdóttir og Sigríður Jósefsdóttir.
Vinkonur Guðríður Haraldsdóttir afmælisbarn
og Nanna Rögnvaldardóttir matgæðingur.
xxxxxxxxxxxxx
Tertan Þrúða, láttu þér batna.