Skinfaxi - 01.05.2010, Blaðsíða 3
SKINFAXI – tímarit Ungmennafélags Íslands 3
Um verslunarmannahelgina verður
13. Unglingalandsmót Ungmennafélags
Íslands haldið í Borgarnesi í umsjón
Ungmennasambands Borgarfjarðar og
Borgarbyggðar.
Unglingalandsmótin hafa vakið verð-
skuldaða athygli og eru orðin fastur liður
í lífi margra um verslunarmannahelgina.
Mótin eru án efa skynsamlegasta og
skemmtilegasta fjölskyldu-, íþrótta- og
forvarnahátíð sem haldin er á Íslandi ár
hvert, mót þar sem unglingar á aldrinum
11–18 ára og íþróttir eru í fyrirrúmi og
stórfjölskyldan getur tekið þátt.
Undanfarin ár hafa skilaboð til fjöl-
skyldna um að verja meiri tíma saman
verið áberandi, einkum í kringum atburði
þegar líklegt er að unglingar freistist til
að neyta áfengis eða annarra vímuefna.
Foreldrar og unglingar hafa tekið þess-
um skilaboðum vel og virðast kjósa að
verja meiri tíma saman. Það er reyndar
margsannað að umhyggja og hlýja frá
fjölskyldunni er grundvöllur velferðar
barna og unglinga og er einn af þeim
þáttum sem draga mjög úr líkum á því
að unglingar velji að fikta við að reykja
eða nota áfengi eða önnur vímuefni.
Sá mikli fjöldi fólks sem sækir Ungl-
ingalandsmótin á hverju ári ber vitni um
þetta og er viðurkenning til UMFÍ frá þjóð-
inni um að hún er sammála hreyfingunni
um að hægt sé að halda áfengis- og vímu-
efnalausa hátíð um þessa stærstu ferða-
helgi landsmanna.
Glæsileg íþróttamannvirki eru til stað-
ar í Borgarnesi. Íþróttaleikvangurinn er
vel staðsettur og við hann eru knatt-
spyrnuvellir, sundlaug og íþróttahús.
Önnur íþróttamannvirki eru í bænum eða
næsta nágrenni. Tjaldstæði keppenda
verður rétt utan við bæinn en boðið verð-
ur upp á góðar samgöngur við keppnis-
svæðin.
Góður valkostur fyrir alla
Formaður UMFÍ: Helga Guðrún Guðjónsdóttir
Í Borgarnesi er öll þjónusta í boði, úrval
verslana, veitingastaðir og konditorí, góð
hótel og gististaðir. Í nágrenni Borgar-
ness eru einstakar náttúruperlur og sögu-
staðir sem gaman er að heimsækja.
Undirbúningur og framkvæmd Ungl-
ingalandsmóts er mikið verkefni fyrir
mótshaldarana. Stór hópur sjálfboðaliða
kemur að mótinu sem gerir alla undir-
búningsvinnu og framkvæmd þess mögu-
lega. Þetta fórnfúsa og mikla starf sjálf-
boðaliðans gerir það að verkum að öll
umgjörð og undirbúningur mótsins verð-
ur eins glæsileg og raun ber vitni, ásamt
góðu samstarfi við sveitarfélagið. Ríkis-
valdið hefur stutt vel við uppbyggingu og
framkvæmd á Unglingalandsmótunum í
gegnum tíðina og fyrir þann góða stuðn-
ing, ásamt stuðningi frá styrktaraðilum
mótsins, erum við ákaflega þakklát.
13. Unglingalandsmót UMFÍ í Borgar-
nesi er góður valkostur fyrir alla og því
um að gera að skella sér því að þar finna
allir aldurshópar eitthvað við sitt hæfi.
Verið öll hjartanlega velkomin á Ungl-
ingalandsmót og njótið þess að taka þátt
í skemmtilegri og fjölbreyttri dagskrá.
Við tökum vel á móti þér og hlökkum
til að sjá þig.
Íslandi allt!
Starfsíþróttaráð
UMFÍ stofnað
Efnt var til fyrsta starfsíþróttaþings Ungmennafélags
Íslands þann 24. apríl sl. og var þingið haldið á Akureyri.
Fulltrúar allra sambandsaðila UMFÍ áttu rétt til setu á
þinginu. Kosið var í starfsíþróttaráð og samþykktar leik-
reglur í hinum ýmsu starfsíþróttagreinum.
Á sambandsþingi UMFÍ, sem haldið var í Keflavík sl.
haust, var samþykkt að skipa starfshóp til að undirbúa
stofnþing starfsíþróttaráðs UMFÍ. Hlutverk ráðsins er að
vinna að eflingu starfsíþrótta, fjalla um málefni þeirra og
setja allar leikreglur í starfsíþróttum innan UMFÍ.
Á starfsíþróttaþinginu var kosin stjórn og í henni eiga
sæti Halldóra Gunnarsdóttir, Aðalbjörg Hafsteinsdóttir
og Sigurður Aðalsteinsson. Í varastjórn eru Guðbjörg
Hinriksdóttir og Hallfríður Ósk Aðalsteinsdóttir.
„Þetta var mjög skemmtilegt þing og umræður mjög
góðar. Þarna var samankomið fólk með mikla þekkingu
og reynslu sem vissi nákvæmlega hvað það var að gera.
Það má segja að þarna hafi orðið tímamót í sögu UMFÍ,
en á þinginu var stofnað starfsíþróttaráð sem koma mun
saman annað hvert ár og næsta þing verður því haldið
2012. Þingið samþykkti reglugerð fyrir ráðið og farið var
yfir allar reglur starfsíþrótta,“ sagði Halldóra Gunnars-
dóttir sem á sæti í hinu nýstofnaða starfsíþróttaráði.