Skinfaxi - 01.08.2010, Blaðsíða 9
SKINFAXI – tímarit Ungmennafélags Íslands 9
HVAR
ERU ÞAU
Í DAG?
Jón Arnar
Magnússon
Jón Arnar Magnússon er í hópi bestu
íþróttamanna sem Ísland hefur alið. Hann
komst í hóp fremstu tugþrautarmanna í
heiminum, keppti á þrennum Ólympíu-
leikum ásamt Heimsmeistara- og Evrópu-
mótum. Jón Arnar er ungmennafélagi en
hann keppti á sínum tíma undir merkjum
UMSS, HSK og Breiðabliks. Hvar skyldi
Jón Arnar vera niður kominn í dag?
Verðandi kírópraktor
Óhætt er að segja að Jón Arnar hafi ekki
setið auðum höndum. Hann lagði land undir
fót fyrir fjórum árum og hélt utan til Englands.
Þar leggur hann stund á nám til kírópraktors
við háskóla í bænum Bournemouth á suður-
strönd landsins.
Jón Arnar unir hag sínum vel í dag. Hann
segir námið erfitt en um fram allt spennandi
og skemmtilegt.
„Ég stefni að því að ljúka námi í vor en þá
verð ég búinn að vera í fimm ár í náminu. Ég
lýk mastersnámi í vor og verð því doktor um
leið. Þetta nám er ekki ósvipað læknanámi,
en ef ég bætti við mig hálfs árs námi við há-
skólann í Southampton myndi ég klára lækn-
inn,“ sagði Jón Arnar í samtali við Skinfaxa.
Hann segist ekki ákveðinn í hvað taki við hjá
sér eftir að námi lýkur í vor.
„Eins og ástandið er heima vitum við ekki
alveg hvað við gerum en það má alveg segja
að við fórum út á hárréttum tíma, seldum allt
og hér höfum við unað hag okkar vel. Þetta
var stór ákvörðun en við sjáum ekki eftir
henni. Hvort við komum heim í vor fer allt
eftir því hvernig staðan verður þá. Mál gætu
alveg þróast í þá veru að starfa í íþróttahreyf-
ingunni hér úti. Ég hef ekkert verið að tala um
mín íþróttaafrek hér en um síðustu áramót
uppgötvuðu menn hér hver ég í raun var.
Kennararnir kveiktu á því að ég hafði keppt á
þrennum Ólympíuleikum og ég veit ekki
hvað mörgum Heimsmeistara- og Evrópu-
mótum. Eftir að þetta kom í ljós fór ég að
vera meira með íþróttamönnum hér á svæð-
inu. Ég hef t.d. verið með knattspyrnumenn
úr Bournemouth-liðinu í meðhöndlun sem
hafa verið að jafna sig eftir meiðsli. Ég hef
verið með þá meira en í hinni hefðbundnu
sjúkraþjálfun, meiri rannsóknir eru gerðar
á mönnum. Síðan notar maður bara gamla
frjálsíþróttamanninn á þá og það fíla þeir
alveg í botn,“ sagði Jón Arnar.
Hjólar og hleypur á
hverjum degi
Jón Arnar gefur ekkert eftir í þjálfuninni
sem snýr að honum sjálfum.
„Ég hleyp klukkutíma á morgnana áður en
ég fer í skólann og síðan hjóla ég í skólann.
Svo það verður ekki langt í það að ég geti
farið að keppa í þríþrautinni,“ sagði Jón
Arnar, hress í bragði.
Hann segist vera í um 40 mínútur að hjóla
„Ekki langt í það
að ég geti keppt
í þríþrautinni“
í skólann og því fari um einn og hálfur tími á
dag í hjólreiðarnar. Aðspurður hvort hann sé
ekki í fantaformi segist hann alla vega ekki
vera orðinn feitur. Maður verður að vera í
keppnishæfu formi eins og hann kemst að
orði.
„Nú stefnir maður að því að ljúka náminu
og auðvitað er ætlunin að koma heim. Hvort
það verður strax eða síðar verður tíminn að
leiða í ljós. Við eigum tvo eldri stráka og þá
er maður kominn í smábobba því að skóla-
kerfið er öðruvísi hér en heima. Strákarnir
okkar eru komnir tveimur árum á undan jafn-
öldrum sínum heima. Það getur vel verið að
við hinkrum við eftir þeim,“ sagði Jón Arnar.
Jón Arnar segist fylgjast með íþróttalífinu
heima eins og hann geti.
„Ég var farinn að sjá í hillingum að Íslands-
metið mitt í langstökki væri við það að falla.
Það fellur eflaust innan skamms, metin eru
jú til að slá þau. Ég fylgist að sjálfsögðu með
framgöngu Helgu Margrétar í sjöþrautinni
og gef henni góð ráð þegar hún leitar ráða
hjá mér,“ sagði Jón Arnar Magnússon í spjall-
inu við Skinfaxa.
Jón Arnar á langan
feril að baki í frjáls-
um íþróttum. Á
myndinni hér til
hliðar sést hann
brosmildur á
Landsmóti UMFÍ
á Egilsstöðum
2001. Að ofan er
hann með reið-
skjóta sinn sem
hann notar nú á
hverjum morgni.