Búnaðarrit - 01.01.1984, Page 301
BÚNAÐARÞING 273
Þá var komið að þingslitum. Tók forseti til máls og sagði:
Góðir þingfulltrúar.
“Búnaðarþingi er að ljúka. Það hefur staðið í 14 daga, og
er það annað þingið, sem ekki hefur setið lengur að
störfum. Lögð voru 64 mál fyrir þingið og þar af voru 57
afgreidd. Sex komu ekki frá nefndum, og eitt til viðbótar
hlaut ekki afgreiðslu.
Haldnir voru 18 fundir auk fjölmargra nefndafunda.
Þingfulltrúar hafa nú sem jafnan áður unnið mikið og lagt
sig fram um að kynna sér málin og finna leiðir til lausnar
þeim. Búnaðarmálastjóri og ráðunautar hafa unnið með
þingnefndum og greitt götu þingsins á allan hátt, auk þess
sem skrifstofustúlkur hafa orðið að leggja óvenjuhart að sér
til að koma þingskjölum áfram í tæka tíð, því að mikið hefur
þurft að vélrita.
Þing þetta hefur vakið athygli og sum dagblöð hafa sent
bæði bændastéttinni og þinginu kaldar og órökstuddar
kveðjur. Við erum ekki óvanir því bændur, þótt skilnings-
snauðir blaðamenn geri tilraunir til þess að ala á óánægju
milli manna og stétta. Slíkt fær ekki á okkur.
Hitt ber að þakka, að þeir eru miklu fleiri, sem skilja og
meta íslenzkan landbúnað, og ég leyfi mér að þakka
sérstaklega þeim blaðamönnum, sem hér hafa verið og
fylgzt með störfum Búnaðarþings og skýrt rétt frá málum
þess.
Málefni þessa þings hafa mótazt að nokkru af því kalda
og vonda tíðarfari, sem verið hefur um skeið, og að nokkru
af markaðserfiðleikum á hluta af búvöruframleiðslunni, og
í þriðja lagi hefur kreppan eða efnahagsástand þjóðarinnar
sín áhrif á landbúnaðinn og málefni hans. Því fer þó fjarri,
að svartsýni gæti hjá þingfulltrúum, heldur þvert á móti,
þar sem ályktanir þingsins bera þess glöggt vitni, að þar er
framfarahugur og óbilandi trú á mátt moldarinnar og
framtíð landbúnaðar.