Búnaðarrit - 01.01.1984, Page 306
278
BÚNAÐARRIT
janúar og féllu þá mikil snjóflóð á Vestfjörðum. Febrúar
var svo hlýr um landið allt eins og fyrr segir, með meðalhita
1,6° á Akureyri, sem er 3,2° yfir meðallag svo dæmi sé
tekið. Marsmánuður var bæði kaldur og úrkomusamur.
Apríl var þó enn verri, kaldur og úrkomusamur svo af bar
og aðeins einu sinni á öldinni hefur apríl orðið kaldari í
Reykjavík. Mjög snjóþungt var einkum um norðaustanvert
landið. Maí var í heild kaldur, einkum var mjög kalt um
norðanvert landið. Þrálát norðanátt var aðra og þriðju
vikuna og snjóaði þá víða á norðan- og vestanverðu landinu
og allt suður um Dali og Snæfellsnes. Snjóalög voru þá víða
mikil á Norðurlandi og á Ströndum, þar sem snjóar voru
miklir frá vetrinum. Sauðburður gekk þó yfirleitt vel, því
ekki gerði hörð áhlaup.
Hitinn var alls staðar undir meðallagi, 0,7° í Reykjavík,
en enn meira eða 2,9° á Akureyri. Úrkoma var ekki mikil
um sunnanvert landið, en þeim mun meiri fyrir norðan eða
tvöföld meðalúrkoma á Akureyri.
Júní var mjög kaldur og úrkomusamur um allt land.
Tvöföld meðalúrkoma var í Reykjavík og sömuleiðis á
Akureyri. Um norðanvert landið batnaði ekki fyrr en urn
miðjan mánuð og var fénaður víða á gjöf fram eftir
mánuðinum og var þetta með allra hörðustu vorum, því
ekki fór að gróa að ráði fyrr en upp úr miðjum mánuðinum.
Hörkuáhlaup gerði fyrir norðan dagana 11. og 12. júní og
urðu þá nokkrir fjárskaðar þar, sem búið var að sleppa
lambfé. Þá urðu einnig skaðar á kartöflugörðum.
Jörð var víða svo blaut að illfært var um ræktunarlönd og
dæmi voru þess að menn gátu ekki sáð grænfóðri þessa
vormánuði.
Vorharöindi þessi ollu gífurlegu tjóni. Áætlað er að
aukakostnaður bænda á svæðinu frá Skarðsheiði, vestur,
norður og austur um að Lónsheiði hafi numið um 70
milljónum króna. Auk þess er ljóst að hann varð víða mikill
í öðrum landshlutum.