Fréttablaðið - 17.08.2010, Blaðsíða 22
17. ÁGÚST 2010 ÞRIÐJUDAGUR2 ● fréttablaðið ● heilsa og lífsstíll
Í tilefni þess að Jógastúdíó var
opnað á nýjum stað á Seljavegi 2
í gær, verður frítt í alla tíma út
þessa viku. „Við vorum áður með
aðstöðu í Veggsporti uppi á Höfða,
en ákváðum að byggja alvöru
jógaumhverfi í kringum stúdíó-
ið þar sem fólk gæti slappað af
og látið sér líða vel,“ segir Drífa
Atladóttir jógakennari sem rekur
Jógastúdíó ásamt Ágústu Kol-
brúnu Jónsdóttur jógakennara.
Aðstandendur Jógastúdíós hafa
síðasta hálfa mánuðinn lagt nótt
við dag til að standsetja hið nýja
húsnæði sem er í gamla Héðins-
húsinu. Þar hafa þær Drífa og
Ágústa yfir að ráða um 200 fer-
metrum með flottum sal, vel út-
búnum klefum og róandi and-
rúmslofti.
Í Jógastúdíói er boðið upp á
tíma í hatha-jóga, hot-jóga, kraft-
jóga, mömmujóga og krakkajóga
og getur því hver fundið eitthvað
við sitt hæfi.
Eins og áður sagði er frítt í
alla tíma þessa vikuna en einn-
ig er boðið upp á góðan afslátt af
öllum kortum.
Nánari upplýsingar má nálgast
á vefsíðunni www.jogastudio.is.
Frítt í jóga í vikunni
Drífa og Ágústa bjóða alla velkomna í ný heimkynni Jógastúdíós við Seljaveg.
Hörður Erlendsson yfirvélstjóri hefur notað æfinga-
sal frystitogara til að halda sér í formi undanfarin
ár. Svo tekur hann á sprett þegar hann kemur í land.
Víðavangshlaup eru hans ær og kýr yfir sumarið og
þegar þeim sleppir taka fjallgöngur við.
„Hlaup og þrekæfingar eru áhugamál hjá mér
og margir skipsfélagar mínir hafa smitast af mér
og farið að hreyfa sig fyrir minn atbeina,“ segir
Hörður sem einmitt er nýkominn úr átta kílómetra
skokki þegar í hann næst. Togarinn sem hann hefur
verið á er Örvar sem gerður er út frá Sauðárkróki.
„Ég er reyndar að skipta um skip og fer á Norðfjarð-
artogarann Börk. Það hentar mér mun betur því
Neskaupstaður er minn heimabær,“ útskýrir hann.
Hörður ætlar að þreyta Skálaneshlaup í Seyðis-
firði um næstu mánaðamót. Það er 17 kílómetra
langt og hann kveðst vera að hlaupa það í fyrsta
skipti. En Barðsneshlaup í Norðfirði er árviss
þrekraun hjá honum og það fór hann um verslunar-
mannahelgina ásamt 40 öðrum. „Þetta eru 27 kíló-
metrar en farið yfir tvær ár, yfir 400 metra háa
fjallsöxl og stokka og steina. Mjög skemmtilegt
hlaup,“ lýsir hann og kveðst keppa í slíkum hlaupum
bæði við aðra þátttakendur og sjálfan sig. „Mér
tókst að bæta tíma minn frá því í fyrra,“ segir hann
ánægður.
Sjálfur hefur Hörður startað einu víðavangs-
hlaupi austanlands sem hefð er að komast á, það er
Tangahlaup og er hlaupið um Mjóafjörð út á Dala-
tanga en þar átti hann heima sem unglingur. Þegar
þessar hlaupakeppnir eru búnar þá taka fjöllin við.
„Ég er yfirleitt með skeiðklukku þegar ég geng á
fjöll og tek þau á tíma. Það er mjög gott til að reyna
að streða svolítið,“ segir hann.
Hörður er ekkert sérlega stoltur af afrekum
sínum á fjallgöngusviðinu í sumar. Kveðst bara hafa
gengið á Norðfjarðarnípuna og Nesnúp við Siglu-
fjörð. „En Herðubreið er í sigti og ég hef líka mik-
inn áhuga á að ganga á Snæfell í haust.“ - gun
Með skeiðklukku um fjöllin
Hörður í Tangahlaupi nú í sumar en þá er hlaupið um Mjóa-
fjörð út á Dalatanga. MYND/ÁSGEIR RÚNAR HARÐARSON
● FRAMÚRSKARANDI LÍKAMLEG
OG ANDLEG ÚTRÁS Í Veggsporti við
Gullinbrú hefur verið boðið upp á skvass í
23 ár. Skvass er enn á ný í vaxandi sókn og
æ fleiri sem vilja láta til sín taka á skvass-
vellinum. Í haust verða í boði byrjendatím-
ar fyrir fullorðna, en mikilvægt er að gefa
sér tíma í grunntækni skvassins því þá eru
iðkendur þess fljótari að komast á bragðið.
Vinsæl barna- og unglingakennsla í
skvassi verður áfram í boði, en hentugt er fyrir
börn að byrja í skvassi um tíu ára aldur, þótt
börn niður í átta ára hafi sótt kennsluna og er
í góðu lagi ef virkilegur „bolti er í þeim“, eins og
Veggsportsmenn orða það. Æfingar eru þrisvar í viku,
en þjálfun felst í því að halda rétt á spaðanum, slá
boltann rétt, og ýmsum tækniatriðum og úthaldi.
Skvass þykir hin fullkomna hreyfing þar sem lítill
tími fer í ástundun þess og brennsla er mikil. Þá þykir
andleg útrás ekki síður góð en sú líkamlega, þar sem
íþróttin er harðfylgin mjög og ágeng.
Sjá stundaskrá haustsins á www.veggsport.is.
Hin sextán ára Hulda Lilja
Hannesdóttir er ein fárra
stúlkna sem keppa í siglingum
hér á landi. Hún og Hilmar tví-
burabróðir hennar eru á sama
báti og urðu Íslandsmeistarar
í annað sinn um síðustu helgi í
Topper Topas flokki.
„Það er gaman að hafa einhvern að
keppa með. Hilmar stýrir en ég er
áhöfnin og sé um framsegl, belgs-
egl, kíki og kjöl. Við hjálpumst að
og erum alltaf að tala saman um
hvað við getum gert betur.“ Þannig
lýsir Hulda Lilja samstarfi sínu og
Hilmars bróður síns. Þau sigruðu
í sínum flokki á Íslandsmótinu í
siglingum sem fór fram á Pollin-
um á Akureyri um nýliðna helgi.
Hulda kveðst hafa byrjað í
siglingum sumarið 2004. „Ég fór
á leikjanámskeið hjá klúbbnum
Siglunesi í Nauthólsvík með bróður
mínum og okkur þótti mjög gaman.
Árið 2007 fórum við svo bæði
að æfa og keppa hjá klúbbnum
Brokey,“ lýsir hún og segir mjög
fáar stelpur í þessu sporti. „En
systir okkar, Lína Dóra sem er
nýorðin 13 ára, byrjaði ári á eftir
okkur Hilmari. Við drógum hana
af stað,“ segir hún.
Hulda segir þau systkinin fá
afnot af bátum Brokeyjar en mega
þau fara í þá þegar þeim hentar?
„Það er nú ekki alveg þannig en á
sumrin eru æfingar með þjálfur-
um alla daga þannig að við fáum
alveg að sigla nóg. Við vorum svo
heppin bæði í fyrrasumar og núna
að fá vinnu í Siglunesi og þá vorum
við að sigla frá níu til fjögur með
litlum krökkum og fórum svo
beint á æfingar á eftir, líka í Naut-
hólsvíkinni, þannig að þetta hafa
verið mikil siglingasumur. Það
er skemmtilegt að geta unnið við
áhugamálið sitt.“
En skyldi alltaf vera hægt að
sigla. Fer það ekki eftir veðri?
„Jú, maður vill helst hafa sól og
strekkingsvind. Á sunnudaginn
vorum við í um 12 metrum á sek-
úndu og það gekk mjög vel. Ég held
það væri gaman að vera í stífari
vindi og líka í meiri öldum.“
Hulda er greinilega á góðu
skriði í siglingunum enda sér hún
jafnvel fyrir sér að geta starfað við
þær í framtíðinni. „Það eru sigl-
ingaklúbbar um allt land og eng-
inn skortur á áhugasömum krökk-
um sem eru tilbúnir til að læra,“
segir hún. „Þannig að alltaf er eft-
irspurn eftir góðum þjálfurum.“
- gun
Enn meira gaman að vera
í stífari vindi og öldum
Hulda Lilja varð Íslandsmeistari í siglingum á Topper Topas bát, ásamt Hilmari bróður sínum. Fyrir aftan hana sést í eina kven-
siglarann á Laser, Lilju Gísladóttur. MYND/RÚNAR ÞÓR BJÖRNSSON
Menningarnótt