Fréttablaðið - 02.11.2010, Blaðsíða 46

30 2. nóvember 2010 ÞRIÐJUDAGUR
MORGUNMATURINN
„Ég fæ mér hafragraut alla
morgna og set undanrennu út
á.“
Þórunn Lárusdóttir leikkona
„Við munum taka skiltið niður,“ segir Ómar Geir
Þorgeirsson, formaður knattspyrnudeildar HK.
Stórt og mikið flettiskilti blasir við ökumönnum
þegar keyrt er inn í Kópavoginn. Á því er merki
HK og fullyrt að það sé aðeins eitt stórveldi í Kópa-
vogi. Athyglisverð fullyrðing þegar HK er í fyrstu
deild en erkifjendurnir í Breiðabliki eru nýbúnir að
landa fyrsta Íslandsmeistaratitlinum í knattspyrnu
karla.
„Skiltið fór upp þegar við vorum enn þá í úrvals-
deildinni fyrir nokkrum árum en þar sem það varð
endurnýjun í stjórn knattspyrnudeildarinnar er
þetta bara eitt af þeim verkefnum sem eftir á að
fara í,“ bætir Ómar við. Eins og margir ættu að vita
eru erkifjendurnir í Breiðabliki ríkjandi Íslands-
meistarar í meistaraflokki karla og því hafa ein-
hverjir sett spurningarmerki við Stórveldisskiltið.
„Mér finnst þetta ekkert vandræðalegt. Blikarnir
setja bara viðmið og við verðum að eltast við það.
En skiltið mun einhvern tímann fara upp aftur,“
segir Ómar og hlær, en HK lenti í 8. sæti í fyrstu
deildinni í sumar.
Einar Kristján Jónsson, formaður knattspyrnu-
deildar Breiðabliks, setur enga pressu á HK-inga.
„Mér finnst bara gott ef félögin geta haft húmor sín
á milli. Ef þeir auglýsa að það sé bara eitt stórveldi
í Kópavogi, þá er það bara af hinu góða.“ - ka
Stórveldisdraumar á hilluna
EKKI LENGUR EITT STÓRVELDI Í KÓPAVOGI Knattspyrnudeild
HK ætlar að fjarlægja flettiskiltið en formaðurinn hefur fulla
trú á því að það verði sett upp aftur. FRÉTTABLAÐIÐ/VILHELM
Sverrir Guðnason, sjónvarpsleik-
ari frá Svíþjóð, mun leika stórt
hlutverk í fjögurra þátta sjón-
varpsseríu sem byggð er á bók
Árna Þórarinssonar, Tíma nornar-
innar. Sverrir hefur getið sér gott
orð fyrir leik sinn sem Pontus í
Wallander-sjónvarpsmyndunum
en þær hafa verið sýndar á RÚV
við miklar vinsældir. Að sögn
Guðrúnar Eddu Þórhannesdóttur,
framleiðanda þáttaraðanna, verð-
ur sjónvarpsserían sýnd í norska,
sænska og finnska ríkissjónvarp-
inu auk RÚV og þá er verið að
ganga frá dreifingarsamningum
við aðrar sjónvarpsstöðvar.
Tími nornarinnar var á sínum
tíma sett upp í Útvarpsleikhús-
inu og mun Hjálmar Hjálmarsson,
bæjarfulltrúi Næstbesta flokks-
ins, endurtaka hlutverk sitt sem
Einar blaðamaður. Tökurnar fara
að mestu leyti fram fyrir norð-
an. „Leiðin liggur meðal annars í
Skagafjörð og við endum síðan á
Akureyri,“ segir Guðrún en fjöldi
ungra leikara kemur við sögu í
þáttunum. Nægir þar að nefna
Þóri Sæmundsson, Einar Aðal-
steinsson, Ísgerði Elfu Gunnars-
dóttur og Kára Viðarsson. Guðrún
segir jafnframt að reynsluboltum
á borð við Örn Árnason og Maríu
Ellingsen muni bregða fyrir í
þáttunum.
Ari Kristinsson verður töku-
maður sjónvarpsþáttanna en fyrsti
þáttur fer væntanlega í loftið í byrj-
un mars.„Við verðum í
tökum fram í byrjun
janúar, tökum okkur
smá jólafrí,“ segir
Guðrún, sem reikn-
ar með því að höfund-
urinn sjálfur, Árni
Þórarinsson, muni
mæta á tökustaðinn
og skoða aðstæður.
„Hann hefur fylgst
mjög vel frá upphafi
og ég geri ráð fyrir
því að það muni
halda áfram.“
Friðrik Þór fær Wallander-leikara
KEMUR TIL ÍSLANDS Sverrir Guðna-
son hefur aðallega leikið í sænsk-
um kvikmyndum og sjónvarpsþátt-
um en kemur til Íslands og leikur
í spennuþáttaröðinni Tíma nornar-
innar eftir Friðrik Þór. Að sögn
Guðrúnar Eddu Þórhannesdóttur
verður þáttaröðin sýnd í sænska,
norska og finnska ríkissjónvarpinu.
„Þetta er stóra stökkið og stórtíð-
indi fyrir hið bolvíska samfélag.
Allavega hoppaði konan mín hæð
sína af kæti,“ segir Guðmund-
ur Gunnarsson sjónvarpsmaður.
Hann verður annar af kynnum
í söngvakeppni Sjónvarpsins en
Ragnhildur Steinunn mun snúa
aftur á skjáinn eftir fæðingar-
orlof sitt og stýra keppninni af
sinni alkunnu snilld með honum.
Guðmundur vakti fyrst athygli
fyrir skemmtileg innslög frá
landsbyggðinni í fréttatímum
Sjónvarpsins en hann hefur að
undanförnu verið að gera þættina
Á meðan ég man þar sem gam-
alt efni úr safni Ríkissjónvarps-
ins er í aðalhlutverki. Guðmund-
ur segist gera sér vel grein fyrir
því út í hvaða hákarlalaug hann
sé að stökkva, söngvakeppnin sé
stór hluti af íslenskri sjónvarps-
menningu enda fylgist rúmlega
helmingur þjóðarinnar allajafna
með.
„Það koma allir til með að hafa
skoðanir á því hvernig maður
segir hlutina og ekki síst í hverju
maður er í útsendingu,“ segir
Guðmundur en eins og frægt er
orðið hellti fagstjóri fatahönn-
unardeildar LHÍ sér yfir þær
Evu Maríu og Ragnhildi Stein-
unni í fyrra og gagnrýndi þær
harðlega fyrir klæðaburð sinn
í úrslitaþættinum. Guðmundur
segist ekki hræðast slíkar skeyta-
sendingar en bætir því við að það
verði gott að hafa vana mann-
eskju sér við hlið. Sjónvarpsmað-
urinn fer að hlæja þegar hann er
spurður hvort hann sé ekki hrein-
lega næsti „Gísli Einarsson“, sjón-
varpsstjarna landsbyggðarinn-
ar, en sá vinsæli sjónvarpsmaður
var einmitt einnig kynnir við hlið
Ragnhildar Steinunnar fyrir daga
Evu Maríu. „Ég er allavega ekki
jafn frýnilegur og Eva,“ segir
Guðmundur af mikilli hógværð.
Guðmundur á sér sitt uppá-
haldslag sem er Lífið er lag með
hljómsveitinni Módel. Hann viður-
kennir hins vegar að hann sé
svona laumuaðdáandi, ólíkt syni
sínum sem sé einhver harðasti
Eurovision-aðdáandi sem sögur
fari af. „Og hann verður örugg-
lega mjög sáttur, ég verð eigin-
lega að hringja í hann og segja
honum frá þessu.“
freyrgigja@frettabladid.is
GUÐMUNDUR GUNNARSSON: NÝR KYNNIR Í SÖNGVAKEPPNINNI
Verður gott að hafa Ragn-
hildi Steinunni sér við hlið
Í STAÐ EVU MARÍU
Guðmundur Gunnarsson mun
taka sér stöðu við hlið Ragnhildar
Steinunnar þegar söngvakeppni
Sjónvarpsins hefur göngu sína og
kynna til leiks þau lög sem keppa
um að verða framlag Íslands til
Eurovision.