Fréttablaðið - 19.05.2012, Síða 101

LAUGARDAGUR 19. maí 2012 65
EVA HERZIGOVA Í
DOLCE & GABBANA
LANA DEL REY Í
ALBERTA FERRETTI
JESSICA CHASTAIN
Í ALEXANDER MCQUEEN
JANE FONDA Í
ATELIRE VERSACE
Bíó ★ ★★★★
The Dictator
Leikstjórn: Larry Charles
Leikarar: Sacha Baron Cohen, Ben Kingsley, Jason Mantzoukas, Anna
Faris, J. B. Smoove, Megan Fox, John C. Reilly, B. J. Novak
Starað í poppið
Eitt það versta sem hægt er að vera
sakaður um er húmorsleysi. Að fatta
ekki brandara er svo niðurlægjandi að
við gerum okkur frekar upp hlátur en
að biðja um útskýringu. Undirritaður
vill koma því á framfæri við lesendur
að hann glímir ekki við húmorsleysi og
þykir meira að segja nokkuð liðtækur
sprellari þegar sá gállinn er á honum.
Annar liðtækur sprellari, sem öfugt við
undirritaðan hefur náð heimsfrægð fyrir
uppátæki sín, er Sacha Baron Cohen.
Þessi breski grínisti hefur lengi stundað
loftfimleika á siðferðislínunni og reynir nú að toppa fyrri fígúrur sínar sem
einræðisherrann Aladeen í kvikmyndinni The Dictator.
Einræðisherrar eru oftast jafn hlægilegir og þeir eru hættulegir og fram-
sækinn og hugrakkur listamaður á borð við Baron Cohen ætti ekki að eiga í
neinum vandræðum með að búa til sprenghlægilega en jafnframt hárbeitta
ádeilu úr hráefninu. Allt kemur þó fyrir ekki og eftir stendur vandræðalegur
rembingur sem virðist þjóna þeim eina tilgangi að ögra pólitískri réttsýni og
brjóta sem flest tabú. Drepfyndin bíómynd með áhorfendaskarann á sínu
bandi kemst upp með hvaða ósóma sem er. Ófyndin mynd sem reynir að
komast upp með nauðgunarbrandara (ítrekað) fær mann til að svitna á
bakinu og stara ofan í poppið.
Hvað fór úrskeiðis hjá þessum hæfileikaríka grínara? Borat var ósmekk-
leg frá upphafi til enda en var þrátt fyrir það hryllilega fyndin. Brüno olli
vissulega vonbrigðum en í The Dictator gengur ekkert upp. Spaugið er límt
saman með lélegu handriti, Baron Cohen virðist hafa misst allt skynbragð á
framsetningu grínsins, enginn aukaleikaranna nær að láta ljós sitt skína og
allra verst er ósannfærandi og flöt mótleikkonan, Anna Faris.
Í lok myndarinnar örlar þó á smá broddi í samfélagsrýninni, en eftir allt
sem á undan hefur gengið er áhorfandinn lítt móttækilegur fyrir pólitískum
predikunum. En enginn vill láta hanka sig á húmorsleysinu og jafnvel verra
er að vera sakaður um óhóflega pólitíska réttsýni. Ég reyndi hvað ég gat að
kreista fram meðvirknishlátur yfir mislukkuðum bröndurum um kvenfyrir-
litningu, barnamisnotkun og sjálfsmorðssprengingar, en allir sáu í gegnum
mig. Mér fannst The Dictator ekkert fyndin. Haukur Viðar Alfreðsson
Niðurstaða: Sacha reynir að taka allt og alla í gegn. Ferill hans sem grínisti
er næstur á dagskrá.
VANDRÆÐALEGT Rembingurinn í
Sacha Baron Cohen virðist þjóna
þeim eina tilgangi að ögra pólitískri
réttsýni og brjóta sem flest tabú.