Morgunblaðið - 07.05.2013, Side 4

4 FRÉTTIRInnlent
MORGUNBLAÐIÐ ÞRIÐJUDAGUR 7. MAÍ 2013
Skapti Hallgrímsson
skapti@mbl.is
Gífurlegt fannfergi er víða á Norð-
urlandi og hefur verið allar götur
síðan í október. Hvorki var að sjá í
Skíðadal í Eyjafirði né í Fljótum í
gær að komið væri fram í maí og
sömu sögu er að segja úr sveitunum
austan Akureyrar; allt á kafi í snjó
og ekki hægt að setja lömb út úr
húsi. Næsta víst er að kal verður
víða í túnum þegar þau koma loks
undan snjó.
Mokað var að Þrasastöðum,
innsta bæ í Fljótum, í fyrradag en
strax í gærmorgun var orðið kol-
ófært. Um nóttina snjóaði á milli 30
og 40 cm. Á sunnudaginn var líka
mokað frá útihúsum við Þrasastaði
og frá heyrúllum, svo Jón Elvar
bóndi kæmist að þeim. „Ég sé ekki
einn einasta girðingarstaur. Ég geri
ráð fyrir að jafnfallinn snjór hér sé
að meðaltali um 180 sentimetrar,“
sagði Jón við Morgunblaðið. Sauð-
burður er hálfnaður hjá honum en
ekki hægt að hleypa neinni skepnu
út eins og nærri má geta.
Á Brúnastöðum í Fljótum eru um
800 fjár á fóðrum og von á tæplega
1.400 lömbum. Um 100 ær eru
bornar en allar skepnur enn á húsi.
Við útihúsin er engu líkara en
steyptur hafi verið himinhár veggur
og málaður hvítur – svo hár og þétt-
ur er skaflinn eftir veturinn, en
Siglufjarðarvegur raunar nánast
auður nokkrum metrum frá, en
skaflinn er gott dæmi um fann-
fergið í vetur.
Þorsteinn Jónsson á Helgustöð-
um, örlítið innar í Fljótunum, prísar
sig sælan að einungis þrjár ær eru
bornar hjá honum af 400, en Þor-
steinn og Guðrún Halldórsdóttir
eiga von á 700 lömbum. „Það byrj-
aði að snjóa í september og eftir
vont hríðarskot seint í október hef-
ur aldrei tekið upp. Þá komu allar
skepnur á gjöf, hrossin líka, og hafa
verið síðan. Engin skepna hefur
verið úti fram á þennan dag.“
Þorsteinn bendir á að ástandið
hafi ekki verið jafn slæmt í rúman
áratug. „En 1995 var reyndar
miklu, miklu meiri snjór. Þá settum
við ekki kindur út fyrr en um miðj-
an júní, nema rétt í kringum húsin.“
Þorsteinn er fæddur og uppalinn
á Helgustöðum og tók við búskap af
foreldrum sínum 1967. „Ég á ekki
von á að mikill klaki sé undir snjón-
um eða skemmd tún. Við sleppum
yfirleitt vel hér í sveit. En auðvitað
er maður aldrei öruggur.“
Þorsteinn og Guðrún segjast
bjartsýn og spáð sé heldur hlýn-
andi. „Það hefur alltaf komið sumar
á endanum. Bara missnemma!“ seg-
ir Guðrún á Helgustöðum.
Sumarið kemur á endanum!
 Gríðarlegur snjór í sveitum norðanlands  Mokað í fyrradag – ófært í gær  Skepnur í Fljótum
voru teknar á hús í október og hafa verið á fóðrum síðan  Ekki verið svona mikill snjór síðan 1995
Morgunblaðið/Skapti Hallgrímsson
Gangnagerð í Skíðadal
Bændur í Skíðadal í Eyjafirði hafa ekki farið varhluta af snjó. Þar eru allar skepnur á húsi sem annars staðar og ljóst að hefðbundin vorverk eins og girð-
ingavinna eru ekki á næstu grösum. Óskar bóndi Gunnarsson á Dæli sýndi Morgunblaðinu í gær hvernig umhorfs er við sumarhús sem hann á á næstu jörð.
Innivera Þorsteinn Jónsson á Helgustöðum í fjárhúsi sínu í gær. Allar skepnur eru enn inni. Útivera Þorsteinn á Helgustöðum mokar heimreiðina svo drossía blaðamanns kæmist í hlað.
Yfir nótt Mokað við húsið í fyrradag, þetta var í gær. Tvílembd Ærin sú arna bar tveimur lömbum meðan Morgunblaðið staldraði við á Brúnastöðum.