Morgunblaðið - Sunnudagur - 07.07.2013, Síða 30

30 MORGUNBLAÐIÐ SUNNUDAGUR 7.7. 2013
Matur og drykkir
Þ
etta eru a.m.k. tíu tegundir sem við erum að
elda hérna. Við reynum að hafa þetta sem fjöl-
breyttast á hlaðborðinu, allt eftir því hvað fæst
ferskt þann daginn,“ segir Magnús léttur í
bragði, spurður út í fjölda fisktegunda sem matreiddar
eru á degi hverjum í Tjöruhúsinu.
Undanfarin tíu ár hafa Magnús, Ragnheiður og fjöl-
skylda staðið vaktina í Neðstakaupstað, þangað sem
fjöldi ferðamanna, innlendra sem erlendra, hefur lagt
leið sína. Liggur við að segja að Tjöruhúsið sé orðið að
skyldustoppi á Ísafirði, rétt eins og Gamla bakaríið og
önnur góð kennileiti, enda rómað hvívetna. Erlendar
ferðahandbækur og -síður, svo sem Lonely Planet,
TripAdvisor og aðrar, eru líka allar á sama máli og
mæla með að menn leggi leið sína niður í Neðsta-
kaupstað, eigi þeir leið um þessar slóðir.
Í hefðbundnu árferði er Tjöruhúsið opið frá því í maí
og fram í október. Vorið var hins vegar kalt í ár að
sögn Magnúsar og því var staðurinn opnaður síðar en
ella, enda í gömlu, óeinangruðu húsi. Það er þó langt í
frá að fólki verði þar kalt yfir sumartímann. Frá í júní
hefur verið mikill erill og oftar en ekki tvísetið á kvöld-
in.
Spurður um vinsælustu réttina í Tjöruhúsinu þessi
misserin segir Magnús steiktar gellur mjög vinsælar.
„Enda eru gellur ótrúlegur matur,“ bætir hann við.
Annars njóta hlýri, steinbítur og koli, nú þegar hann er
kominn í nægilega góð hold til átu, einnig mikilla vin-
sælda auk þess sem alltaf hægt er að ganga að hefð-
bundnari tegundum og réttum vísum, s.s. þorski, ýsu,
saltfiski í nokkrum útgáfum, plokkfiski og lúðu – þegar
hún fæst. „Að ógleymdum skötuselnum og ufsanum,
sem víða þykir herramannsmatur þótt við höfum
kannski ekki vanist honum hér,“ bætir vertinn við.
Það var auðsótt mál að biðja Magnús um uppskrift
fyrir Sunnudagsblað Morgunblaðsins þegar eftir því var
leitað. „Voða margir spyrja um uppskriftir hjá okkur og
það eru engin leyndarmál, við segjum frá öllu sem við
gerum,“ var svarað að bragði. Hann gefur hér upp-
skriftina að gellunum góðu, sem þróuð var af honum
sjálfum. Má bæta því við að mikið er lagt upp úr því að
nota íslenskt hráefni á borð við smjör og rjóma í Tjöru-
húsinu. „Enda er íslenska smjörið alveg frábært og við
teljum allt í lagi að fólk borði svona mat af og til,“
bætti hann kankvís við og sneri sér að pönnunum.
Gellurnar gómsætu tilbúnar á
einni af pönnunum frægu.
Ljósmynd/Halldór Sveinbjörnsson
GIRNILEGT SJÁVARFANG Í NEÐSTAKAUPSTAÐ
Tjöruhúsið svíkur engan
TJÖRUHÚSIÐ Í NEÐSTAKAUPSTAÐ Á ÍSAFIRÐI ER EINN BESTI VEITINGASTAÐUR Á ÍSLANDI AÐ MARGRA MATI. MAGNÚS HAUKSSON OG
RAGNHEIÐUR HALLDÓRSDÓTTIR, KONA HANS, RÁÐA ÞAR RÍKJUM. FERSKT SJÁVARFANG AF ÖLLUM GERÐUM ER ÞAR Í AÐALHLUTVERKI OG
HLAÐBORÐIÐ MEÐ STÓRU PÖNNUNUM ORÐIÐ VÍÐFRÆGT.
Gunnhildur Ásta Guðmundsdóttir gunnhildur@mbl.is
Hráefni:
200-250 gr á mann af gellum
Hveiti (til að velta upp úr)
Krydd (það sem finnst í skáp-
unum)
Pipar
Hvítlaukspipar eða -duft
1-3 msk hvítlauksolía
½ sítróna
Meðlæti:
Ferskar kartöflur – helst smælki
Salat (má sleppa)
Aðferð:
Hveiti er blandað með kryddi, þ.e. því
sem er til í skápnum, pipar o.s.frv.
Gellunum er velt upp úr krydduðu
hveitinu á sama tíma og hitaþolin mat-
arolía (ég notar repjuolíu) hitnar vel á
pönnu. Gellurnar eru settar á sjóð-
andi heita pönnuna og steiktar á sömu
hlið þar til þær eru orðnar vel dökkar.
Sáldrið smávegis hvítlaukspipar eða
-dufti nett yfir, rétt áður en þeim er
snúið yfir á hina hliðina.
Þegar búið er að snúa gellunum við
er hvítlauksolíu hellt nett yfir þær auk
þess sem ríflegri smjörklípu er bætt á
pönnuna. Gellunum er leyft að steikj-
ast þar til þær eru orðnar vel stökkar
og dökkar, án þess þó að brenna. Að
endingu er hálf sítróna kreist aðeins
yfir auk þess sem bæta má við örlitlu
hvítlauksdufti.
Best er að hafa smælki með og smá
salat ef vill.
HVÍTLAUKSGELLUR
TJÖRUHÚSSINS
Bekkirnir eru oftar en ekki þétt setnir yfir sumartímann
og því borðað bæði úti og inni á góðum dögum.
Magnús Hauksson og fjölskylda hafa staðið vaktina í Tjöruhúsinu undanfarin
10 sumur. Lítið lát er á vinsældum staðarins enda úrvalsfiskur á borðum.
Ljósmynd/Gústi.is