Morgunblaðið - 10.09.2014, Síða 12

12 FRÉTTIRInnlent
MORGUNBLAÐIÐ MIÐVIKUDAGUR 10. SEPTEMBER 2014
MOSFELLSBAKARÍ
Háholti 13-15 Mosfellsbæ | Háaleitisbraut 58-60 Reykjavík
s. 566 6145 | mosfellsbakari.is
Ert þú búin að prófa nýja
lágkolvetnabrauðið okkar?
Renndu við í Mosfellsbakarí og fáðu þér hollara brauð.
Flugáætlun millilandaflugs Ice-
landair Group fyrir árið 2015
verður sú stærsta í sögu félagsins
og um 12 prósent umfangsmeiri
en gert er ráð fyrir á þessu ári.
Verður hafið flug til tveggja nýrra
áfangastaða og ferðum fjölgað til
ýmissa borga í Norður-Ameríku
og Evrópu. Segir frá þessu í til-
kynningu Icelandair.
Er gert ráð fyrir að farþegar
verði um 2,9 milljónir á næsta ári,
en áætlað er að þeir verði um 2,6
milljónir á yfirstandandi ári. Alls
verða 23 Boeing 757 farþegaflug-
vélar nýttar til farþegaflugsins
næsta sumar, en það er tveimur
fleiri en á þessu ári.
Um 10.000 ferðir frá landinu
Frá árinu 2009 hefur leiðakerfi
félagsins meira en tvöfaldast að
umfangi og verða ferðir frá land-
inu um 10 þúsund á næsta ári.
Fyrir sex árum síðan voru þær
um 4.500 talsins. Þá voru farþegar
um 1,3 milljónir eða 45 prósent
þess fjölda sem gert er ráð fyrir á
næsta ári. Mun þessi vöxtur hafa í
för með sér áframhaldandi eflingu
ferðaþjónustunnar að því er fram
kemur í tilkynningu frá Iceland-
air.
Næsta sumar mun ferðum til
flestra áfangastaða félagsins
fjölga. Þannig verður bætt við 12
flugum vikulega bæði til Norður-
Ameríku og Evrópu, eða í heild 24
flugum, og farið úr 254 brott-
förum frá Keflavíkurflugvelli á
viku í alls 278 brottfarir fyrir há-
önnina næsta sumar.
Portland í Oregon-ríki í Banda-
ríkjunum og Birmingham á Bret-
landi bætast við sem nýir áfanga-
staðir, en ekki verður framhald á
flugi til St. Pétursborgar í Rúss-
landi. khj@mbl.is
Mikill vöxtur í milli-
landaflugi Icelandair
 Flugáætlun félagsins fyrir árið
2015 verður sú stærsta frá upphafi
Morgunblaðið/Ernir
Farþegaþota Ein af Boeing 757-
vélum í flugflota Icelandair á
Reykjavíkurflugvelli.
Kristján H. Johannessen
khj@mbl.is
„Það eru verulegar líkur á að við séum að
sjá fram á mjög stórtækar breytingar sem
eru stærri en við höfum séð á síðustu ára-
tugum,“ sagði Magnús Tumi Guðmundsson
jarðeðlisfræðingur í samtali við Morgun-
blaðið í gærkvöldi. Í máli sínu vísar hann til
þess mikla sigs sem orðið hefur í öskju
Bárðarbungu, en það mælist um 20 metrar.
Stærri atburðir ekki útilokaðir
Spurður hvort öskjusig sé ekki verulegt
áhyggjuefni kveður Magnús Tumi já við.
„Ef það herðir á því getur það framkallað
mun stærra gos en við erum með núna [eld-
gosið í Holuhrauni]. Það gæti orðið til þess
að sprungan lengist, gosið magnist og nái
undir jökul. Það er ekki hægt að útiloka
slíkt. Svo gæti það einnig orðið til þess að
það komi upp gos í sjálfri Bárðarbungu,“
segir hann.
Spurður hvort vísindamenn hafi áður orð-
ið vitni að viðlíka öskjusigi og nú er í gangi
svarar Magnús Tumi: „Árið 1875 varð stórt
sprengigos í Öskju [í Dyngjufjöllum] sem
sendi vikur yfir Austurland, Jökuldal og
Vopnafjörð. Við eigum þó ekki von á því að
það sé endilega að fara að gerast núna. En
ef það er hreyfing á öskjubrotinu vegna
þess að kvika er að sleppa undan, þá eru
vissar líkur á því að kvikan leiti upp í sjálfa
öskjuna eða þá að það hraði á ferlinu og
stærra gos opnist utan jökulsins.“
Hópur vísindamanna hefur að undanförnu
haft aðsetur í skálanum Dreka, sem stendur
skammt frá Öskju í Dyngjufjöllum, og hefur
hann fylgst grannt með framvindu eldgoss-
ins í Holuhrauni. Í hópnum er eldfjallafræð-
ingurinn Ármann Höskuldsson en hann seg-
ir nú orðið dautt í norðurgígnum. „Það sést
engin glóð í honum lengur. Í suðurgígnum
er gutlandi hrauntjörn og upp úr miðjugígn-
um standa fjórir til fimm strókar,“ segir
hann.
Eldgosið ekki jafn útbreitt
Spurður hversu hátt strókarnir teygja sig
til himins svarar Ármann: „Þeir fara svona
140 metra upp í loftið. Þeir eru nú orðnir
einangraðri en áður því það er ekki sama
samfella og var í síðustu viku þegar þetta
var eitt stórt eldtjald.“
Spurður hvort dregið hafi úr krafti goss-
ins í Holuhrauni svarar Ármann: „Það er
minni kraftur og flæði því það er dautt í
norðurgígnum.“ Bendir hann hins vegar á
að það þýði ekki að gosið í Holuhrauni sé í
rénun því umbrotin geta hæglega rifið sig
upp aftur. „Upplýsingar úr GPS-mælingum
sýna að þetta er ekki farið að ganga sam-
an,“ segir Ármann.
Getur kallað fram stærra gos
 Askjan í Bárðarbungu hefur sigið um 20 metra  Gosstrókarnir í Holu-
hrauni ná nú 140 metra hæð  Gutlandi hrauntjörn er í suðurgígnum
Ljósmynd/William Moreland Jarðvísindastofnun
Eldgos Við gosstöðvarnar í Holuhrauni blasir mikið sjónarspil við þeim jarðvísindamönnum sem þar eru að störfum. Tignarlegir strókarnir teygja sig af miklum krafti 140 metra upp í loftið.
„Þessir stóru skjálftar halda áfram í Bárðar-
bungu og gosið í Holuhrauni er enn í gangi.
Það hefur því ekkert dregið úr þessari at-
burðarás,“ segir Víðir Reynisson, deildarstjóri
almannavarnadeildar ríkislögreglustjóra, og
bætir við að hann hafi nú orðið miklar áhyggj-
ur af þeim tíðindum sem berast frá Bárðar-
bungu. Hefur askjan þar sigið um 20 m.
„Inni í okkar sviðsmyndum höfum við haft
eldgos í sjálfri Bárðarbungu og þær hreyfing-
ar sem mældar hafa verið sýna að það er meiri
hætta á því en við töldum í upphafi.“
Komi upp eldgos undir jökli segir Víðir
fyrstu skref almannavarna vera að staðsetja
gosið með nákvæmum hætti. Dragist það hins
vegar á langinn mun þurfa að grípa til um-
fangsmikilla rýmingaraðgerða. Undirbúnar
hafa verið rýmingar á svæðum vegna flóða í
Jökulsá á Fjöllum, Skjálfandafljóti og á Skeið-
arársandi auk þess sem almannavarnir hafa
nú farið yfir aðgerðaáætlun með fulltrúum
Landsvirkjunar streymi mikið magn vatns inn
á virkjunarsvæði.
Umfangsmiklar rýmingar?