Fréttablaðið - 22.10.2013, Blaðsíða 6

22. október 2013 ÞRIÐJUDAGUR| FRÉTTIR |
HANDTEKINN TVÍVEGIS Gunnsteinn Ólafsson var
handtekinn tvívegis í gær. Hér er hann handtekinn fyrir
hádegi. Hann sneri aftur á svæðið eftir hádegi ásamt
níu manns og voru allir handteknir aftur. Þeim var ekki
sleppt fyrr en skömmu fyrir klukkan sex síðdegis í gær.
GÆTA GRÖFUNNAR Lögreglumennirnir voru á
fimmta tug, en um var að ræða sérstaka aðgerðasveit
lögreglu sem fer með svokallaða mannfjöldastjórnun.
Þarna má sjá lögreglumann gæta gröfunnar sem átti
eftir að vinna sína vinnu eftir handtökuna.
VONT SIÐFERÐI „Siðferðið hjá þessum mönnum er virkilega þannig að þeir ætla
að eyðileggja eins mikið og þeir geta. Þetta er eins og leifturstríð, þar sem þeir ana
áfram og gefa ekki gaum að því sem er löglegt,“ sagði fjölmiðlamaðurinn Ómar
Ragnarsson skömmu eftir að hann var látinn laus úr haldi lögreglunnar í gærdag.
FORN SIÐUR Níðstöng var reist í hrauninu í gær með steinbítshöfði. Að reisa níð-
stöng er forn siður þar sem sá sem reisir stöngina leggur bölvun á einhvern. Í sögu
Egils Skalla-Grímssonar er sagt frá því þegar Egill reisti níðstöng í Noregi til þess að
rugla landvættir í ríminu og koma þeim til þess að hrekja Eirík konung blóðöx og
Gunnhildi drottningu frá völdum í Noregi, en þau höfðu brotið á rétti Egils.
„Þetta er lúalegt, bara lúalegt“
Hátt í þrjátíu mótmælendur voru handteknir í Gálgahrauni í gærdag. Þá voru níu manns handteknir tvívegis.
Sérstakur aðgerðahópur lögreglu sá um handtökurnar en hátt í fimmtíu lögregluþjónar handtóku hópinn.
Gunnar V. Andrésson, ljósmyndari Fréttablaðsins, fylgdist með handtökunum og festi á filmu.
NÁTTÚRUVERND „Við erum sár og
gröm yfir þessu,“ svaraði Gunn-
steinn Ólafsson, einn af for-
svarsmönnum Hraunavina, eftir
að honum var sleppt úr haldi lög-
reglunnar skömmu fyrir klukk-
an sex í gærkvöldi. Hann ásamt
hópi fólks var handtekinn á ný af
aðgerðarsveit lögreglu skömmu
eftir að hópurinn sneri aftur í
Gálgahraun í gær. Alls voru 25
handteknir. Meðal þeirra var
Ómar Ragnarsson.
„Ég sat bara þarna og hreyfði
mig ekki neitt, en núna er ég í lög-
reglubíl á leið í Steininn,“ sagði
náttúruverndarsinninn Ómar í
samtali við Vísi í gær en mótmæl-
in voru friðsamleg.
Að sögn Gunnsteins verða
hann og líklega fleiri í seinni
hópnum ákærðir fyrir brot gegn
valdstjórninni.
Aðspurður hvernig hann hafi
það svarar hann: „Það líður engum
vel að vera settur í fangelsi fyrir
að standa vörð um landið sitt.
Þetta er lúalegt, bara lúalegt.“
Gunnsteinn segist ekki geta
svarað fyrir aðra, en býst sjálf-
ur við að halda áfram mótmæl-
um í Gálgahrauni. „Það hafa
engar ákvarðanir verið teknar,
en við munum reyna að halda
lögreglunni upptekinni næstu
mánuðina,“ segir Gunnsteinn.
Eins og fram hefur komið hafa
Hraunavinir, samtök sem berjast
gegn framkvæmdum í hrauninu,
kært framkvæmdina. Engin niður-
staða liggur fyrir í dómsmálinu.
valur@frettabladid.is
FYLGIST MEÐ Fyrrverandi umhverfisráðherra, Eiður
Svanberg Guðnason, fylgist með handtökum. Hann
skrifaði á heimasíðu sína um handtökurnar: „Við búum
greinilega ekki í réttarríki heldur lögregluríki […]“
09.00 Mótmælendur stöðva
framkvæmdir
09.30 Handtökur hefjast
11.30 Handtökum lýkur
14.00 Hluti mótmælenda snýr
aftur
14.30 Handtökur hefjast á ný
15.00 Mótmælendur í yfir-
heyrslum
18.00 Mótmælendum sleppt
➜ Atburðarásin
Í tilkynningu sem birtist á vef
Vegagerðarinnar í gær kom
fram að framkvæmdum yrði
ekki slegið á frest á meðan
dómsmál gengur í gegn vegna
málsins. Meðal annars vegna
þess að endanleg niðurstaða
í málinu lægi líklega ekki fyrir
fyrr en eftir tvö ár. Svo segir
orðrétt í tilkynningunni: „Fari
svo ólíklega að það mál tapist
hefur ekki komið annað fram
hjá Garðabæ en að farið yrði á
ný í umhverfismat og ekki við
öðru að búast en að niðurstaða
þess yrði sú sama og fyrri mata
á umhverfisáhrifum og yrði þá
á ný gefið út framkvæmdaleyfi
fyrir lagningu nýs Álftanesvegar.
Þannig að allar tafir fresta
einungis lagningu nýr Álftanes-
vegar en koma ekki í veg fyrir
að hann verði lagður.“
- vg
➜ Dómsmál fresta að-
eins framkvæmdum
„Ef ég fengi því ráðið, myndi ég
bíða eftir dómi í málinu,“ segir
Sigurður Líndal lagaprófessor
um aðgerðirnar í Gálgahrauni
og dómsmál sem Hraunavinir
reka gegn Vegagerðinni fyrir
Héraðsdómi Reykjavíkur. Sig-
urður segir að í málinu séu ýmis
vafamál og því farsælast að
bíða eftir niðurstöðu dómstóla,
þannig að það sé alveg á hreinu
hvað sé heimilt og hvað ekki.
Katrín Oddsdóttir héraðs-
dómslögmaður tekur undir
þessi orð Sigurðar. „Það er full-
komlega eðlilegt að það sé beð-
ið eftir niðurstöðu dómstóla,“
segir hún um framkvæmdina.
Katrín minnir á Árósasamning-
inn, sem Íslendingar undirrituðu
fyrir fimmtán árum. Samkvæmt
honum á almenningur rétt á
því að láta reyna á réttmæti
aðgerða sem varða náttúruna. Á
Íslandi virðist slíkt ekki reynast í
framkvæmd þar sem dómstólar
hafa ítrekað dæmt að fólk sem
höfðar slík mál eigi ekki lög-
varða hagsmuni, segir hún.
„Það er ekki gott að það sé
búið að útiloka að náttúran eigi
sér einhverja talsmenn sem vilji
vernda hana,“ segir Katrín.
- hrs
➜ Lögfræðingar
vilja bíða
6
LÖGREGLUAÐGERÐIR Í GÁLGAHRAUNI