Fréttablaðið - 01.05.2014, Qupperneq 8

1. maí 2014 FIMMTUDAGUR| FRÉTTIR | 8
STJÓRNSÝSLA „Ég, veiðiþjófur-
inn, ætla að leggja hérna nokkur
orð í belg,“ segir Einar S. Ólafs-
son stangveiðimaður sem kærð-
ur hefur verið af þjóðgarðinum á
Þingvöllum fyrir veiðar og dráp á
urriða í vatninu.
Setningin að ofan er upphaf
greinar Einars sem birtist á Vísi
í dag. Einar kveðst þar fljótlega
hafa verið viss um að fleira hafi
hangið á spýtunni hjá þjóðgarðs-
verði á Þingvöllum en að kæra
veiðimann með nokkra urriða.
„Enda kom í ljós að í kæru lög-
fræðings Þingvallanefndar, þar
sem ég er kærður fyrir „meintar
ólöglegar veiðar“, er setning sem
er forsenda kærunnar og afhjúp-
ar raunverulegan tilgang hennar,
að ég tel. Setningin er eitthvað á
þessa leið að lögmaður Þingvalla-
nefndar efast um lögmæti veiði-
leyfasölu Kárastaða í Þingvalla-
sveit. Á íslensku: Þingvallanefnd
ásælist veiðirétt ábúenda á Kára-
stöðum,“ skrifar Einar.
Til að skýra málið segir Einar að
samkvæmt laxveiðilögum séu lax-
veiðar í sjó bannaðar nema á lög-
býlum sem hafa hlunnindi af slík-
um veiðum og skapast hafi hefð
fyrir. Því sé hefð fyrir hlunninda-
veiðum sterkari en lögin. Því verði
erfitt að finna dómara sem dæmir
veiðirétt í Þingvallavatni af Kára-
stöðum. Sú jörð er í eigu ríkisins
og hefur öll verið innan þjóðgarðs-
ins frá árinu 2004 en er leigð til
ábúanda.
„Hér er, með óttalega subbu-
legri stjórnsýslu, verið að reyna að
stækka áhrifasvæði sitt. Þjóðgarð-
svörður hefur látið út úr sér setn-
ingar sem allar bera þess keim að
til standi að víkka út tjaldhælana,
eins og: Ætli það sé ekki best að
kaupa upp netaveiðirétt bænda í
vatninu, og: Ef að það reynist rétt
að verið sé að drepa urriða veidd-
an í net og á stöng í stórum stíl í
vatninu, verður að bregðast við
því. Í báðum ofangreindum setn-
ingum talar hann eins og sá sem
valdið hefur,“ segir Einar og brýn-
ir fyrir jarðeigendum við vatnið að
standa saman.
„Land þjóðgarðsins, það land
sem þjóðgarðurinn raunverulega
á, er einungis lítill hluti af því
landsvæði sem að vatninu liggur
og er það einlæg ráðlegging mín til
allra sem eiga hagsmuna að gæta,
að spyrna við því karlmannlega
fótum að áhrif þjóðgarðsmanna
verði meiri við vatnið en sem
nemur því hlutfalli,” segir Einar
í grein sinni sem lesa má á Vísi.
Ólafur Örn Haraldsson þjóð-
garðsvörður og Sigrún Magnús-
dóttir, formaður Þingvallanefnd-
ar, hafa ekki svarað fyrirspurnum
Fréttablaðsins varðandi þetta mál.
gar@frettabladid.is
Veiðimaður segir þjóðgarð
reka subbulega stjórnsýslu
Veiðimaðurinn sem þjóðgarðurinn á Þingvöllum kærði fyrir urriðadráp segir að tilgangurinn sé að sölsa undir
sig veiðiréttindi á Kárastöðum. Hann skorar á hagsmunaaðila við vatnið að spyrna „karlmannlega“ við fótum.
Á ÞINGVÖLLUM Kyrrðin í friðlandinu á Þingvöllum hefur verið rofin með deilum
um veiðirétt og veiðireglur við vatnið. FRÉTTABLAÐIÐ/PJETUR
SKÓLAMÁL Mennta- og menning-
armálaráðuneytið hefur ákveð-
ið að leggja sjóðnum Forriturum
framtíðarinnar lið með tveggja
milljóna króna styrk.
„Þetta er ákveðin viðurkenning
á okkar starfi og
erum við mjög
stolt af því að
ráðuneytið líti til
okkar sem afls
sem raunveru-
lega getur breytt
og haft áhrif á
hlutina,“ er í til-
kynningu haft
eftir Guðmundi
Tómasi Axelssyni, markaðsstjóra
RB og stjórnarmanni í Forriturum
framtíðarinnar.
Skólar og sveitarfélög geta sótt
um styrki úr sjóðnum til að efla
tæknikennslu og notkun tækni í
skólastarfi. - óká
Forritarar framtíðar fá styrk:
Tvær milljónir
reiddar fram
HEILBRIGÐISMÁL Ónæmi gegn
sýklalyfjum er að verða alvarleg
ógn við heilsufar fólks um heim
allan. Þetta fullyrðir Alþjóðaheil-
brigðisstofnunin í nýrri skýrslu.
Í henni er sagt frá því að búast
megi við því að sýklalyf verði
gagnslaus, þannig að fólk taki að
láta lífið af völdum einfaldra sýk-
inga sem auðvelt hefur verið að
lækna með sýklalyfjum síðustu
áratugina. Grípa þarf til afger-
andi aðgerða til að vinna á móti
þessu. - gb
Ónæmi ógnar heilsufari:
Sýklalyf gætu
orðið gagnslaus
ÚKRAÍNA, AP Úkraínustjórn viður-
kennir að her og lögreglulið lands-
ins geti lítið sem ekkert ráðið við
ástandið í austurhluta þess.
„Ég skal tala hreint út: Sem
stendur eru öryggissveitir ófær-
ar um að ná með skjótum hætti
tökum á ástandinu í Donetsk og
Luhansk,“ sagði Oleksandr Túrtsj-
ínov, sem til bráðabirgða gegnir
forsetaembætti Úkraínu.
„Öryggissveitirnar eru ófærar
um að sinna þeirri skyldu sinni
að vernda borgara landsins. Þær
standa ráðþrota gagnvart þessu.
Auk þess hafa sumar þessara
sveita ýmist veitt hryðjuverka-
samtökunum aðstoð eða verið í
samstarfi við þær.“
Aðskilnaðarsinnar í austan-
verðri Úkraínu hafa náð stjórn-
sýslubyggingum í flestum stærri
borgum á sitt vald. Úkraínustjórn
og leiðtogar á Vesturlöndum hafa
sakað Rússa um að hafa kynt undir
ólgunni og jafnvel aðstoðað upp-
reisnarmennina.
Rússar neita þessu og segja
stjórnina í Kænugarði bera alla
ábyrgð á ástandinu. - gb
Úkraínustjórn segist ráðalaus gagnvart ólgu:
Her og lögregla ráða
ekkert við ástandið
BROTIST INN Í LÖGREGLUSTÖÐ Uppreisnarmenn í borginni Luhansk náðu lög-
reglustöðinni þar á sitt vald á þriðjudag. NORDICPHOTOS/AFP
GUÐMUNDUR
T. AXELSSON
BANDARÍKIN
Íslendingur valdur að slysi
26 ára Íslendingur búsettur í Boca
Raton í Flórída var handtekinn í byrjun
vikunnar eftir að hafa ekið utan í mótor-
hjól sem tvímennt var á. Ökumaður og
farþegi féllu við og slösuðust nokkuð,
að því er fram kemur á fréttavef CBS12
í Flórída. Íslendingurinn, sem ók gráum
Hyundai Elantra-bíl, flúði af vettvangi en
var handtekinn síðar af lögreglu. Mann-
inum var sleppt úr fangelsi á þriðjudag
gegn 3.000 dollara tryggingu.
Nánar á dika.is
Ný og framsækin lögmannsstofa hefur starfsemi
sína að Engjateigi 5 í Reykjavík.
Lögmenn stofunnar hafa víðtæka reynslu
af málflutningi og lögfræðilegri ráðgjöf.

Boðið er upp á nýjungar í lögmannsþjónustu
á Íslandi, meðal annars fyrsta viðtal án endurgjalds
og skjalagerð á föstu verði.
Við opnum í dag
SJÁVARÚTVEGUR „Grásleppuvertíðin hefur, það
sem af er, gengið illa. Veiðin hefur verið mun
minni en í fyrra og þátttaka hefur einnig verið
minni,“ segir Örn Pálsson, framkvæmdastjóri
Landssambands smábátaeigenda.
Hann segir þennan minni áhuga aðallega
skýrast af því að verðið fyrir hrognin sem sé í
boði sé mjög lágt. „Þá telja menn að það svari
ekki kostnaði að fara af stað í veiðarnar.“ Örn
ímyndar sér þó að verðið muni hækka þegar
ljóst verður að framboð á hrognum verður mun
minna í ár en það var í fyrra. Veiðar Grænlend-
inga, sem eru sú þjóð sem veiðir á móti okkur og
veiddi mest í fyrra, fara einnig mjög illa af stað.
„Eins og staðan er í dag lítur út fyrir að það
verði mun minna framboð á grásleppuhrogn-
um á þessu ári, en hefur verið undanfarin ár.
Ég ætla að vona að það verði til þess að verðið
hækki og að karlarnir geti haft eitthvað upp
úr þessu,“ segir hann.
Veiðin hefur þó verið nokkuð góð það sem
af er á Ströndum og hafa grásleppuveiði-
menn sem róa frá Drangsnesi og Hólmavík
veitt vel.
Á heimasíðu Fiskistofu má sjá að veiðileyfi
162 báta hafa nú verið virkjuð. Í fyrra voru
gefin út 284 leyfi en á vertíðinni 2012 voru
þau 339 talsins. - skó
Grásleppuveiðar fara illa af stað á þessu ári, færri veiða og verð er mjög lágt en ástandið gæti skánað:
Lítið framboð gæti leitt til hærra verðs
ÖRN PÁLSSON framkvæmdastjóri Landssambands
smábátaeigenda.