Fréttablaðið - 10.05.2014, Side 10

10. maí 2014 LAUGARDAGUR| FRÉTTIR | 10
ÚKRAÍNA, AP Vladímír Pútín hafði
nóg að gera við að fylgjast með
hersýningum í gær, fyrst í Moskvu
og síðan í Sevastopol á Krímskaga.
Rússar og önnur fyrrverandi
Sovétlýðveldi héldu í gær upp á
Sigurdaginn, en 69 ár voru liðin
frá því að Sovétmenn unnu sigur
á Þjóðverjum í seinni heimsstyrj-
öldinni, eða „föðurlands stríðinu
mikla“ eins og Rússar nefna
jafnan þennan hildarleik.
Pútín fylgdist með hefðbund-
inni sýningu rússneska hersins á
Rauða torginu í Moskvu, en hélt
síðan strax til Krímskaga þar sem
sannkölluð þjóðhátíðarstemning
virtist ríkja. Fjöldi manns fylgdist
þar með hersýningu við höfn rúss-
neska Svartahafsflotans, og var
ákaft klappað þegar herþotur
flugu í röðum yfir hafnarsvæðið.
Bæði Úkraínustjórn og Atlants-
hafsbandalagið fordæmdu heim-
sókn Pútíns til Krímskaga,
fáeinum vikum eftir að Rússland
innlimaði skagann.
„Við teljum innlimun Krím-
skaga vera ólöglega, ólögmæta og
við viðurkennum hana ekki,“ sagði
Anders Fogh Rasmussen, fram-
kvæmdastjóri NATO, en hann var
staddur í Tallin í Eistlandi í gær.
„Við lítum enn svo á að Krímskagi
sé úkraínskt landsvæði og eftir
því sem ég best veit hafa úkra-
ínsk stjórnvöld ekki boðið Pútín í
heimsókn til Krímskaga, þannig
að samkvæmt því sjónarmiði er
heimsókn hans óviðeigandi.“
Í stuttri ræðu við höfnina í
Sevastopol óskaði Pútín hins vegar
íbúum skagans til hamingju með
að hafa ákveðið að sameinast
Rússlandi. Árið 2014 myndi hljóta
mikil vægan sess í sögu Krím-
skaga, sagði hann.
Á morgun stendur til að íbúar
í Donetsk og Luhansk, tveimur
héruðum í austanverðri Úkraínu,
greiði atkvæði um það hvort
héruðin eigi einnig að lýsa yfir
sjálfstæði, rétt eins og gert var á
Krímskaga í síðasta mánuði.
Bæði stjórnin í Kænugarði og
leiðtogar á Vesturlöndum hafa for-
dæmt þessar kosningar, og Pútín
Rússlandsforseti hvatti skipuleggj-
endur þeirra til að fresta þeim.
Í gær kostuðu svo hörð átök í
borginni Mariupol að minnsta
kosti þrjá lífið. Úkraínustjórn
fullyrti reyndar að allt að tuttugu
manns hefðu fallið.
Kveikt var í aðallögreglu-
stöð borgarinnar, en þarna voru
það uppreisnarmenn hliðhollir
Rússum sem tókust á við stjórnar-
herinn.
gudsteinn@frettabladid.is
Pútín fagnar
á Krímskaga
Þjóðhátíðarstemning virtist ríkja í Sevastopol á
Krímskaga í gær, þegar efnt var þar til hersýningar
í tilefni sigurs Sovétmanna á þýskum nasistum.
PÚTÍN Á KRÍMSKAGA Forseti Rússlands óskaði íbúum skagans til hamingju með
að hafa verið innlimaðir í Rússland. NORDICPHOTOS/AFP
ALÞINGI Stjórn og stjórnarandstaða hafa náð sam-
komulagi um að þingi verði slitið 16. maí næstkom-
andi líkt og gert er ráð fyrir í starfsáætlun þingsins.
Ein af kröfum stjórnarandstöðunnar var að ESB-
slitatillaga utanríkisráðherra kæmi ekki til umfjöll-
unar á yfirstandandi þingi.
Stjórnarmeirihlutinn gekk að því gegn því að
stjórnarandstaðan myndi ekki standa í vegi fyrir
stóru málum ríkisstjórnarinnar svo sem skulda-
lækkunarfrumvörpum og veiðigjaldafrumvarpinu.
Auk þessara stóru mála varð samkomulag um
að taka nokkur þingmannamál bæði frá stjórn og
stjórnarandstöðu til afgreiðslu fyrir þinghlé.
Hver afdrif umdeildrar slitatillögu utanríkisráð-
herra verða í framtíðinni er ekki ljóst.
Þingmál sem ekki hafa hlotið lokaafgreiðslu við
þinglok falla niður. Ætli utanríkisráðherra að koma
tillögunni aftur á dagskrá þingsins verður hann að
leggja hana aftur fyrir Alþingi á næsta þingi. Ráð-
herrann hefur ekki svarað því af eða á hvort hann
ætli að gera það. - jme

Náðst hefur samkomulag um að ESB-slitatillagan verði ekki tekin á dagskrá:
Samkomulag um þinglok í höfn
SUMARFRÍ Stjórn og stjórnarandstaða hafa náð samkomu-
lagi um að þingið fari í sumarfrí um miðjan þennan mánuð.
FRÉTTABLAÐIÐ/GVA
ÍSRAEL Heimsókn Frans páfa til Ísraels og Palestínu
24. til 26. maí verður sú fyrsta síðan hann tók við
embætti fyrir rúmu ári. Páfinn ætlar meðal annars
að hitta palestínska og sýrlenska flóttamenn og skoða
Yad Vashem-minnisvarðann um gyðingana sem voru
drepnir í helförinni.
Með heimsókninni vill hann sýna velvild sína í
garð rétttrúnaðarkirkjunnar sem klauf sig frá kaþ-
ólsku kirkjunni í Róm fyrir eitt þúsund árum. Hann
mun messa með Bartholomeusi I, patríarka rétttrún-
aðarkirkjunnar, í Grafarkirkjunni þar sem Jesús er
sagður hafa verið grafinn eftir krossfestinguna. Páf-
inn vill einnig hvetja til friðar á milli Ísraela og Pal-
estínumanna. Hittir hann forseta beggja landanna
í heimsókninni, þá Símon Peres, forseta Ísraels, og
Mamúd Abbas, forseta Palestínu.
Frans mun jafnframt skoða Grátmúrinn, heilagasta
stað gyðinga, og messa í Cenacle þar sem talið er að
síðasta kvöldmáltíðin hafi verið haldin. - fb
Frans páfi heimsækir Ísrael og Palestínu í fyrsta sinn í lok mánaðarins:
Vill reyna að hvetja til friðar
FJARSKIPTI Stefán Sigurðsson var
ráðinn forstjóri Vodafone í gær.
Stjórnarformaður fyrirtækisins
segir ráðninguna hafa haft stuttan
aðdraganda og að stjórnin hafi verið
einhuga um hana.
„Þetta var samkomulag stjórnar
og fráfarandi forstjóra um að breyta
til. Það var algjör einhugur innan
stjórnarinnar og þetta er allt gert í
góðri sátt allra aðila,“ segir Heiðar
Már Guðjónsson, stjórnarfor maður
Vodafone (Fjarskipta hf.). Hann
segir engar ákveðnar áherslubreyt-
ingar fylgja ráðningunni. „Einungis
að efla fyrirtækið og vinna því sem
mestan framgang,“ segir Heiðar.
Stefán starfaði áður sem fram-
kvæmdastjóri eignastýringar
Íslandsbanka og hann segist taka
við góðu búi. „Hins vegar er maður
alltaf að sækjast eftir því að ná betri
árangri og ég mun vinna að því með
starfsfólki fyrirtækisins,“ segir
Stefán.
Hann hefur starfað innan fjár-
málageirans síðan 1997 og unnið
við fyrirtækjaráðgjöf og sem fram-
kvæmdastjóri VÍB. „Ég þurfti ekki
að velta þessu lengi fyrir mér því
mér finnst fyrirtækið og verkefni
þess spennandi. Ég tel mig hafa
nokkuð fjölbreyttan fjármála- og
rekstrarbakgrunn og ég er einnig
með reynslu af sölu- og þjónustu-
málum. Ég er hins vegar að fara inn
í nýjan geira sem er spennandi.“
Hann segir fyrirtækið ekki stefna
að frekari mannabreytingum.
„Það eru engar breytingar fyrir-
hugaðar en síðan veit auðvitað eng-
inn hvað framtíðin ber í skauti sér.“
Ómar Svavarsson hafði verið for-
stjóri Vodafone frá árinu 2009 en
hann lét af störfum í gær. Forstjóra-
skiptin komu nokkrum viðmæl-
endum Fréttablaðsins með tengsl við
fyrirtækið á óvart. Ómar hafi tekið
við erfiðu búi árið 2009 og fyrirtæk-
ið hafi fyrir þremur dögum skilað
góðu uppgjöri fyrir fyrsta ársfjórð-
ung þrátt fyrir áföll sem tengdust
meðal annars innbrotinu í desemb-
er þegar tölvuþrjótur stal sms-skila-
boðum og persónuupplýsingum við-
skiptavina. - hg
Ráðning nýs forstjóra Vodafone átti sér stuttan aðdraganda að sögn stjórnarformanns fyrirtækisins:
Sátt í stjórn Vodafone um nýjan forstjóra
TEKUR VIÐ Stefán Sigurðsson hefur
starfað innan fjármálageirans síðast-
liðin sautján ár. FRÉTTABLAÐIÐ/GVA
FRANS PÁFI Í RÓM Ætlar að hvetja til friðar á milli Ísraela og
Palestínumanna í lok mánaðarins. FRÉTTABLAÐIÐ/AP