Skessuhorn - 12.02.2014, Blaðsíða 11

11MIÐVIKUDAGUR 12. FEBRÚAR 2014
ull og silfur
SÝNING
BERGRÓS KJARTANSDÓTTIR OG DÝRFINNA TORFADÓTTIR
opna sýningu á safnasvæðinu Görðum Akranesi laugardaginn 15. febrúar kl. 14.
Þar sýnir Bergrós handprjónaðar flíkur sem hún hefur hannað og kynnir vef sinn Tíbrá.is
og Dýrfinna sýnir nýjustu skartgripalínuna sína. Sýningin stendur til og með 21. febrúar.
ALLIR VELKOMNIR
„Ég byrjaði mjög lítil að vinna með
band. Ég lærði að prjóna fimm eða
sex ára og var ennþá yngri þegar ég
byrjaði að læra að hekla. Þetta hefur
verið ástríða síðan ég var lítil,“ seg-
ir Bergrós Kjartansdóttir hönnuð-
ur. Hún mun næsta laugardag opna
sýningu ásamt Dýrfinnu Torfadóttur
í Safnaskálanum í Görðum. Bergrós
er fædd og uppalin á Ísafirði en ættuð
úr Jökulfjörðum og af Hornströnd-
um og eru ræturnar þar sterkar.
Bergrós hefur síðustu fjögur ár ver-
ið aðal hönnuðurinn fyrir Ístex, einu
spunaverksmiðjuna hér á landi. Öll
íslensk ull fer þar í gegn. Ístex gefur
út blað einu sinni á ári, þar sem birtar
eru ýmsar prjónauppskriftir. Margar
þeirra eru eftir Bergrós. „Ég hafði
strax áhuga á því að skapa. Mamma
kunni að skapa á þennan hátt en hún
var mikil handverkskona. Þetta var
næst mér og ég hugsa að það hafi
verið þess vegna sem ég fór að skapa
á þennan hátt en ekki annan,“ út-
skýrir hún.
Vefsíða fyrir
prjónauppskriftir
Bergrós hefur þó ekki einungis hann-
að munstur í prjónaföt. Hún hefur
lokið BA gráðu í bókmenntafræði og
þjóðfræði og fór síðan í mastersnám
í hagnýtri fjölmiðlun. Hún var lengi
verslunarstjóri hjá Tinnu, sem gaf
jafnframt út eitt þekktasta prjóna-
blað á Íslandi á sínum tíma. Eftir það
lá leiðin í Iðnskólann í Hafnarfirði
þar sem hún lagði stund á listnám. „Í
iðnskólanum kynntist ég málminum
og hvernig var að vinna með hann.
Þannig að þaðan fór ég í annað list-
nám í tækniskólanum, gull- og silf-
ursmíði. Ég er búin með skólann og
er að klára námssamning í vor,“ segir
Bergrós sem er á samningi hjá Dýr-
finnu Torfadóttur gullsmiði á Akra-
nesi.
Bergrós setti nýverið upp vefsíð-
una Tíbrá (www.tibra.is). Þar er hægt
að kaupa prjónauppskriftir eftir hana,
band í flíkina, prjóna og fleira. Þá er
einnig hægt að kaupa margar flík-
urnar tilbúnar. „Síðan var sett upp í
desember síðastliðnum en er margra
ára vinna. Mér finnst í raun eins og
ég hafi verið að vinna að henni alla
ævi. Það að opna þessa síðu var einn
stærsti dagurinn í lífinu mínu, þó að
auðvitað standi fæðingar barnanna
minna alltaf uppúr. En þessi dagur
fylgir fast á eftir. Þetta hefði aldrei
tekist nema með gríðarlegri þolin-
mæði og aðstoð frá góðu fólki,“ segir
Bergrós brosandi. Á síðunni verður
einnig hægt að sjá hinar ýmsu leið-
beiningar, bandupplýsingar, fróð-
leik og fleira. „Fólki fannst svolítið
skrýtið að ég væri búin að læra bók-
menntafræði, þjóðfræði og fjölmiðl-
un, færi svo í listnám og gullsmíði og
endaði á því að opna þessa vefsíðu.
En þetta nýtist mér allt þar. Ég þarf
að gera þetta allt sjálf og þá hjálp-
ar að vera búin að læra fjölmiðla-
fræðina. Bókmenntafræðin hjálpar
mér til dæmis að geta skrifað texta á
góðri íslensku. Þetta endar allt á ein-
um stað, allt smellur saman. Það ger-
ist alltaf einhver galdur þegar tvö til
þrjú fög blandast saman, þá verður
eitthvað nýtt til.“
Hannar út frá tilfinn-
ingum, ljóðum og sögum
En hver er kveikjan að nýjum hug-
myndum? „Ég myndi segja að ég
hanni mjög mikið út frá tilfinning-
um, sögum og upplifunum. Ég leita
mikið í uppruna minn, bernskuna,
ljóð og ævintýri. Ég er mikil ljóða-
manneskja og alin upp við ljóðalestur
og elska að lesa og hlusta á falleg ljóð.
Ég fæ stundum hugmynd í kringum
það og svo auðvitað úr náttúrunni.“
Bergrós gerir einnig skúlptúra úr
ull. „Ég gerði fimmtugsafmælisgjöf
fyrir bróður minn. Hann er fædd-
ur í fiskamerkinu, er stóri bróðir
og fær í flestan sjó. Svo rekur hann
fyrirtæki sem tengist inn í sjávarút-
veginn. Verkið er stór fiskur sem er
þæfður úr íslenskri ull. Inni í honum
er græn glerkúla sem pabbi notaði
þegar hann var á sjó. Það var gaman
að geta hannað og gefið svona pers-
ónulega gjöf en verkið heitir einmitt
„Fær í flestan sjó,“ sem getur bæði
átt við bróður minn, fiskinn og fyr-
irtækið. Ég hef gaman að leika mér
að orðum og nota það mjög mikið
þegar ég er að hanna.“ Bergrós hefur
hannað fjöldann allan af flíkum úr ull
og er hvergi nærri uppiskroppa með
hugmyndir. Hún lýsir því að það sé
eins og uppskriftirnar flæði. „Eins og
þær bíði bara í röðum á bakvið og svo
koma þær hver á fætur annarri.“
Bergrós hannar einnig persónulega
og fallega skartgripi enda að ljúka
námssamningi í gullsmíði. Hún sæk-
ir hugmyndir að skartgripum í sama
brunn og þegar hún hannar annað.
Blaðamaður Skessuhorns tekur eftir
fallegu armbandi með ígulkersáferð
sem hún ber á annarri hendi. „Faðir
minn gaf mér oft ígulker þegar ég var
barn. Ég á mikið af þeim heima og
ég lét prófa að steypa fyrir mig ígul-
ker til að sjá hvernig áferðin yrði. Ég
hannaði svo sett sem er steypt með
ígulkersáferð; hring, armband, háls-
men og lokka. Settið heitir „Djúpið“
en pabbi var sjómaður og var mik-
ið úti á Ísafjarðardjúpi. Svona nota
ég fortíðina og tilfinningar í hönn-
unina en þessi hönnun er mér mjög
kær og persónuleg,“ útskýrir Berg-
rós. Hún hefur einnig tengt textíl-
inn við málm og látið steypa skart-
grip úr einhverju sem upprunalega
var heklað.
„Vil að prjónarar geti
persónugert flíkurnar“
Í prjónahönnun sinni hefur Bergrós
í huga getu prjónarans sem prjónar
flíkina. „Ég er bundin af þekkingu
prjónarans. Það er samt gaman að
reyna á þekkinguna og að þenja út
tæknilegu mörkin eins og hægt er til
að prjónarinn upplifi eitthvað nýtt
listrænt og spennandi við prjónana.“
Bergrós fer ótroðnar slóðir í munst-
urgerð og vill skapa stemningu, eitt-
hvað seiðandi og órætt sem hver
einstaklingur getur líka gert að sínu.
„Fæstir hugsa út í það hvaðan hönn-
unin kemur þegar þeir eru að prjóna.
Stundum er eins og prjónarar haldi
að munstrin detti bara af himnum
ofan. Það er eins og þeir átti sig ekki
á því að það er hönnuður á bakvið
munstrin. En ég vil að prjónarar geti
persónugert flíkurnar og gert þær að
sínum, breytt litunum og þess hátt-
ar. Ef sama grunnmunstrið er t.d í
tveimur til þremur flíkum en með
annarri útfærslu eða litasamsetn-
ingu. Þannig getur prjónarinn sjálf-
ur blandað saman hluta af hönnun
í einni flík við aðra og fengið út al-
veg nýja flík sem engum öðrum hef-
ur dottið í hug að setja saman. Þá á
hann smá í henni.“
Opnar sýningu
á Akranesi
Laugardaginn 15. febrúar opnar
sýning í Safnaskálanum í Görðum
á Akranesi. Þar verða sýndar valdar
flíkur eftir Bergrós og skartgripir úr
nýjustu línu Dýrfinnu Torfadóttur
gullsmiðs. „Þetta verður frekar stór
sýning. Hún opnar á laugardeginum
og verður opin frá kl. 14 – 17. Aðra
daga verður hægt að kíkja á hana á
opnunartíma Safnaskálans en hún
verður opin áfram í viku að minnsta
kosti,“ segir prjónahönnuðurinn og
gullsmíðaneminn Bergrós Kjartans-
dóttir að lokum.
grþ
Bergrós hannar flíkur á allan aldur. Hér
er barnapeysan Tónar.
Ljósm Friðrik Örn Hjaltested /Ístex.
Hönnuður opnar prjónauppskriftasíðu
Rætt við prjónahönnuðinn Bergrós Kjartansdóttur
Bergrós Kjartansdóttir, einn af helstu prjónahönnuðum landsins hefur nú opnað vefsíðuna Tíbrá og verður fljótlega með
sýningu á flíkum sínum í Safnaskálanum í Görðum.
Bergrós hefur hannað ýmsar fallegar
flíkur. Þessi heitir Heimsljós.
Ljósm. Friðrik Örn Hjaltested /Ístex.
Listaverkið Fær í flestan sjó, sem
Bergrós hannaði og gaf bróður sínum í
afmælisgjöf. Ljósm. úr einkasafni.