Skessuhorn - 11.06.2014, Blaðsíða 18

18 MIÐVIKUDAGUR 11. JÚNÍ 2014
Hafdís Bjarnadóttir lífeindafræð-
ingur leiddi H-lista framfarasinn-
aðra Hólmara í sveitarstjórnarkosn-
ingunum í Stykkishólmi. Listinn
hafði sigur með með 392 atkvæðum
eða 54,36%. Annað framboð var
einnig í Stykkishólmi. Það var L-
listinn sem hafði verið í meirihluta
á liðnu kjörtímabili. Hann hlaut
300 atkvæði (41,6%). Auðir seðl-
ar og ógild atkvæði voru 29. Kjör-
sóknin í Hólminum var 87,39% og
þannig sú næstbesta á öllu landinu.
Segja má að framboðið hafi verið
eldskírn Hafdísar í stjórnmálaþátt-
töku. Hún hafði ekki verið í fram-
boði fyrr og segist þakklát fyrir
þann góða stuðning sem framboðið
fékk hjá íbúum bæjarins.
Fluttu í Hólminn
úr Reykjavík
Rétt tæpri viku eftir þennan sæta
sigur hittum við Hafdísi að máli
í hinum skjólsæla Freyjulundi í
Kvenfélagsgarðinum í Stykkis-
hólmi. Þar hefur nú verið opnað
nýtt og vistlegt kaffihús undir heit-
inu Sælkerakaffi. Við setjumst nið-
ur með kaffi undir sumarsólinni
við borð úti í garðinum. Þar sem
Hafdís er nýliði á hinum pólitíska
vettvangi sveitarstjórnarmálanna á
Vesturlandi er við hæfi að hún segi
aðeins frá sjálfri sér.
„Ég flutti hingað í Stykkishólm
fyrir 18 árum, með eiginmanni
mínum Kristni H. Jónassyni og
tveimur ungum sonum. Það var
árið 1996, við ætluðum þá að vera
í eitt ár. Ég er lífeindafræðingur að
mennt og byrjaði hér á móti ann-
arri á rannsóknarstofunni á sjúkra-
húsinu sem þá var St. Fransiskus-
sjúkrahúsið. Það þróaðist svo fljótt
yfir í að ég varð ein um að stjórna
henni. Svo er ég líka lærður nudd-
ari og rak í tæpt ár nuddstofu hér í
Stykkishólmi.“
Fundu alltaf fleiri
jákvæða punkta
Hafdís er fædd og uppalin í Reykja-
vík og það var ekkert sjálfgefið fyr-
ir hana að flytja út á land. Hún fann
þó mjög fljótt fjölina sína í Stykkis-
hólmi. „Fyrstu vikurnar eftir að við
fluttum hingað þá hugsaði ég að það
væri ekki hægt að búa neins stað-
ar annars staðar en í Stykkishólmi.
Ég heillaðist strax af því frelsi sem
við fengum hér. Þetta var einhvern
veginn önnur sýn sem ég fékk á lífs-
gæðin að setjast að á svona stað úti
á landi. Í minningunni var alltaf sól
á þessum tíma og allt svo frábært.
Þegar frá leið fór ég svo að vega
og meta kosti og galla þess að búa
í dreifbýlinu. Vissulega fer maður
á mis við ýmislegt svo sem nálægð
við vini og ættingja. Það var svona
helsti gallinn sem ég sá í upphafi.
Árið 1998 eignuðumst við dóttur;
Andreu Ýr. Fæðing hennar markaði
ákveðin tímamót í lífi okkar en hún
er langveik og býr við margþætta
fötlun. Við stóðum því frammi fyrir
því hvort við ættum að taka okkur
upp og flytja héðan. Okkur fannst
þó alltaf að fleira mælti með því að
vera hér áfram frekar en að flytja
þangað sem þjónustan væri meiri.“
Sjómannskona á marg-
þættum tímamótum
Kristinn eiginmaður Hafdísar
starfar sem sjómaður. Sem slíkur
er hann oft langdvölum að heiman.
„Þannig séð er hann frjáls að búsetu
þegar hann er í fríum í landi. Núna
er hann á togaranum Steinunni SF
hjá Skinney Þinganesi og sækir sjó-
inn frá Höfn í Hornafirði þótt við
eigum heima hér.“ Þau hjónin búa
enn í Stykkishólmi. Andrea Ýr er
enn í foreldrahúsum en synirnir eru
farnir að heiman. „Þeir voru sjö og
ellefu ára þegar við fluttum hing-
að í Stykkishólm en eru nú orðnir
fullorðnir menn. Rudolf er sá eldri.
Hann er bifvélavirki og býr og starf-
ar í Reykjavík. Hann og kona hans
eru nú með fjórða barnið á leið-
inni. Hilmir Snær býr í Chicago í
Bandaríkjunum þar sem hann vinn-
ur sem endurskoðandi hjá KPMG
þar í borg,“ segir Hafdís.
Hún er sátt við þá ákvörðun að
þau hafi sest að í Hólminum. „Að
flestu leyti hefur verið ágætt að ala
hér upp fatlað barn. Þjónustan hef-
ur farið batnandi með árunum. Nú
tekur við nýr kafli í lífi dótturinnar.
Hún útskrifaðist úr 10. bekk núna í
byrjun júní. Í haust hefur hún svo
nám á starfsbraut í Fjölbrautaskóla
Snæfellinga í Grundarfirði.“
Heilbrigðismálin vöktu
áhuga á stjórnmálum
Hafdís starfar enn á sjúkrahús-
inu í Stykkishólmi. „Staða mín þar
breyttist þegar heilbrigðisstofn-
anir á Vesturlandi voru samein-
aðar í Heilbrigðisstofnun Vestur-
lands (HVE). Fyrsta árið eftir sam-
einingu var ég ráðin fagstjóri rann-
sóknaþjónustunnar hjá HVE og
vann að því að samræma þann hluta
starfsemi stofnunarinnar. Í dag eru
rannsóknir bara framkvæmdar af
lífeindafræðingum. Rannsókna-
stofan hér sér um að þjónusta Snæ-
fellsnes en rannsóknastofan á Akra-
nesi þjónustar hinar stöðvarnar.
Þegar forstjórinn yfir sjúkrahúsinu
hér í Stykkishólmi lét af störfum
var ég fengin til að vera samskipta-
fulltrúi og er þannig tengiliður við
framkvæmdastjórnina á Akranesi.
Það hefur verið gengið mjög nærri
starfsemi sjúkrahússins hér í Stykk-
ishólmi með niðurskurði undanfar-
inna ára. Sameining svona stofn-
unar á niðurskurðartímum er allt-
af erfið.“
Heilbrigðismálin eru Hafdísi
hugstæður málaflokkur. Þau leiddu
til þess að hún hefur nú hafði þátt-
töku í stjórnmálunum. „Það hafði
ekki hvarflað að mér að fara í póli-
tík. Á síðasta kjörtímabili féllst ég
þó á að taka sæti í nefnd bæjarins
um félags- og barnaverndarmál
og nefnd um málefni fatlaðra fyrir
minnihlutann.“
Mjög lærdómsrík
kosningabarátta
Hafdís hafði þó ekki ekki verið á
framboðslista fyrir fjórum árum
og reyndar aldrei fyrr. „Ég hafði
reyndar verið beðin um það oft-
ar en einu sinni en hafnað því. Ég
taldi að mínar persónulegu aðstæð-
ur gæfu mér ekki svigrúm til mik-
illa félagsstarfa. Þegar ég var beð-
in um að leiða H listann fyrir kosn-
ingarnar nú í vor, ákvað ég að slá til.
Dóttir okkar er orðin það gömul og
því gefst mér meiri tími til að leggja
mitt af mörkum fyrir samfélagið.
Ég held ég hafi ýmislegt fram að
færa og geti lagt gott til. Ég ákvað
því að gefa kost á mér.“
Hafdís segir að það hafi verið
bæði lærdómsríkt og mjög skemmti-
legt að taka þátt í kosningabaráttu
fyrsta sinni. „Ég hélt að mitt áhuga-
svið væri eingöngu bundið við heil-
brigðismál og málefni fatlaðra. Síð-
an þegar ég fór að kynna mér aðra
málaflokka í málefnavinnunni þá
komst ég að því að mér þótti öll
sveitarstjórnarmálin mjög áhuga-
verð og skemmtileg. Ég hef orðað
það svo eftir á að líklega hafi alltaf
blundað í mér sveitarstjórnarmað-
ur. Mér finnst það hafa verið for-
réttindi að hafa fengið þetta tæki-
færi til að setja mig almennilega inn
í bæjarfélagið og rekstur þess, þó
margt sé enn ólært. Ég hef sjaldan
lært hraðar eða meira en ég gerði á
þessum tveimur til þremur mánuð-
um í aðdraganda kosninganna. Við
á listanum settum okkur inn í mál-
in, funduðum með forráðamönnum
stofnana og reyndum að átta okkur
vel á því hvað brynni á fólki.“
Öldrunarmálin
sameiginlegt hagsmuna-
mál allra
Hún segir að heilbrigðis- og öldr-
unarmálin verði forgangsmál á því
kjörtímabili sem nú er að hefjast.
Þetta sé svo mikilvægur málaflokk-
ur fyrir sameiginlega framtíðar-
hagsmuni allra íbúa Stykkishólms
að oddvitarnir hafi sammælst um
að gera þau ekki að ágreiningsefni í
aðdraganda sveitarstjórnarkosning-
anna. „Við oddvitar H og L-lista
vorum sammála um að við ættum
ekki að gera þennan málaflokk að
pólitísku deiluefni og undirrituðm
samkomulag þar að lútandi. Það
er mjög mikilvægt verkefni í gangi
sem er að koma starfsemi dvalar-
heimilis aldraðra hér í Hólminum
úr núverandi húsnæði við Skólastíg
og í húsakynni sjúkrahússins. Við
vitum öll að þó þjónustan sé mjög
góð við Skólastíg þá er húsnæð-
ið á engan hátt viðunandi. Okkur
verður að takast í sameiningu að
koma allri starfsemi dvalarheim-
ilis í húsnæði sjúkrahússins til að
ná fram hagræðingu og styrkja um
leið lögbundna og sérhæfða starf-
semi sjúkrahússins. Þetta skiptir
gríðarlega miklu máli og þar verða
hagsmunir heildarinnar að ráða för.
Mikið óhagræði er að reka öldrun-
arþjónustu á tveimur stöðum eins
og nú er gert.“
Áform um að flytja Dvalarheimili
aldraðra í Stykkishólmi í bygging-
ar sjúkrahússins höfðu verið í und-
irbúningi frá 2011. Þeim var síð-
an slegið á frest vegna niðurskurð-
ar í fjárlögum ríkisins, þar sem fjár-
mögnun verksins var ekki tryggð
nema til hönnunar og fyrsta verk-
hluta. „Nú hefur Kristján Þór Júlí-
usson heilbrigðistráðherra hins veg-
ar skipað nýja nefnd sem á að miða
við breyttar forsendur í þeirri vinnu
sem hefur það að markmiði að sam-
þætta öldrunarþjónustuna í hús-
næði sjúkrahússins og styrkja um
leið aðra starfsemi í húsinu. Nefnd-
in sem nú er að störfum er skip-
uð Jóhönnu Fjólu Jóhannesdóttur
af hálfu HVE, Sturlu Böðvarssyni
fyrir hönd ráðuneytisins og Lárusi
Ástmari fráfarandi bæjarstjóra fyr-
ir hönd Stykkishólmsbæjar.
Úrbóta þörf í húsnæðis-
málum skólanna
Hafdís dregur enga dul á að krefj-
andi áskoranir bíði hins nýja meiri-
hluta í Stykkishólmsbæ á þessu
kjörtímabili sem nú er að hefjast.
„Við þurfum að huga að ýmsu fleiru
en heilbrigðismálunum. Skólamál-
in þurfa líka athygli. Árið 2010 átti
að byrja á viðbyggingu við grunn-
skólann en hætt var við þau áform.
Þessi nýja bygging átti að leysa úr
þeim vanda er snýr að húsnæðisþörf
skólanna sem og félagslífi allra bæj-
arbúa. Í henni er gert ráð fyrir há-
tíðarsal sem nýtast mun öllu félags-
starfi í bænum, starfsemi tónlist-
arskólans og tveimur kennslustof-
um. Við teljum að þessi samþætting
muni skila sér í hagkvæmari rekstri
þegar fram líða stundir.“
Bæjaryfirvöldum er þó þröngt
skorinn stakkurinn. Skuldir Stykk-
ishólmsbæjar eru miklar. „Skulda-
þakið er alveg í toppi, lítið fé til
reiðu og halli á rekstrinum á síð-
asta ári. Við þurfum því að huga að
öruggum fjármögnunarleiðum. Til
dæmis með sölu annarra eigna svo
sem húsnæði gamla grunnskólans
sem er á mjög góðri lóð í bænum.
Það gæti gert okkur kleift að sam-
þætta skólastarfsemina undir einu
þaki. Þetta eru allt hugmyndir sem
þarf að skoða vel og ígrunda.“
Fjölga þarf atvinnutæki-
færum og íbúum
Tekjur Stykkishólmsbæjar þurfa að
aukast svo hægt sé að minnka skuld-
ir og skapa svigrúm til þeirra verk-
efna sem bíða úrlausna. „Við þurf-
um því að fjölga íbúum og atvinnu-
tækifærum m.a. með nýsköpun.
Þar rekumst við hins vegar ítrekað
á flöskuháls sem er tilfinnanlegur
skortur á íbúðarhúsnæði hér í bæn-
um, sérstaklega tryggu leiguhús-
næði sem gæti staðið fólki til boða
í tiltekinn aðlögunartíma. Við vit-
um af fólki sem vill flytja hingað en
getur ekki vegna þess að það vantar
húsnæði. Aðkoma bæjarins að bygg-
ingu slíkra leiguíbúða gæti verið að
hann legði inn hlut sinn í bygg-
ingarfélag í formi gjalda, til dæmis
gatagerðargjalda, en hefði ekki frek-
ari skuldbindingar. Það gætu líka
skapast möguleikar ef dvalarheim-
ilið yrði flutt niður á sjúkrahús. Þá
losnar rými sem við myndum vilja
breyta í leiguíbúðir sem henta eldra
fólki sem þá flytti úr stærra húsnæði
í bænum sem aftur hentaði fjöl-
skyldufólki sem flytti til bæjarins.
Þetta gæti hjálpað til að leysa þenn-
an húsnæðismálahnút,“ segir Haf-
dís Bjarnadóttir oddviti hins nýja
meirihluta H-listans í Stykkishólmi
að lokum. mþh
Hafdís Bjarnadóttir oddviti H-lista framfarasinnaðra Hólmara
Segir krefjandi verkefni bíða nýs meirihluta
Hafdís Bjarnadóttir fór fyrir H-lista framfarasinnaðra Hólmara í nýliðnum sveitarstjórnarkosningum í Stykkishólmi. Framboðið hafði sigur og vann hreinan meirihluta.
Þetta var í fyrsta skipti sem Hafdís fór í framboð. Hér er Hafdís við höfnina í Stykkishólmi. Í baksýn eru byggingar sjúkrahússins í Stykkishólmi þar sem hún hefur starfað
í 18 ár, þau síðustu á tímum mikilla breytinga sem vonandi fer nú að sjá fyrir endann á.