Skessuhorn - 23.07.2014, Blaðsíða 30

30 MIÐVIKUDAGUR 23. JÚLÍ 2014
Hvað finnst þér um aukinn
straum erlendra ferðamanna til
landsins?
Spurning
vikunnar
(Spurt í Stykkishólmi)
Sigurbjörg Henrysdóttir:
Bara gott mál, koma með pen-
ing til landsins.
Ásgeir Guðmundsson:
Fínt, eykur fjölbreytileika mann-
lífsins.
Jón Páll Leifsson:
Gott mál, góðir atvinnumögu-
leikar sem fylgja.
Árný Margrét Guðmundsdóttir:
Æðislegt, það streymir fjármagn
til landsins með þeim.
Katrín Eva Hafsteinsdóttir:
Skemmtilegt, verður meira líf í
bænum.
Sjónvarpsþátturinn Töfrahetjur tekinn upp í Bíóhöllinni
Nýr sjónvarpsþáttur Stöðvar 2,
Töfrahetjurnar, mun að hluta verða
tekinn upp í Bíóhöllinni á Akranesi
í dag, miðvikudaginn 23. júlí. Hald-
in verður töfrasýning sem hefst
klukkan 19:00 og munu upptök-
ur frá henni verða notaðar í þátt-
inn sem fer í loftið í haust. Það eru
þau Einar Mikael og Viktoría töfra-
menn sem sjá um sýninguna og lofa
þau frábærri skemmtun. Frítt er inn
á sýninguna og fá allir sem mæta
gefins galdrabók og dvd-diskana
Hókus Pókus og Leyndarmál vís-
indanna. Eru allir velkomnir en
fólk er beðið um að vera snyrtilegt
til fara því myndtökur úr sal verða
notaðar í sjónvarpsþáttunum.
„Bíóhöllin er magnaður staður
og okkur fannst tilvalið að taka þar
upp efni fyrir þáttinn. Vinir Hall-
arinnar eiga heiður skilinn fyrir að
hugsa vel um staðinn en þeir hafa
hjálpað okkur mikið við sýning-
ar áður. Sýningin verður frábær og
vonandi náum við að fylla Bíóhöll-
ina og gera úr þessu gott sjónvarps-
efni,“ segir Einar Mikael töframað-
ur í samtali við Skessuhorn.
jsb
Frammistaða karlaliðs ÍA í 1. deild
Íslandsmótsins í knattspyrnu hefur
heilt yfir verið með ágætum í sum-
ar og hún væntanlega staðið undir
væntingum flestra stuðningsmanna
liðsins. Ekki síst hefur vakið athygli
framganga Garðars Gunnlaugs-
sonar sem hefur skorað tíu mörk í
jafnmörgum leikjum í deildinni, en
Skagamenn hefur einmitt vantað tíu
marka mann síðustu árin. Garðar
er sem stendur markakóngur deild-
arinnar. Ljóst er að frammistaða
hans hefur dregið inn ófá stigin hjá
Skagaliðinu í sumar og kveikt von-
ir um að liðið nái sæti í deild þeirra
bestu að nýju næsta vor. „Ég hef
fulla trú á því að okkur takist það.
Ég er sannfærður um að við erum
með besta liðið í deildinni. Það hef-
ur aðeins vantað upp á stöðugleik-
ann hjá okkur sem við verðum að
laga í seinni umferðinni. Við höf-
um verið sjálfum okkar verstir í ein-
staka leikjum og það verður algjör-
lega undir okkur sjálfum komið
hvort við náum takmarkinu að spila
í Pepsídeildinni á næsta ári,“ sagði
Garðar í spjalli við Skessuhorn fyr-
ir helgina, áður en liðið fór á Selfoss
í fyrsta leik seinni umferðar í deild-
inni. Þá var hann nýlega búinn að
framlengja samning sinn við ÍA um
tvö ár, sem gert var að frumkvæði
stjórnar KFÍA sem gjarnan vill njóta
krafta hans áfram.
Langt og erfitt meiðsla-
tímabil
Garðar er sem kunnugt er Akurnes-
ingur að uppruna og lék með ÍA lið-
inu á unglingsárum. Hann kom síð-
an heim úr atvinnumennsku haust-
ið 2011. Þá hafði hann í nokkurn
tíma átt við erfið meiðsli að stríða
og var í sjúkrameðferð við brjósklosi
í baki þegar hann kom til ÍA liðsins.
Eftir að hafa náð þokkalegum bata
á vormánuðum 2012 tognaði hann
rétt fyrir mót og var að berjast við
meiðsli fram eftir sumri. Hann náði
engu að síður að skora nokkur mörk
fyrir ÍA það sumar í Pepsídeildinni.
Síðan kom í ljós eftir tímabilið 2012
að Garðar var kviðslitinn og gekkst
undir aðgerð við því í byrjun vetrar.
Það sama gerðist síðan korteri fyrir
mót vorið 2013 að Garðar tognaði
og missti af fyrstu leikjunum með ÍA
liðinu. Garðar segir að það sé í raun
frá júlímánuði í fyrra sem hann hafi
getað einbeitt sér að fullu við æfing-
ar vegna meiðslatímabila þar á und-
an. „Ég æfði mjög vel síðasta vetur
og hef verið í fínu formi núna síðasta
árið,“ segir hann.
Vildi sanna sig sem fót-
boltamaður
Ekki var eining innan þáverandi
stjórnar Knattspyrnufélags ÍA síð-
asta haust hvort Garðar yrði áfram
á samningi hjá félaginu. Garðar lét
hins vegar í ljósi fullan hug á því að
halda áfram að spila fyrir ÍA. „Það
tókst með herkjum að halda í samn-
inginn,“ segir Garðar og brosir. „Ég
taldi mig ekkert síður en aðrir liðs-
menn bera ábyrgð á því að liðið féll
úr Pepsídeildinni. Ég vildi gjarnan
fá tækifæri til að hjálpa til við það
að koma liðinu upp um deild aft-
ur. Meiðslavesenið hafði tekið sinn
toll hjá mér og mér hafði ekki gef-
ist tími til að sanna það bæði fyrir
sjálfum mér og bæjarbúum á Akra-
nesi að ég væri fótboltamaðurinn
sem væntingar stóðu til að ég væri.
Maðurinn sem dragi vagninn með
því meðal annars að skora mörk fyr-
ir félagið. Núna er ég líka kominn
á það aldursskeið, orðinn 31 árs, að
ég er orðinn einn af leiðtogum liðs-
ins. Ég lít raunverulega á mig í nýju
hlutverki í Skagaliðinu að því leyti,“
segir Garðar.
Nýtur þess að spila
fyrir ÍA
Spurður hvort hann njóti þess að
spila með ÍA liðinu segir Garðar að
hann geri það virkilega og nýi samn-
ingurinn undirstriki það að honum
finnist grasið ekki grænna hinum
megin. „Andinn í hópnum er virki-
lega skemmtilegur, eins góður og ég
held hann geti orðið. Ég nýt þess al-
veg í botn að spila og mun gera mitt
besta að hjálpa til við að takmark-
ið hjá okkur náist að komast upp úr
deildinni í haust. Hver leikur verð-
ur erfiður í spennandi keppni í mjög
jafnri deild. Ég held þó að við sjálf-
ir séum okkar „versti“ andstæðing-
ur. Þetta er allt undir okkur sjálf-
um komið,“ sagði Garðar og var þar
með rokinn inn á fund á síðustu æf-
ingu fyrir leik.
þá
Einar Mikael er landsþekktur töframaður. Hann sést hér framkvæmda ótrúlegt töfrabragð þar sem hann lætur Viktoríu svífa
í lausu lofti.
Garðar á skotskónum fyrir Skagamenn
Garðar á örugglea eftir að spila marga leikina á Akranesvelli og skora ófá mörkin.
Garðar og félagar fagna sigurmarkinu gegn Selfossi í fyrsta leik mótsins í vor.
Garðar fylgir vel eftir aukaspyrnu Jóns Vilhelms Ákasonar þar sem boltinn rataði í
mark HK í sigurleik í sumar.