Húnavaka - 01.05.1980, Síða 112

110
HÚNAVAKA
Elín Briem hvarf frá Ytri-Ey 1895 og giftist Sæmundi Eyjólfssyni
búfræðing og guðfræðikandidat, en hann andaðist ári síðar. Þá flutti
Elín til Reykjavíkur og stofnsetti þar hússtjórnarskóla 1897 og var þar
til veturinn 1901. Var sú stofnun við lýði til 1940.
Elín var árið 1901 kvödd til að veita kvennaskólanum forstöðu að
nýju. Hann var nú fluttur frá Ytri-Ey til Blönduóss og hún var þar til
1903 er hún giftist Stefáni Jónssyni verzlunarstjóra á Sauðárkróki,
en hann andaðist 1910.
Eftir að kvennaskólinn brann á Blönduósi var hann á hrakhólum
með húsnæði. Er skólahúsi hafði verið komið upp að nýju, var Elín
Briem kölluð að skólanum í þriðja skipti og var skólastýra skólans
1912-1915. Þá var hún flutt sjúk sjóveg til Reykjavíkur og skólastúlkur
fylgdu henni frá skólanum niður í fjöru þar sem bátur kom og ferjaði
hana frá landi til skips.
Elín var um árabil ekki heilsuhraust og mætti nokkru mótlæti sem
fyrr getur. Hún hélt reisn sinni til endadægurs. Man ég hana aldur-
hnigna konu í Reykjavík. Hún hlaut með fyrstu konum hér á landi,
riddarakross fálkaorðunnar.
Ungur frændi hennar var hér aðstoðarlæknir á Blönduósi, en hún
var afasystir hans. Læknirinn dáðist mjög að því, þó hann væri líka í
senn hissa að alls staðar voru myndir af Elínu Briem i Kvennaskólan-
um. Sem kunnugt er, er fjöldi minjagripa á skólanum sem eru gjafir
nemendahópa til að sýna þakklæti sitt og hug til skólans. Er þetta hin
mesta prýði skólans og má segja að varði sá sem afhjúpaður verður í
dag sé merki um þá reisn er konur hafa öðlast með skólagöngu á
Ytri-Ey og Blönduósi við elstu menntastofnun Húnvetninga.
En eitt er víst er vér lítum farinn veg starfs þessa skóla, þá fyllumst
við þakklæti til allra vina hans, þeirra er stjórnuðu honum og kenndu
þar, og einnig hafa dvalið þar og numið.
Þá hafa fullkomlega ræst um skólann orð Páls postula. Guðs sam-
verkamenn erum vér, Guðs akurlendi, Guðshús eruð þér.
Sr. Pétur Þ. Ingjaldsson.