Húnavaka - 01.05.1988, Síða 47

HUNAVAKA
45
Það var engin búsvelta í Tungu
Hvar ert þú fœddur?
— Eg er fæddur á Ægissíðu á Vatnsnesi 13. maí 1904. Foreldrar
mínir voru Teitur Teitsson, Vatnsnesingur að ætt og var mikið
skyldur Ánastaðaættinni, og Jóhanna Björnsdóttir frá Marðarnúpi í
Vatnsdal.
Hvað voru systkinin mörg?
— Við vorum 13 alls. Þar af komust 11 upp. Elstur var Þorbjörn
sem var fæddur 1893, en Elísabet var yngst. Hún fæddist 1914.
Hvernig var að alast upþ í svona stórum systkynahópi?
— Það var ágætt. Það var engin búsvelta í Tungu, aldrei. Nógur
lax og silungur að borða. Eg hef stundum sagt að ég hafi verið alinn
upp á laxi. Það var mikið veitt og þótt alltaf væri margt í heimili var
lax á borðum allt árið.
Foreldrar mínir fluttu frá Haga í Þingi að Ægissíðu snjóavorið
1899. f Haga höfðu þau búið í 4 ár. Þetta vor flutti að Haga ábúand-
inn, sem verið hafði á Ægissíðu, Magnús faðir Magnúsar Storms.
Þarna urðu því jarðaskipti, þótt hvorugur þeirra ætti jörðina, sem þeir
bjuggu á. Þetta gerði alla flutninga mun auðveldari og fóru þeir fram
um veturinn meðan Hópið var á ís. Allt var flutt á sleðum. Síðan
lánuðu þeir hvor öðrum þar til fólkið flutti á fardögum.
Vorið sem ég fæddist fluttu foreldrar mínir að Víðidalstungu. Árið
1912 keypti faðir minn Tungueignina svokölluðu, en það voru jarð-
eignir Vídalínsættarinnar í Víðidal, alls 10 jarðir. Þessari eign var
búið að skipta í tvennt og hafði Einar Benediktsson skáld komist yfir
annan hlutann. Það var sá hluti, sem faðir minn keypti. Hinn helm-
ingurinn var í eign Bjarna Símonarsonar prests á Brjánslæk á Barða-
strönd, en kona hans fékk þessar jarðir í arf.
Var ekki sjaldgæft eða einsdœmi að bóndi keypti á þennan hátt helming af 10
fórðum á einu bretti?
— Jú, ég býst við því. Fyrir þessa eign greiddi faðir minn 8 þúsund
krónur. Til viðmiðunar má nefna að ærverð um þetta leyti var 14
krónur og algengt kaupamannskaup um sláttinn var ærverð.
Einar hélt veiðiréttinum eftir og var ætlun hans að leigja hann
útlendingum. Það lánaðist honum þó aldrei og var veiðin alltaf nytjuð
frá Tungu fyrir lítið gjald. Faðir minn keypti siðan veiðiréttinn upp úr
1920 fyrir 2.000 krónur.