Dagblaðið Vísir - DV - 21.11.2012, Blaðsíða 26

26 Sport 21. nóvember 2012 Miðvikudagur
10 lið sem hafa ekki
staðist væntingar
n Fornfræg félög sem eru nokkuð frá sínu besta n Liverpool og AC Milan þar á meðal
Þ
ó svo að deildarkeppnirnar
í Evrópuboltanum hafi
nokkurn veginn spilast eftir
bókinni eru nokkur lið sem
valdið hafa vonbrigðum
á yfirstandandi leiktíð. Vefritið
Bleacher Report tók á dögunum
saman lista yfir 10 félög sem valdið
hafa stuðningsmönnum sínum
vonbrigðum í vetur. Listinn hér að
neðan er unninn upp úr honum en
nokkrar breytingar og uppfærslur
hafa þó verið gerðar. Á listanum má
finna fornfræg félög á borð við Real
Madrid, Liverpool, Arsenal og AC
Milan, en öll þessi lið eru töluvert frá
toppnum í deildarkeppnum sinna
landa.
10 Paris St. Germain Franska stórliðið Paris St. Germain
eyddi miklum fjármunum, 75 millj-
ónum evra, í nýja leikmenn í sum-
ar. Þrátt fyrir að vera í toppbaráttu í
frönsku deildinni og vera í lykil stöðu
í sínum riðli í Meistaradeildinni hef-
ur Parísarliðið ekki þótt sannfær-
andi. Liðið mætti Rennes á heima-
velli um helgina og tapaði óvænt 1–2
og er liðið nú í þriðja sæti deildar-
innar. Það er óhætt að segja að
margir hafi búist við betra gengi hjá
Parísarliðinu en þó ber að hafa í
huga að tímabilið er svo að segja ný-
hafið og enn tími fyrir framfarir hjá
Carlo Ancelotti og félögum.
9 Heerenveen Eftir að hafa endað í fimmta sæti hol-
lensku úrvalsdeildarinnar í fyrra
hefur Heerenveen byrjað tímabil-
ið í Hollandi illa. Í úttekt Bleacher
Report er þó tekið fram að einn af
fáum ljósum punktum hjá liðinu
þetta tímabilið hafi verið fram-
ganga Alfreðs Finnbogasonar sem
er meðal markahæstu manna
deildarinnar. Liðið fékk Marco van
Basten til að taka við liðinu fyrir
tímabilið en honum hefur ekki tek-
ist að stýra liðinu á sigurbraut. Til
að setja árangur Heerenveen í sam-
hengi má geta þess að eftir fyrstu
tólf leikina í fyrra voru þeir með sex
mörk í plús. Eftir fyrstu tólf leikina
á yfirstandandi leiktíð voru þeir
með sex mörk í mínus. Eftir tap um
helgina er liðið í 13. sæti deildar-
innar.
8 Arsenal Arsene Wenger, stjóri Arsenal, hefur haft það orð á
sér að skila Arsenal alltaf í Meistara-
deildina. Honum tókst það í fyrra
þrátt fyrir að hafa misst sterka leik-
menn og þrátt fyrir að hafa byrjað
tímabilið illa. Arsenal er ekki í sér-
staklega góðum málum í ensku
deildinni en vann þó góðan sigur
á tíu leikmönnum Tottenham um
helgina sem gæti komið liðinu af
stað. Þó svo að liðið hafi misst sterka
leikmenn undanfarin misseri eru
nýju leikmennirnir farnir að sýna
sitt rétta andlit og það er eins gott,
því krafan hjá stuðningsmönnum
er skýr: að liðið skili sér í Meistara-
deildina og endi í einu af fjórum
efstu sætunum. Eins og staðan er í
dag er liðið í 6. sæti ensku deildar-
innar.
7 Newcastle United Newcastle endaði í fimmta sæti í ensku
úrvalsdeildinni á síðasta tímabili og
var engin ástæða til að ætla annað
en að félagið myndi byggja á þeim
árangri og standa sig í vetur. Byrjun-
in á tímabilinu lofar hins vegar ekki
góðu og er liðið fyrir neðan miðja
deild, í tólfta sæti, þegar fyrsti þriðj-
ungur mótsins er nánast búinn. Þó
svo að stuðningsmenn Newcastle
hafi ekki búist við að liðið yrði í
toppbaráttu í vetur hafa þeir eflaust
reiknað með að árangurinn í vetur
yrði ekki mikið síðri en í fyrra. Ef það
á að takast þarf mikið að breytast
enda liðið hægt og bítandi að heltast
úr lestinni.
6 Tottenham Miðað við þá fjármuni sem Tottenham hef-
ur eytt í leikmenn á undanförnum
árum er ekki óeðlilegt að gera þá
kröfu að liðið nái sæti í Meistara-
deildinni. Tottenham hefur ekki ver-
ið sannfærandi í vetur og á stjórinn,
Andre Villas-Boas, enn eftir að sann-
færa stuðningsmenn um að hann
sé rétti maðurinn í brúna. Liðið
missti einn sinn besta mann, Luka
Modric, fyrir tímabilið auk Rafaels
van der Vaart, en fékk í staðinn
Moussa Dembele, Jan Verthongen,
Gylfa Sigurðsson og Clint Demps-
ey. Meðalmennskan hefur verið ein-
kennandi hjá Tottenham í vetur en
liðið sýndi það þó og sannaði að það
er hörkulið eins og 3–2 sigur þeirra á
Old Trafford bar með sér.
5 Real Madrid Rétt eins og himinninn er blár er það ský-
laus krafa allra sem koma að Real
Madrid að liðið skili titli í hús á
hverri leiktíð. Real Madrid byrjaði
tímabilið illa og situr sem fastast í
þriðja sætinu eftir leiki helgarinn-
ar á Spáni. Og til að bæta gráu ofan
á svart eru erkifjendurnir Atletico
Madrid og Barcelona fyrir ofan í
deildinni. Þá er Real Madrid í öðru
sæti í sínum riðli í Meistaradeildinni
og ekki öruggt um sæti í 16 liða úr-
slitum. Það er útilokað að liðið sé á
þeim stað í dag sem forsvarsmenn
þess ætluðu sér. Ef einhver getur
komið liðum á rétta braut er það
Jose Mourinho, stjóri Real Madrid,
en þolinmæðin hjá stjórn Real Mad-
rid hefur aldrei verið mjög mikil.
4 Roma Þó að fáir hafi búist við því að Roma blandaði sér í
baráttuna um titilinn í Serie A von-
uðust stuðningsmenn liðsins þó
eftir betra gengi. Liðið rétt missti
af sæti í Evrópudeildinni í fyrra en
fékk nokkra sterka leikmenn fyrir
tímabilið sem áttu að fleyta liðinu
í toppbaráttuna. Það sem af er
tímabili er liðið þó í nákvæmlega
sama fari og í fyrra og virðist ekki
líklegt til stórræða. Það er synd því
Roma er fornfrægt félag með nokkra
frábæra leikmenn innanborðs eins
og Francesco Totti, Daniel De Rossi,
Maarten Stekelenburg, Pablo Os-
valdo og Simone Perrotta.
3 Montpellier Montpellier kom mörgum á óvart í fyrra
þegar liðið vann frönsku deildina
eftir magnaða baráttu við Paris St.
Germain. Það sem af er tímabili hef-
ur liðið þó verið í miklu basli og fyr-
ir neðan miðja deild. Liðið missti
einn besta leikmann deildarinnar,
Olivier Giroud, í fyrra til Arsenal.
Þó að fáir hafi búist við því að liðið
endurtæki leikinn í vetur og ynni
titilinn bjuggust fleiri við því að liðið
blandaði sér í baráttuna um sæti í
Meistaradeildinni. Miðað við spila-
mennsku liðsins á tímabilinu er úti-
lokað að það gerist í nánustu fram-
tíð.
2 Liverpool Það hefur mikið verið rætt og ritað um gengi
Liverpool á tímabilinu og flestir
sammála því að liðið hafi engan veg-
inn staðið undir væntingum. Miklar
breytingar hafa orðið á leikmanna-
hópi félagsins á undanförnum árum
og í stað sterkra leikmanna sem hafa
horfið á braut hafa leikmenn komið
sem eru einfaldlega ekki nógu góðir.
Liverpool situr um miðja deild og
virðist ekki líklegt til afreka í vetur.
Liðið hefur þó verið að klifra upp
töfluna í deildinni í undanförnum
leikjum og er nú í 11. sæti. Þá hefur
liðið leikmann sem getur unnið leiki
á eigin spýtur, Luis Suarez, en liðið
þarf þó sterkari leikmenn við hlið
hans.
1 AC Milan Það kemur fáum á óvart að ítalska stórveldið
AC Milan skuli verma efsta sæti
listans. Milan-liðið endaði í öðru
sæti deildarinnar í fyrra en vegna
fjárhags vandræða þurfti liðið að
selja tvo af sínum bestu mönn-
um, Zlatan Ibrahimovic og Thiago
Silva, sem fóru til Paris St. Germain
í Frakklandi. Þrátt fyrir þetta töldu
margir að brotthvarf þeirra myndi
ekki hafa jafn mikil áhrif og raun ber
vitni og liðið myndi berjast um efstu
sæti deildarinnar. Líklegra er þó að
Milan verði í miðjumoði í vetur enda
nú þegar komið 17 stigum á eftir
toppliði Juventus.
Einar Þór Sigurðsson
blaðamaður skrifar einar@dv.is