Dagblaðið Vísir - DV - 28.07.2010, Blaðsíða 23

MIÐVIKUDAGUR 28. júlí 2010 ÚTTEKT 23
MATUR FYRIR HEILANN
SÚKKULAÐI OG HNETUR
Hnetur og fræ eru rík af andoxunarefnum og E-vítamíni. Rannsóknir á neyslu á E-vítamíni hafa leitt í ljós
að það geti komið í veg fyrir vitsmunalega hrörnun þegar við eldumst. Dökkt súkkulaði hefur að geyma
mikið af andoxunarefnum auk þess að innihalda náttúrulega örvandi efni eins og koffín sem getur
aukið einbeitingu. Njóttu þess að borða smá dökkt súkkulaði á hverjum degi án þess að hafa áhyggjur
af óhollustu eða aukakílóum. Það er hollt fyrir þig! – Í smáum skömmtum.
GRÆDDU Á HOLLU MATARÆÐI
Það hljómar kannski ótrúlega en það er satt: ef þig vantar nauðsynleg næringarefni getur það skert
einbeitingu þína. Að borða of lítið eða of mikið getur einnig haft áhrif á einbeitinguna. Þung máltíð
getur gert mann mjög þreyttan á meðan of fáar kaloríur geta valdið vanlíðan og orsakað hungurverki.
Verðlaunaðu heilann þinn með máltíð í réttum hlutföllum.
VÍTAMÍN OG BÆTIEFNI
Búðarhillur svigna undan bætiefnum sem öll eiga það sameiginlegt að eiga að bæta heilsu manna.
Vítamín eins og B, C og E hafa góð áhrif á heilsuna en betra er að fá vítamínin úr fæðunni. Rannsakendur
eru hóflega bjartsýnir á áhrif ginseng, ginkgo, vítamína, bætiefna og jurtablandna á heilann. Að taka inn
fjölvítamín daglega er í lagi en oft getur verið nóg að borða rétta fæðu án þess að taka aukabætiefni.
AVÓKADÓ OG KORN
Öll líffæri líkamans treysta á blóðflæðið, sérstaklega hjartað og
heilinn. Ef þú borðar kornmeti og ávexti eins og avókadó geturðu
minnkað hættuna á hjarta- og æðasjúkdómum með auðveldri og
bragðgóðri leið. Avókadó er líka talið vera gott fyrir heilann. Korn
eins og popp og haframjöl hafa líka upp á að bjóða miklar trefjar og
E-vítamín sem eru góð fyrir mann. Avókadó inniheldur fitu sem er
góð fyrir mann og hefur góð áhrif á blóðflæðið.
BLÁBER
Rannsóknir á dýrum hafa sýnt fram á að bláber geti hjálpað við að
vernda heilann fyrir mikilli streitu og geti haft áhrif á og minnkað
líkur á aldurstengdum sjúkdómum eins Alzheimer-sjúkdómnum.
Rannsóknir á rottum sýndu að mikil neysla á bláberjum hefði bætt
færni og hreyfigetu rottna á efri árum og gerði þær eftirsóknaverð-
ari í augum yngri rottna.
UNDIRBÚÐU ÞIG FYRIR
ERFIÐA DAGA
Viltu fá orku til að geta einbeitt þér? Byrjaðu þá daginn á máltíð
með 100 prósent náttúrulegum ávaxtasafa, heilhveitibeyglu með
laxi og bolla af kaffi. Auk þess að borða rétt samsetta máltíð mæla
sérfræðingar með góðum nætursvefni, því að stunda líkamsrækt til
að þjálfa hugsunina og að hugleiða til að tæma hugann og slaka á.