Dagblaðið Vísir - DV - 15.08.2014, Blaðsíða 47

Menning 47Helgarblað 15.–18. ágúst 2014
Leiðsögn
um Ummerki
sköpunar
Næstkomandi sunnudag, klukkan
15, verður boðið upp á leiðsögn
um sýninguna Ummerki sköpun-
ar með Ólöfu K. Sigurðardóttur,
forstöðumanni Hafnarborgar. Á
sýningunni eru verk frá árunum
1952 til 2014 sem bæst hafa í eign
Hafnarborgar á síðustu tíu árum
en þau eru eftir marga af þekktu-
stu listamönnum landsins sem og
nokkra erlenda listamenn. Meðal
þeirra sem eiga verk í sýningunni
eru Georg Guðni, Davíð Örn
Halldórsson, Guðrún Kristjáns-
dóttir, Ólafur Elíasson og Hildur
Bjarnadóttir. Ólíkir straumar og
stefnur koma við sögu í Ummerkj-
um sköpunar en sýningin er eins
konar ferðalag um list samtímans,
allt frá formfestu módernismans
til nýrra leikrænna myndbands-
verka, og stendur hún til 24. ágúst.
Íslandsmeistara-
mótið í spuna
Dagana 29. og 30. ágúst verður
Íslandsmeistaramótið í spuna
haldið í Frystiklefanum á Rifi
á Snæfellsnesi. Þetta er í fyrsta
sinn sem mótið fer fram en ekki
verður aðeins keppt í spuna í
formi leiklistar heldur einnig
í formi myndlistar, rapps og
rímna. Undankeppnin fer fram á
föstudeginum en seinna kvöldið
verður vinningsliðið krýnt með
titlinum Spunameistarar Íslands.
Þátttakendur mega vera á bilinu
einn til fjórir og eru allir 16 ára og
eldri velkomnir en nánari upp-
lýsingar má finna á Facebook-
síðu mótsins.
Torfhús
og tíska
Í dag verður opnuð sýning á
myndum sænska ljósmyndarans
Lisen Stibeck í Þjóðminjasafn-
inu. Stibeck tók myndirnar á
ferð sinni um Ísland sumarið
2013 en þær prýða fyrirsæt-
ur í fatnaði eftir fatahönnuðinn
Steinunni Sigurðardóttur við
torfhús sem tilheyra húsasafni
Þjóðminjasafnsins. Með myndum
sýningarinnar vill ljósmyndarinn
sýna einstakt samspil íslenskrar
náttúru, menningararfs og tísku.
„Ef land væri ljóð, þá væri það Ís-
land,“ sagði Stibeck eitt sinn um
landið en hún heillaðist af Ís-
landi fyrir mörgum árum og hefur
myndað víða. Sýningin er á Torgi
Þjóðminjasafnsins.
Þ
etta er búið að vera besta sum-
ar lífs míns. Það er algjör snilld
að fá að vinna með vinum sín-
um og dunda sér við það sem
manni þykir skemmilegast,“ seg-
ir Nökkvi Fjalar Orrason sem hefur
ásamt Agli Ploder Ottóssyni og Ró-
berti Úlfarssyni stjórnað sjónvarps-
þáttunum Áttunni á Popp TV og
Bravó í sumar.
„Við vorum í nefnd í Verzló sem
kallast Tólf núll þar sem við gerð-
um svipaða skemmtiþætti. Í lok
hvers þáttar vorum við með nýtt lag
sem varð til þess að Tólf núll varð
mun stærra en það hafði áður verið.
Eftir það fór boltinn eiginlega bara
að rúlla,“ segir Nökkvi en í kjölfarið
höfðu forsvarsmenn sjónvarpsstöðv-
arinnar Popp TV samband við strák-
ana og buðu þeim að vera með viku-
lega þætti í allt sumar. Þættirnir voru
síðan færðir yfir á Bravó.
Þáttunum svipar til sjónvarps-
þáttanna sálugu 70 mínútna og eru
byggðir upp á spjalli og sprelli í setti
í bland við innslög á borð við falda
myndavél og aðra hrekki. Þá eru
strákarnir einnig með stafrænt flipp-
hjól í þáttunum sem minnir um margt
á áskorunarhjól Strákanna sem voru
á Stöð 2. Hvort strákarnir séu hinir
nýju Sveppi, Auddi og Pétur Jóhann
skal hins vegar ósagt látið. „Við viss-
um af því að við værum að fara út í
svipaðan pakka en reynum að hafa
þetta samt með öðrum hætti,“ seg-
ir Nökkvi og viðurkennir að margt sé
mjög líkt með þáttunum. En hvaðan
kemur nafn þáttarins? „Við ætluðum
að hugsa út fyrir rammann og koma
með eitthvað frumlegt en sáum svo
að einföldustu hlutirnir væru bara
bestir. Þættirnir eru sýndir klukkan
átta á föstudagskvöldum og þaðan
kemur nafnið,“ útskýrir Nökkvi.
Eins og áður segir voru strákarn-
ir allir saman í Verzlunarskólanum
og útskrifuðust allir í vor. Varðandi
framhaldið þá eru strákarnir með
samning út sumarið en þeir binda
vonir við að fá að fara inn í haustið
með nýtt efni. Lokaþáttur Áttunn-
ar verður sýndur á föstudag klukkan
átta á Bravó. n
aslaug@dv.is
„Besta sumar lífs míns“
n Sjónvarpsþættirnir Áttan hafa vakið athygli í sumar n Binda vonir við áframhaldandi þáttagerð
Tvítugir sjónvarpsmenn Róbert, Egill Ploder og Nökkvi Fjalar við tökur á Áttunni.
Kúnst að koma einhverju
til skila á einni mínútu
n Mínútumyndir sýndar í sundlaugum Reykjavíkur á RIFF n Áttu mínútu?
H
ugmyndin er að vera með 24
myndbönd sem sýnd verða
í sundlaugum í Reykjavík
meðan á hátíðinni stendur,“
segir Arnar Ásgeirsson sýn-
ingarstjóri einna mínútu seríunnar
Deep Blue sem sýnd verður á RIFF-
hátíðinni í haust. Um samvinnuverk-
efni RIFF og The One Minutes er að
ræða en myndirnar verða sýndar í
Vesturbæjarlaug og Sundlaug Kópa-
vogs á RIFF-hátíðinni, sem haldin
verður dagana 25. september til 5.
október næstkomandi. „Settir verða
upp skjávarpar þannig að gestir
sundlauganna geta séð myndirnar
þar sem þeir sitja í heita pottinum,“
segir Arnar.
Mínútumyndagagnagrunnur
Arnar er myndlistarmaður sem út-
skrifaðist úr Sandberg Instituut-
háskólanum í Amsterdam með
meistaragráðu í myndlist árið 2012.
The One Minutes eru samtök
innan skólans og eru núverandi
og fyrrverandi nemendur þátt-
takendur í verkefnum á þeirra
vegum. Samtökin, sem stofn-
uð voru árið 1999, hafa fram-
leitt og dreift yfir tíu þúsund
einnar mínútu myndum eftir
fólk af 120 þjóðernum. Hug-
myndin hefur þróast með tím-
anum og farið í margar áttir.
Má nefna UNICEF sem dæmi
sem eru með mínútumynda-
námskeið á vegum The One
Minutes fyrir börn í þróunar-
ríkjum. „Þetta er í rauninni
myndbandagagnagrunnur,“
segir Arnar. „Við erum alltaf
að bæta við gagnagrunninn
með því að búa til alls kon-
ar prógrömm víðs vegar um
heiminn. Þetta samvinnuver-
kefni er eitt slíkt prógramm.“
Íslendingar seinir til
Arnar segir hvern sem er geta sent inn
mínútumynd til þátttöku en frestur til
þess að skila inn myndbandi rennur
út 24. ágúst næstkomandi. „Við höf-
um þegar fengið nokkur myndbönd
send en ekkert frá Íslandi ennþá. Ís-
lendingar eru eitthvað seinir að taka
við sér að þessu sinni,“ segir hann og
hlær. „Hugsanlega munum við taka
myndir úr gagnagrunninum og sýna
en við viljum endilega hvetja fólk til
þess að senda einnig inn myndir því
það væri gaman ef það væri eitthvað
nýtt.“
Áhugasömum er bent á að fara inn
á heimasíðu The One Minutes eða
heimasíðu RIFF þar sem finna má
upplýsingar um innsendingu mynda.
Sigurmynd keppninnar verður verð-
launuð og valdar myndir verða sýnd-
ar á RIFF-hátíðinni. The One Minutes
munu í framhaldinu vera með serí-
una til sýnis víðs vegar um heiminn.
Endalausir möguleikar
Þema mínútumyndanna í ár er djúp-
blár, eða „deep blue“, en þátttakend-
ur þurfa hins vegar ekki að taka því
of bókstaflega að sögn Arnars. „Hef-
ur þú einhvern tímann látið dáleið-
ast af dimmbláu hafinu og hlustað á
sefandi öldurnar sækja að landi? Eða
horft til himins, á margbreytilegan
blámann sem býr í himinhvolfinu, og
velt því fyrir þér hversu ósanngjarnt
það er að geta ekki borðað dúnmjúk
skýin. Við viljum að þú fangir þetta
augnablik.“ Þetta segir í frétt RIFF
um verkefnið en þar má sjá fleiri
hugmyndir tengdar viðfangsefn-
inu. Allt frá bláu augunum sem þú
varðst ástfangin af í æsku til dökk-
bláu fjallanna í fjarska. Arnar nefn-
ir einnig brimbrettakappa, Vasco da
Gama, Kevin Costner, skák, hvalspik
og Costa Concordia sem hugsanlegt
umfjöllunarefni. Möguleikarnir eru
greinilega endalausir.
„Það er ákveðin kúnst að koma
einhverjum skilaboðum til skila á
aðeins einni mínútu. Þú þarft að taka
mjög stórar ákvarðanir á þessari einu
mínútu. Það er nánast allt leyfilegt
innan þessa ramma og myndirnar
yfirleitt mjög fjölbreyttar,“ segir Arn-
ar. Eina kvöðin er því sú að mynd-
böndin verða að vera nákvæmlega
ein mínúta að lengd. Þátttakendur
hafa að öðru leyti fullkomið listrænt
frelsi. n
Áslaug Karen Jóhannsdóttir
aslaug@dv.is
Arnar Ásgeirsson
Sýningarstjóri mínútu-
myndanna á RIFF.
Breathe Stilla úr
myndinni Breathe
eftir Erlend Sveinsson
sem var valin besta
mínútumyndin í fyrra.
Sundsýningar á RIFF Sundlaugar borgarinnar hafa áður verið nýttar sem sýningastaðir á RIFF.