Lögmannablaðið - 01.11.2008, Blaðsíða 21

LÖGMANNABLAÐIÐ – 3 / 2008 > 21
Í árslok 2007 felldi úrskurðarnefnd lögmanna úrskurð í
máli á þann veg að lögmaður sætti áminningu og var
auk þess gert að greiða kæranda 50.000 krónur í
málskostnað. Þetta er í fyrsta sinn sem úrskurðarnefndin
gerir málsaðila í kærumáli gert að greiða gagnaðila
sínum málskostnað.
Í þessu tiltekna máli braut lögmaðurinn á ýmsan hátt
gegn góðum lögmannsháttum í störfum sínum fyrir
kæranda. Meðal annars svaraði hann ekki ítrekuðum
fyrirspurnum kæranda um rekstur og stöðu
innheimtumáls og veitti kæranda rangar upplýsingar
um málsókn fyrir dómi. Lögmaðurinn braut einnig
gegn góðum lögmannsháttum með því að draga það að
gera úrskurðarnefnd lögmanna viðhlítandi grein fyrir
máli sínu. Úrskurðarnefnd taldi framferði kærða ekki í
samræmi við þær skyldur sem hvíla á lögmanni
samkvæmt lögmannalögum og siðareglum lögmanna.
Hægt er að lesa þennan úrskurð nefndarinnar á
heimasíðu LMFÍ ásamt öðrum úrskurðum sem fallið
hafa.
Þar til nýlega bárust úrskurðarnefndinni að jafnaði 30-
40 erindi á ári. Málum hefur fækkað undanfarið og á
síðasta ári bárust nefndinni einungis 18 mál. Það sem
af er þessu ári hafa nefndinni borist 18 mál.
Úrskurðarnefnd skipa Gestur Jónsson, hrl., formaður,
Einar Gautur Steingrímsson, hrl. og Kristinn Bjarnason,
hrl.
Lögmanni gert að greiða málskostnað