Lögmannablaðið - 01.11.2008, Blaðsíða 15
LÖGMANNABLAÐIÐ – 3 / 2008 > 15
Það fór kaldur hrollur um lögmenn þegar þeir áttuðu
sig á að námskeiðsframboð haustannar sagði til um
efnahagshrunið mikla. Boðið var upp á skiptastjórn
þrotabúa, uppsagnir starfsmanna, fjárskipti hjóna og
sambúðarfólks, kokteilagerð og loks skipti dánarbúa.
Það er kaldur vetur í spákortum völvu félagsdeildar en
lögmenn bíða spenntir eftir að sjá hvaða námskeið
verða í boði á vorönn ... mun þar leynast von um betri
tíð og blóm í haga?
Námskeið haustannar
Á vegum félagsdeildar voru skipulögð tíu námskeið til
ársloka og þrjú í ársbyrjun 2009. Fimm námskeiðum er
þegar lokið: Matsgerðir með Einari Karli Hallvarðssyni.
Nokkur hugtök lögfræðinnar með Ásu Ólafsdóttur sem
var sérstaklega ætlað starfsfólki lögmannsstofa og
heppnaðist afar vel. Einnig var haldið námskeið í
skiptastjórn þrotabúa með Kristni Bjarnasyni og sóttu
það 27 þátttakendur. Fámennt var á námskeiðum í
uppsögnum starfsmanna sem Hrafnhildur Stefánsdóttir
kenndi og í samkeppnisrétti sem Heimir Örn
Herbertsson kenndi.
Námsferð til Winnipeg
Sú hefð hefur skapast að fara annað hvert ár í námsferð
til að kynnast réttarkerfi annarra þjóða, hitta kollega og
víkka sjóndeildarhringinn almennt. Í októberbyrjun
hélt 25 manna hópur á Íslendingaslóðir í Kanada.
Haldið var til Winnipeg þar sem Vestur-íslenskir
lögmenn og dómarar voru sóttir heim. Frásögn af
ferðinni er annars staðar í blaðinu en óvenju margir
heltust úr lestinni áður en haldið var af stað.
Fótbolti
Dálítið drama er búið að vera í gangi vegna fótboltamóta
sem Smári Hilmarsson hefur skipulagt árum saman af
mikilli samviskusemi og fórnfýsi. Smári fann vænlegan
eftirmann í fótboltanefndina sem stóð ekki undir
væntingum þegar á reyndi. Þetta er búið að valda angist
hjá mörgum en nú er hægt að gleðja fótboltaunnendur
með því að haldið verður fótboltamót rétt fyrir jólin.
Þetta verður svona „í kjól fyrir jól“ mót fyrir strákana
sem þurfa vegna þrenginga á fjármálamarkaðinum að
nota sparifötin frá því í fyrra.
Fréttir frá félagsdeild
Eyrún Ingadóttir
Völvan og veturinn