Lögmannablaðið - 01.12.2008, Blaðsíða 12

12 < LÖGMANNABLAÐIÐ – 4 / 2008
Í bréfi sem formaður Lögmanna­
félags Íslands sendi forseta Alþingis
5. desember sl. gerir félagið athuga­
semdir við vinnubrögð Alþingis við
löggjafarstörf. Segir í bréfinu að
nokkuð hafi borið á því á undan­
förnum vikum að lagafrum vörp hafi
verið afgreidd sem lög frá Alþingi í
miklum flýti og jafnvel án þess að
leitað hafi verið eftir umsögn eða
áliti sérfræðinga á þeim, svo sem
jafnan er gert.
„Stjórn Lögmannafélags Íslands
gerir sér grein fyrir því að Alþingi
hefur, vegna hinna umfangsmiklu
erfiðleika sem upp hafa komið í
kjölfar falls íslensku bankanna og
tengdra atburða, þurft á stundum
að bregðast við með skjótum hætti.
Stjórn félagsins leyfir sér hins vegar
að benda á að nauðsyn þess að
vanda vel til við smíði og máls­
meðferðar lagafrumvarpa fyrir
þinginu er sjaldnast meiri en einmitt
undir slíkum kringumstæðum,“
segir í bréfinu.
Formaður LMFÍ segir í bréfinu að
það sé sammerkt þeim frumvörpum
sem lögð hafa verið fram á Alþingi
á síðustu vikum, að þau snerta
mörg hver mikilsverð réttindi
manna, svo sem friðhelgi einkalífs,
málsmeðferð fyrir rannsóknaraðilum
og dómstólum, meðferð trúnaðar­
upplýsinga o.fl., þ.e. réttindi sem
njóta sérstakrar verndar samkvæmt
stjórnarskrá og Mannréttinda­
sáttmála Evrópu. „Telur stjórn
Lögmannafélagsins afar brýnt þegar
svo mikilsverð réttindi eru til
meðferðar í þinginu, að jafnan sé
leitað álits færustu sérfræðinga á
viðkomandi sviði, bæði fyrir og ekki
síður á meðan frumvörp eru til
meðferðar þingsins,” segir í
bréfinu.
Þá áréttar formaður Lögmanna­
félagsins við forseta Alþingis í
bréfinu það grundvallaratriði að ný
löggjöf sé þannig úr garði gerð að
engin hætta sé á að hún brjóti gegn
stjórnarskrá lýðveldsins og/eða
öðrum viðurkenndum grund vallar­
reglum og/eða alþjóðasátt málum
sem íslensk stjórnvöld hafa undir­
gengist. Segir í bréfinu að slíkt sé til
þess fallið að auka á ósætti og
ágreining í samfélaginu og þá jafn­
framt álag á réttarkerfi landsins.
Að endingu bendir formaður
Lögmannafélagsins á það í bréfinu
að sú þróun sem þar er lýst gæti
ógnað réttaröryggi borgaranna og
vegið að þeim gildum sem almennt
eru viðurkennd í lýðræðis sam­
félögum. „Með þessu gæti ímynd
Íslands sem lýðræðisríkis ekki
aðeins beðið hnekki á alþjóða­
vettvangi, heldur einnig gert þá
slæmu stöðu sem nú er uppi, enn
verri. Sú staða gæti á örskotsstundu
eyðilagt margt það sem áunnist
hefur á undanförnum áratugum,
nokkuð sem erfitt gæti verið að
vinna til baka nema á löngum
tíma,” eru lokaorð bréfsins.
Bréf LMFÍ til Alþingis
Lögmannafélagið átelur
vinnubrögð löggjafans