Lögmannablaðið - 01.12.2014, Qupperneq 27
LÖGMANNABLAÐIÐ TBL 04/14 27
Á LÉTTUM NÓTUM
trúarbrögð, styrjaldir og hvað eina sem
við spurðum um. Leiðsögn hennar í
þessari ferð var frábær og vakti upp
áhuga á að kynna sér að nýju gríska
goðafræði og sögu. Síðast en ekki
síst löngun til þess að koma aftur til
Grikklands og skoða fleira.
Við komum til Aþenu um miðjan
dag og tími gafst til að fara stutta
skoðunarferð út frá hótelinu okkar en
það var stutt ganga þaðan á Akropolis
og í gamla bæjarhlutann, Plaka. Þóra
kynnti fyrir okkur þar gríska matarhefð
og ýmislegt úr sögu Grikklands. Á
mörgum veitingastöðum í Aþenu er
lifandi tónlist og eru Grikkir greinilega
stoltir af tónlistararfi sínum því lög Mikis
Theodorakis og fleiri grískra tónskálda
hljómuðu þar. Þóra eyddi þeirri
ranghugmynd okkar að það væri mikil
mengun í Aþenu en eftir umbætur fyrir
Ólympíuleikana árið 2004 gjörbreyttist
borgin og sannreyndum það að skyggni
var gott og loftið hreint í Aþenu.
Mannkynssaga í minjum
Þann 24. september fórum við í
skoðunarferð á Akropolis. Að skoða
Akropolishæðina er fyrir áhugafólk um
sögu og menningu veisla fyrir augu og
huga. Að standa við rústir bygginga
og leggja hönd á stein, sem felldur
var í vegg fyrir rúmlega 2400 árum, er
líkt og að ná óljósri tengingu til fyrri
alda. Byggingarnar voru hannaðar af
verkfræðilegri þekkingu og hugviti og
enn í dag er ekki ljóst hvernig verkið
var framkvæmt. Byggingarnar voru
síðan reistar af fjölda þræla. Þær hafa
staðist tímans tönn þótt jarðskjálftar
og fjöldi styrjalda hafi tekið sinn
toll. Það er mögnuð reynsla að feta
slóðir þar sem Aristoteles, Platon,
Sókrates og Stóuspekingarnir gengu
og mannkynssagan er skráð í minjum
við hvert fótmál. Ekki síst er það
stórkostlegt að reyna að ímynda sér
það að höfuðdjásn Akropolishæðarinnar,
Parþenon eða Meyjarhofið eins og við
köllum það, var reist um 1300 árum
áður en Ingólfur Arnarson fann Ísland.
Hvar voru forfeður okkar norrænna
manna þá?
Höfuðdjásn Aþenu
Meyjarhofið var byggt til dýrðar
gyðjunni Aþenu á árunum 447 – 432
f. Kr. og er höfuðdjásn Aþenuborgar,
tákn hins forna Grikklands og einar
merkustu menningarminjar í heimi.
Árið 1687 skemmdist hofið mikið
í stríði Feneyjamanna og Ottómana,
sem þá réðu Grikklandi, sem fengu þá
„góðu“ hugmynd að hofið væri upplögð
skotfæra og sprengiefnageymsla. Í
British Museum er fjöldi höggmynda
og skreytinga frá hofunum á Akropolis.
Þar má m.a. sjá svokallaðar Elgin –
lágmyndir sem voru í Meyjarhofinu
en Tyrkir, sem réðu Grikklandi, seldu
þær til Bretlands ásamt fjölda annarra
muna árið 1816. Grikkir hafa lengi
reynt að fá minjarnar frá Akropolis til
baka en án árangurs. UNESCO beitir
sér nú fyrir því að samningum verði
lokið og fornminjum skilað til síns
heima. Mun í þessu sambandi vera
litið til þeirrar fyrirmyndar er Danir
skiluðu Íslendingum handritunum
21. apríl 1971 sem er nánast einstakt
á heimsvísu. Í því felst viðurkenning
á því að menningarverðmæti beri að
varðveita í því landi þaðan sem þau
eru sprottin. Nú er unnið að viðhaldi
Meyjarhofsins í þeim tilgangi að vernda
það í þeirri mynd sem það er í og er
ætlað að það verk muni standa yfir til
ársins 2065. Grikkir leggja nú mikla rækt
við fornminjar sínar og strangar reglur
gilda um varðveislu minja sem finnast.
Hæstaréttarlögmennirnir í hópnum stilltu sér upp við Areopagus. F.v. Jón Rúnar
Pálsson, Ragnar H. Hall, Jónas Guðmundsson, Ingi Tryggvason, Gestur Jónsson,
Lára V. Júlíusdóttir, Guðjón Ólafur Jónsson, Bjarni G. Björgvinsson, Garðar
Garðarsson og Óskar Sigurðsson.
Móttökur hjá aþenska lögmannafélaginu voru höfðinglegar.