Glóðafeykir - 01.04.1969, Blaðsíða 40

40
GLÓÐAFEYKIR
voru í haldi með honum á Ökrum, og lét Skúli byggja bæinn mjög
af þeim viði, er hann fékk á skipinu, og hafa lengi síðan sézt þess
merki á bæjarhúsunum á Ökrum.1) En Jón bróðir hans bjargaði
þeim sem hann mátti, og komust þeir flestir af landi. Þótti mörgum
allharðfengilega að þeim farið, og hefur það verið sagt eftir jóni
Eggertssyni, að eitt mundi það versta verk sitt að lögsækja þá að skip
an Skúla. Það var og þessi misseri, að Skúli gerði þá réttarskipun, er
var um hestagöngu, með margra manna samþykki. Tjaldaði hann
til þess búð að fornum sið á Vallalaugarþingstað enum forna, aust
an Ytra-Vallholts í Hólmi, þar verið hafði þriggja hreppa þing eður
leiðarþing Skagfirðinga, því lengi hafði þótt þurfa skipan á því að
gera í Skagafirði, er menn liöfðu haft þar ærinn grúa hrossa, svo
lönd öll bitust upp frá öðrum peningi. Þar með tóku menn ærinn
fjölda hrossa á hagagöngu fram í firði af útsveitum og stundum
vestan úr Svartárdal. Var nú ákveðið, að mest skyldu vera 12 hross
ung og gömul á hundraðs leigulandi, og lagt ríkt við, ef ei var rek-
íð á afrétt eða of mikið sett á landi. Voru í samþykkt þeirri Jón
Vigfússon á Reynistað, þeir bræður, Jón Eggertsson í Héraðsdal og
Eiríkur á Þorleifsstöðum (réttara: Reykjum í Tungusveit), Magnús
Skaftason, Marteinn Arnoddsson prentari og aðrir. En allsæmilega
hefur síðan verið fylgt skipan þessari eða hrossadómi, sem kallaður
hefur verið í Skagafirði.
LEIÐRÉTTING
I þætti Jóhannesar Sigvaldasonar í síðasta (8.) hefti Glóðafeykis
(Fallnir félagar, bls. 39), er hann talinn fæddur 6. ágúst 1874. Þetta
er ekki rétt. Jóhannes er, samkv. kirkjubók, fæddur 16. ágúst það ár.
G. M.
) Enn standa bæjardyrnar á ökrum, þær er Skúli reisli af skipaviðum. — G. M.