Skírnir - 01.09.1996, Side 233

SKÍRNIR
MÖRG ANDLIT AKASÍUTRÉSINS
479
Ljóð vega salt kom út eins og áður sagði árið 1975 og markaði
upphaf að ljóðvega-þríleik sem innihélt einnig bækurnar Ljóð vega
menn (1980) og Ljóð vega gerð (1982). I henni má finna ýmis sterk
höfundareinkenni sem setja svip sinn á allar bækur Sigurðar. Þau felast
ekki síst í undarlegri leikgleði þegar orð eru annars vegar, ferskri hugsun
sem er blessunarlega laus við hátíðleika og tilgerð. Málnotkun, myndmál
og yrkisefni eru nýstárleg og sama gildir um endurskapandi viðhorf til
bókmenntahefðar og þá samtíðarmynd sem dregin er upp; ljóðin bera
vitni um „vissa uppreisnarafstöðu gagnvart næstu skáldakynslóðum á
undan og gegn fjölmörgu í hinu félagslega umhverfi", líkt og Eysteinn
Þorvaldsson bendir á í umfjöllun um íslensk ljóðskáld sem fram komu á
áttunda áratugnum.6 Ljóðin eru viðbragð við nýrri heimsmynd og þeim
áhrifum sem hún hefur á möguleika sjálfsverunnar til að brjóta sér leið til
sjálfstæðrar skynjunar. Þau sýna okkur skáld sem fikrar sig „eins og sól
inn í vitund dagsins" - „rís hægt upp úr draumum og gömlum leikjum /
meðan kyndill dagsins hækkar á brothættum morgni“ („árstíðasólir I“,
s. 9).
Þau skáld sem fram komu á áttunda áratugnum báru með sér ný lífs-
viðhorf sem einkenndust ekki síst af ádeilu á neyslukapphlaup og önnur
auðkenni á lífsmynstri góðborgaranna. Sigurður Pálsson fór þar fremst-
ur í flokki. I þriðja ljóði „árstíðasóla“ í Ljóð vega salt (s. 9-17) segir:
og fólk vopnað lyklakippum
rasssíðar frænkur og undirokaðir frændur
paufast um á köldum eyðisöndum lífs síns
þar sem hús standa vörð um líf þess
(timbruð í byrjun vikunnar
eins og nýbaðaðir kettir)
bolast þau áfram í söknuði eftir framtíðinni
hlakkandi til fortíðarinnar
flýta sér undan nútíðinni
(s. 12)
Skáldið er á svipuðum slóðum í ljóðunum „borgari sæll“ í sömu bók
(s. 23) og „Æskudraumur þinn vinurinn" í Ljóð vega menn þar sem
hann hæðist að borgaranum sem rofið hefur tengslin við náttúruna og
lokast „í bragðvondu skrafi“ (s. 33). Endurnýjun hins flata tungumáls
hversdagsins er eitt af markmiðum Sigurðar í fyrstu bókunum þremur
og minnir á þá róttæku viðleitni módernista fyrr á öldinni að leysa málið
úr viðjum þrúgandi hefðar, hvort sem litið var til bókmennta eða tal-
6 Eysteinn Þorvaldsson: „Skáldskapurinn í lífinu." Nýgrœðingar í Ijóðagerð
1970-1981. Ljóðasafn. Eysteinn Þorvaldsson valdi efnið og annaðist útgáfuna.
Iðunn, 1983, s. 8.