Ritröð Guðfræðistofnunar - 01.09.2006, Síða 10

Það er óhætt að fullyrða að kvikmynd Gibsons um þjáningu og kross-
dauða Jesú Krists hafi dregið athygli almennings að píslarsögunni og skap-
að líflegar umræður um merkingu hennar í samtímanum. Sennilega hefur
myndin hvergi fengið aðra eins athygli og í Bandaríkjunum1, en sem dæmi
um þá opinberu umræðu sem átti sér stað í íjölmiðlum þar vestra má nefna
að tímaritið Newsweek helgaði forsíðu sína myndinni í tvígang, og í þriðja
heftinu var opnugrein um „Jesus Christ Movie Star“.2 Umræðan sem skap-
aðist í kringum gerð kvikmyndarinnar og sýninga hennar á föstunni árið
2004 var að mörgu leyti áhugaverð og til marks um áhrifamátt kvikmynda-
rinnar í menningu okkar (þó að ekki megi gleyma mikilvægi markaðs-
setningarinnar til að ná slíkum árangri) og þá möguleika sem hún býður
upp á við túlkun frásagna guðspjallanna. Með því að frumsýna myndina í
Bandaríkjunum á öskudag vildi Gibson árétta trúarlegan boðskap mynd-
arinnar, en við undirbúning hennar hafði hann tjáð sig opinberlega um þá
trúarlegu merkingu sem vinnuferlið hefði haft fyrir sig og líkt vildi hann
að áhorfendum færi.
Mynd Gibsons vekur upp fjölda spurninga um píslir Krists og túlkun
þeirra í sögu og samtíð. Að sögn Gibsons er myndin nákvæm lýsing á at-
burðarásinni, eins og henni er lýst í guðspjöllum Nýja testamentisins, en
eins og til að árétta trúverðugleika myndarinnar hefur hann haldið því
fram að heilagur andi hafi verið hinn raunverulegi leikstjóri myndarinn-
ar.3 Kennivald ritningarinnar og innblástur andans eru aðeins tvö af þeim
íjölmörgu guðfræðilegu viðfangsefnum sem mynd Gibsons og yfirlýsingar
hans gefa tilefni til að fjalla um. Markmið þessarar greinar er vissulega ekki
1 Biema 2004, s. 57.
2 Newsweek, 8. mars 2004. Yfirskriftir forsíðugreinanna voru: „Who Really Killed Jesus“ (Meacham 2004) og
„Why Did Jesus Die?“ (Biema 2004).
3 Um þátt heilags anda er haft eftir Gibson: „Holy Ghost was working through me on this film, and I was just
directing traffic” (Thistlethwaite 2004, s. 140). Svipuð viðhorf koma fram hjá James Caviezel, en hann fór með
hlutverk Krists í myndinni. I viðtali við Sean Smith, blaðamann á Newsweek, segir Caviezel m.a.: „I don’t want
people to see me. All I want them to see is Jesus Christ“ (s. 53).
8