Ritröð Guðfræðistofnunar - 01.09.2007, Qupperneq 58

hann. Þessi nálægð/fjarlægð tengir Jesú við þversögn þess að vera í líkama,
skilyrtur stað og stund, og einnig „máttur meðal allra þjóða. “22
Ágústínus telur að með því að snerta klæði Jesú geti hinn heiðni eða sú
heiðna komist inn í návist hins heilaga. Þegar konan snertir Jesú breytast
mörkin milli þess sem er fyrir utan og innan hið helgaða. Konan með blóð-
látin verður hluti af líkama Krists. Ágústínus segir: „Verið þá líkami
Krists, ekki þfystingurinn á líkama hans. Klæðfaldur hans er yður gefinn
til að snerta, svo að þér verðið hrein af blóðlátum, það er af lystisemdum
holdsins. Snertið því ef þér þjáist af blóðlátum."23 Af útleggingu Ágústínus-
ar má ætla að það sé heimilt að snerta Jesú, beinlínis ætlast til þess til þess
að hinn heiðni utangarðsmaður losni undan holdinu sem blóðlátin tákna,
og flytjist yfir til hinnar kristnu kirkju sem er líkami Krists. Það að snerta
klæðið verður hluti af fyrirfram úthugsuðu náðarverki sem losar manneskj-
una frá synd og heiðni og gerir hana að þátttakanda í annars konar sam-
félagi. Ágústínus leggur að jöfnu blóðrennsli frá leggöngum, holdið, synd-
ina og heiðnina. Eftir stendur umbreyting, þar sem hinum blæðandi, kven-
gerða syndara er breytt í skraufþurra kirkju; hin óhreina hefur verið hreins-
uð og tekin inn í Guðsríkið.
Með því að benda á útleggingu Ágústínusar á Mk. 5 hef ég dregið fram
nokkur andstæðupör í guðspjallsssögu og hefðarsögu, tvenndir eins og t.d.
heilagt og veraldlegt, hreint og óhreint, eilíft og tímabundið, kirkja og sam-
tími, karllegt og kvenlegt, andlegt og líkamlegt, sem varða upphafsspurn-
ingu greinarinnar um tengsl samtíma og hins kristna arfs. Mörg þessi pör
koma fram í texta Ágústínusar, önnur eru falin undir yfirborðinu. Eg velti
því fyrir mér hvort og hvernig sé hægt að afbyggja slíkar tvenndir, hreyfa
við tvenndarhugtökum í kristinni trúfræði og því stigveldi milli hins kven-
læga og karllæga, holdlega og andlega sem slík hugsun opinberar. Grein
Ward um Rof-Krist getur hér að mínum dómi orðið að liði. Bæði Ágústín-
us og Ward gera ráð fyrir möguleika á tengslum milli Krists og þeirra sem
standa utan við kirkju hans. Páll postuli ræddi um kirkjuna sem líkama
22 Philip Schaff (ritstj.) A Select Library of the Nicene and Post-Nicene Fathers of the Christian
Church. Volume VI Saint Augustin (Grand Rapids, Michican: Wm.B. Eerdmans Publishing
House 1956), 299.
23 Ágústínus í A Select Library of the Nicene and Post-Nicene Fathers, 230.
56