Skólavarðan - 01.03.2005, Page 3
3
FORMANNSPISTILL
SKÓLAVARÐAN 2.TBL. 5. ÁRG. 2005
Þriðja þing Kennarasambands Íslands verður haldið dagana
14. og 15. mars nk. Að vanda verða mörg mikilvæg mál þar til
umfjöllunar. Stefnumörkun til næstu þriggja ára í skóla-, kjara-
og félagsmálum mun taka drjúgan tíma sem og ýmis önnur mál
sem til umræðu verða. Það kjörtímabil sem nú er senn á enda
hefur verið viðburðaríkt hjá félögum í Kennarasambandi Íslands
og full ástæða til að fara yfir starfsemi síðustu ára og meta hvað
hefur tekist vel og hvað miður. Þetta verður gert samhliða því að
marka stefnuna til næstu ára.
Kjarasamningagerð
Kjarasamningagerð hefur tekið drjúgan tíma hjá mörgum og er
í raun ekki lokið þegar þetta er skrifað, enn er ósamið fyrir fram-
haldsskólann. Langt og harðvítugt verkfall í grunnskólum hafði
mikil áhrif á starfsemi allra félaganna í KÍ vegna þess hve umfangs-
mikið það var og hve marga það snerti. Enn og aftur varð ljós sú
mikla samstaða sem ríkir hjá félögum innan Kennarasambandsins
og ekki síður samstaða stéttarfélaga opinberra starfsmanna og
reyndar fleiri. Myndarleg fjárframlög margra systurfélaga léttu
verulega undir með rekstri Kennarasambandsins og gerðu auk
þess vinnudeilusjóði kleift að greiða hærri upphæðir til hvers
félagsmanns á meðan á verkfallinu stóð en ella.
Þegar til svo harðra átaka kemur við gerð kjarasamninga eins
og nú gerðist er mikilvægt að vel takist til þar sem árangur eins
félags getur oft komið öðrum til góða. Það sannaðist um jólin
þegar Félag leikskólakennara og Félag tónlistarskólakennara
náðu stuttum kjarasamningum með tiltölulega góðum kjara-
bótum í kjölfar verkfallsins. Núna er allra mikilvægast að stéttar-
félög standi vörð um lágmarkskjör og selji ekki frumburðarrétt-
inn fyrir baunadisk.
Stytting náms til stúdentsprófs
Annað hitamál sem hefur mikið verið rætt er fyrirhuguð stytting
námstíma til stúdentsprófs. Ljóst er að styttingin mun hafa veru-
leg áhrif á skólastarf í landinu, ekki aðeins í framhaldsskólum
heldur líka í grunnskólum og jafnvel leikskólum. Enn og aftur
er ástæða til að hafa áhyggjur af kostnaðarskiptingu ríkis og
sveitarfélaga. Sú ætlan að flytja hluta af námsefni framhaldsskól-
anna niður á grunnskólastigið verður að skoðast í víðu samhengi.
Það er ekki sjálfgefið að grunnskólakennarar taki að sér kennslu
framhaldsskólaáfanga, enda hafa ekki nema örfáir þeirra leyfis-
bréf sem framhaldsskólakennarar. Í kjarasamningi grunnskóla
er heldur ekki að finna ákvæði um hvernig beri að greiða fyrir
kennslu framhaldsskólaáfanga. Það er heldur ekki sjálfgefið að
sveitarfélögin taki við þessum viðbótar verkefnum nema aukið
fjármagn fylgi með. Margt bendir til að ríkisvaldið ætli sér enn
og aftur að koma hluta af lögbundnum verkefnum sínum yfir á
sveitarfélögin án þess að eðlilegir tekjustofnar fylgi með. Ástæða
er því til að vara við of miklum flýti í þessu máli.
Breyting á kennaramenntun
Nú stendur fyrir dyrum löngu tímabær endurskoðun á kennara-
menntuninni í landinu og hefur menntamálaráðherra skipað
starfshóp til að gera tillögur um framtíðarskipan hennar. Ég
tel mikilvægt að fyrst sé hugað að því hverju þarf að breyta í
menntun kennara og í kjölfarið séu þá gerðar breytingar á skóla-
starfi ef þurfa þykir. Ef flanað verður að þessu máli og mistök
gerð mun það fyrst og síðast bitna á nemendum. Þau mistök
verða ekki aftur tekin. Börnin eiga aðeins eina æsku og hún er of
mikilvæg til þess að gera vanhugsaðar tilraunir með hana.
Að lokum
Ég vil nota þetta tækifæri til að þakka öllum þeim sem nú láta
af trúnaðarstörfum fyrir Kennarasamband Íslands fyrir mikið og
gott starf og jafnframt býð ég nýtt fólk velkomið til starfa.
Eiríkur Jónsson, formaður Kennarasambands Íslands.
Þriðja þing Kennarasambands Íslands
Eiríkur Jónsson