Skólavarðan - 01.08.2003, Blaðsíða 10
NÁMSEFNI
Stoðkennarinn er vefur sem nýtist
við íslenskunám nemenda á efri
stigum grunnskólans, einkum 9. og
10. bekk. Einnig þeim nemendum
framhaldsskóla sem enn hafa
ekki náð fullnægjandi tökum á
íslenskunni. Vefurinn skiptist í
stafsetningar- og málfræðihluta
en síðar meir mun bókmenntahluti
bætast við.
Í stafsetningarhlutanum er
boðið upp á kennsluhefti þar sem
nemendur geta lesið sér til um allar
helstu stafsetningarreglur íslenskrar
tungu og æft viðkomandi reglu með
eyðufyllingarverkefnum. Einnig er
boðið upp á sóknarskrift þar sem
nemendur sjá setningu í ákveðinn tíma
og rita hana svo og senda til yfirferðar.
Eftir tæpa sekúndu liggja niðurstöður
fyrir og Stoðkennarinn fer fáum
orðum um eðli villunnar og bendir á
regluna sem brotin var með tilvísun
í orðið sjálft. Þá má hlusta á þessar
sömu setningar, sem eru 400 talsins,
upplesnar. Einnig getur nemandi tekið
stafsetningarpróf.
Málfræðihlutinn skiptist í fjóra
hluta: kennsluhefti, nafnorðaglímu,
sagnorðaþríþraut og próf. Í
kennsluheftinu er farið í almenn
málfræðiatriði og þau æfð. Í
nafnorðaglímunni þurfa nemendur
að glíma við erfið nafnorð, fallbeygja
þau, greina kyn og segja hvort um sé
að ræða veika eða sterka beygingu.
Sagnorðaþríþrautin er, eins og nafnið
gefur til kynna, þríþætt. Fyrsta þraut
felst í því að segja hvort sögn sé veik
eða sterk. Sé sú þraut sómasamlega
leyst glímir nemandi við aðra þraut
þar sem honum er gert að rita
kennimyndir og afleiddar myndir
viðkomandi sagnar. Þriðja þrautin
og sú erfiðasta er að rita rétta mynd
sagnar í ákveðinni tíð, mynd, persónu,
tölu og hætti. Í prófhlutanum gefst
nemendum kostur á að spreyta sig á
málfræðihluta gamalla samræmdra
prófa. Stoðkennarinn fer yfir
niðurstöður, merkir við villur og rétt
svar og bendir nemanda að auki á þau
atriði sem eru að vefjast fyrir honum.
Gagnvirkur vefur og tekur til
starfa í haust
Allt kapp er lagt á að Stoðkennarinn
standi undir nafni sem gagnvirkur
vefur. Stoðkennarinn lætur sér aldrei
nægja að segja svar rétt eða rangt,
heldur ræðir hann alltaf eðli villu, vísar
í regluna, bendir á undarntekningar,
önnur orð, stofna, rót og þar fram eftir
götunum. Stafsetningarhlutinn byggir
á stórum kóða sem getur greint allar
villur sem brjóta í bága við íslenskar
stafsetningarreglur og stórum
gagnagrunni undantekningaorða,
stofna og róta.
Hver nemandi fær eigið aðgangsorð
að Stoðkennaranum og þannig er
hægt að halda utan um gengi hvers og
eins. Nemandi og kennari hans hafa
aðgang að þessum upplýsingum og
er því með skjótum hætti hægt að sjá
hvar skórinn kreppir. Kennari getur því
án mikillar fyrirhafnar séð hverjir hafa
unnið sína heimavinnu og hvernig
þeim hefur gengið og nemanda ætti
að þykja hvetjandi að sjá einkunnir
færðar inn á einkunnablað sitt.
Á svæði kennara geta kennarar
fylgst gengi nemenda sinna, prentað
út setningar til upplestrar, breytt
notandanöfnum nemenda sinna og
skiptst á verkefnum til útprentunar.
Stoðkennarinn mun taka til starfa
í haustbyrjun. Munu kennarar og
skólastjórnendur fá kynningarbréf
og frían aðgang í takmarkaðan tíma
til að kynna sér vefinn. Það eina sem
kennarar þurfa svo að gera er að senda
inn nöfn þeirra nemenda sem þurfa
aðgangsorð. Verði mun stillt í hóf og
er mismunandi eftir stærð skóla og
fjölda aðgangsorða sem hver skóli kýs
að hafa. Þannig mun skóli með 100
nemendur í 9. og 10. bekk borga um
30.000 kr. fyrir árið.
Vefurinn er unnin á PHP tungumáli
og er tengdur við MySql gagnagrunn.
Hann virkar í nýrri útgáfum Netscape
og Internet Explorer og hefur það
verið haft að leiðarljósi að hafa hann
einfaldan að gerð, léttan og verkefni
aðgengileg. Slóðin er stodkennarinn.is
Höfundur vefsins er Starkaður
Barkarson. Hann nam íslensku við
Háskóla Íslands og kenndi tvo vetur í
framhaldsskólum. Hann er nú búsettur
í Madríd þar sem hann freistar þess
að leggja sitt á mörkum við kennslu
móðurmálsins með hjálp nútímatækni
og einnig dundar hann sér við skriftir.
Stoðkennarinn
margræður (vefur) Starkaðar
stodkennarinn.is
10