Skólavarðan - 01.08.2003, Side 16
FRÉTTIR OG SMÁEFNI
Árlegt mót norrænna
kennara á eftirlaunum
Kennarar á Norðurlöndum sem
komnir eru á eftirlaun héldu
ársfund sinn í Reykjavík dagana 12.
- 16. júní, með þátttöku 65 erlendra
gesta og 15 íslenskra fulltrúa. Félag
kennara á eftirlaunum, eitt af
aðildarfélögum Kennarasambands
Íslands, skipulagði fundinn.
EKKÓ, kór kennara á eftirlaunum,
söng við setningu fundarins og
ávörp fluttu Ólafur Haukur Árnason
formaður FEK, Eiríkur Jónsson
formaður Kennarasambands Íslands
og Sólrún Jensdóttir skrifstofustjóri í
menntamálaráðuneytinu.
Árni Björnsson þjóðháttafræðingur
flutti erindi og fundarmenn fóru
í kynnisferð um Reykjavík og
heimsóttu Ráðhús Reykjavíkur í
boði borgarstjórnar, einnig var
farið í kynnisferðir um Suðurland
og Borgarfjörð og til Þingvalla og
ýmsir merkir staðir á Suðurlandi
skoðaðir. Í lok mótsins funduðu
kennararnir svo á Bessastöðum með
Ólafi Ragnari Grímssyni forseta
Íslands. Jón Svavarsson, ljósmyndari
Skólavörðunnar, var viðstaddur opnun
mótsins og tók þessar myndir.
Skutlan kveður –
heimasíðan heilsar
Fréttir af FNS
Aðalfundur Félags náms- og
starfsráðgjafa var haldinn
þann 4. apríl sl. í Hamri, nýjum
fundarsal Kennaraháskóla Íslands.
Fundarstjóri var Sigríður Bílddal
og fundarritari Elín Einarsdóttir.
Þarna var í fyrsta sinn nýttur
fjarfundarbúnaður á aðalfundi sem
gerði það að verkum að sjö manns
á Akureyri sátu fundinn norðan
heiða.
Til stóð að félagsmenn á Egilsstöðum
yrðu einnig með en þá brást tæknin.
Aðalfundurinn samþykkti viðamiklar
breytingar á lögum félagsins auk þess
sem rammi að almennri starfslýsingu
fyrir náms- og starfsráðgjafa hlaut
samþykki. Starfshópur um siðareglur
gerði grein fyrir stöðu mála og hvert
framhald þess starfs yrði. Ný stjórn var
kjörin á fundinum. Formaður FNS er
Svandís Ingimundar, svandis@thi.is
og varaformaður er Hrafnhildur
Tómasdóttir, hrafnhildur@mentor.is
Fréttabréf FNS, Skutla, hverfur
innan tíðar í sinni gömlu mynd en
í stað hennar munu fréttir birtast
jafnóðum og þær berast á heimasíðu
félagsins. Þar verða einnig tilkynningar
og ábendingar er varða málefni
félagsins. Fræðslunefnd FNS hvetur
félagsmenn til að halda áfram að
senda inn fréttir þótt birtingarformið
breytist og vonast eftir sem áður eftir
góðu samstarfi.
KMSK opnar
heimasíðu
Kennarafélag Mosfellsbæjar,
Seltjarnarness og Kópavogs, sem
er eitt af svæðafélögum Félags
grunnskólakennara, hefur opnað
nýja heimasíðu á Netinu. Slóðin er:
www.ismennt.is/vefir/kmsk
Á síðunni er m.a. að finna ýmsar
upplýsingar um KMSK, lög þess og
stjórn og lista yfir trúnaðarmenn í
öllum skólum sem tilheyra félaginu
auk tenginga á heimasíður skólanna.
16