Ljósmæðrablaðið - 01.12.2017, Page 9

9LJÓSMÆÐRABLAÐIÐ - DESEMBER 2017
ljósmæðra, en íslenskum ljósmæðrum hefur orðið tíðrætt um þetta
efni á síðustu árum. Rætt var um tíðni áfallastreitu meðal ljósmæðra í
kjölfar erfiðra atvika í starfi og hvaða þættir ýta undir eða fyrirbyggja
að ljósmæður þrói með sér áfallastreitu við þessar aðstæður. Þættir
sem geta fyrirbyggt áfallastreitu eru meðal annars að ljósmæður hafi
aðstöðu til að sinna starfi sínu á faglegan hátt og að þær upplifi stuðn-
ing frá samstarfsfólki. Ef ljósmæður mæta áföllum með seiglu getur
úrvinnsla þeirra orðið til þess að þær vaxi í starfi (fyrirlestrar E13.01,
Anna Fumoto, og E13.02, Helen Spiby).
Málþing var haldið þar sem rökrætt var hvort ljósmæður ættu að
vera helstu sérfræðingarnir í sitjandi fæðingum um leggöng. Frum-
mælendur tóku afstöðu með og á móti og í framhaldinu tóku þátttak-
endur í salnum til máls. Óhætt er að segja að líflegar umræður hafi
skapast, meðal annars um það hvort sitjandafæðing rúmuðust innan
ramma hins eðlilega eða væru frávik frá því. Almennt má þó segja að
ljósmæðrum hafi almennt borið saman um að rétt væri að ljósmæður
sérhæfðu sig í sitjandafæðing, enda engin leið að vita hvar og hvenær
ljósmóðir getur þurft að sinna óvæntri sitjandafæðingu (málþing DB:
ICM Debate)
Mörg veggspjöld voru einnig áhugaverð og í fræðilegri samantekt
var rýnt í niðurstöður rannsókna á því hvaða íhlutunum væri beitt
til að minnka kvíða hjá barnshafandi konum með öðrum aðferðum
en lyfjum. Þar kom fram að þær aðferðir sem hafa verið rannsakaðar
voru fræðsla og stuðningur frá ljósmæðrum, slökun, núvitund, jóga og
nálastungur, en einnig þættir eins og stuðningur í formi símaviðtala,
jafningjastuðningur, fræðsla á sviði næringar, hreyfingar og sálfræði-
meðferð (veggspjald P1.046, Kerry Evans).
Að sjálfsögu sinntu ljósmæðurnar frá Íslandi félagslífinu á meðan á
ráðstefnunni stóð og skelltu sér til að skoða hina mikilfenglegu Niagara
fossa. Einnig fóru margar ljósmæður upp í CN turninn í Toronto.
Það var ekki laust við að sumum hafi fundist að við værum komnar
aðeins of langt upp í loftið þegar við vorum komnar í 350 metra hæð
og gengum út á glergólf þar sem hægt var að sjá 350 metrana beint
niður á gangstéttina. Aðrar fóru hins vegar skrefinu lengra upp á hæsta
útsýnispallinn í 450 metra hæð!
Hægt er að skoða umfjöllun, upptökur og myndir frá ráðstefnunni á
https://canadianmidwives.org/cam-conference-2017/
Næsta ráðstefna ICM verður haldin á Balí árið 2020 og verður þema
ráðstefnunnar „Midwives of the world: delivering the future.“ Í kynn-
ingu frá Bali kom fram að óskað verður eftir útdráttum á ráðstefnuna
með tólf mánaða fyrirvara. Búið er að opna heimasíðu ráðstefnunnar
www.midwives2020.org. Þannig að nú er um að gera fyrir íslenskar
ljósmæður að plana fram í tímann og skella sér til Balí dagana 21.-25.
júní 2020.
Sigfríður Inga Karlsdóttir og
Berglind Hálfdánsdóttir Toronto.
Margar íslenskar ljósmæður tóku þátt í ráðstefnunni.