Skessuhorn - 20.03.2019, Síða 27
MIÐVIKUDAGUR 20. MARS 2019 27
Vísnahorn
Verkföll hafa sjaldnast
verið eitthvert sérstakt
skemmtiefni þó sumir
segist gleðjast yfir þeim.
1955, ef ég man rétt, var mjög hart verkfall og
settu verkamenn aðflutningsbann á ýmsar vörur
til Reykjavíkur. Ýmsar atlögur voru þó gerðar
að því banni og urðu viðsjár og flokkadrættir
með mönnum. Verkfallsmenn settu vegartálma
á nokkrum stöðum og aðgættu hvern flutning
væri að finna í bifreiðum við mismikil fagnað-
arlæti. Því miður veit ég ekki nánar um þau at-
vik sem urðu kveikjan að eftirfarandi:
Einn Lofgjörðarsálmur um þann herrans
þjón, sem Filisteann sló.
Góðlyndur guðfræðingur
geðuga reisu tók.
Með saltkjöt og soddan glingur
síðan til borgar ók.
Bensín í brúsa fínum
bar hann í örmum sínum
og fáeina kassa af kók.
Vígi við Geitháls gjörðu
grenjandi Moskvuljón,
saklausar sálir börðu,
svívirtu herrans þjón.
Stýrði þeim flokki fúla
fjarstýrðum meður túla
gangsterinn Gvendur Jón.
Andskotans illskudrjólar
upp settu spýtnabrak.
Engillinn í þá hjólar
iðkandi steinbítstak,
felldi þá alla að foldu,
færði þá oní moldu
og neydd´í þá neftóbak.
Lát þú mig lypta tungu
og lofa þann eðla mann,
sem borgarbúunum ungu
bjarga frá skorti vann
og rassskellti ræningjana,
sem rógbera Ammríkana,
Þú herra í himnarann.
Amen.
Það er nú orðið svo langt síðan þessir at-
burðir áttu sér stað að flestir sem voru þar í
hringiðunni eru annaðhvort horfnir af vett-
vangi til annarra heima og þá væntanlega án
kjaradeilna eða að minnsta kosti orðnir elli-
lífeyrisþegar fyrir löngu og hættir að standa
í eldlínu baráttunnar. Alltaf er þó gaman að
hittast og rifja upp gamlar minningar og gott
að hafa í huga vísu Óskars í Meðalheimi:
Við skulum ekki á vinafund
vera alltof sparir,
kemur hinsta kveðjustund
kannske fyrr en varir.
Það er nú svo þó að ellin sé óhjákvæmileg
(það er að segja ef menn deyja ekki fyrr) þá
taka menn henni með mismunandi hugarfari.
Jón Bergþórsson frá Fljótstungu sem lengi
var forstöðumaður Nýju Sendibílastöðvar-
innar hætti því starfi 73 ára og sagði:
Upp frá þessu á ég frí
og ætti að vera glaður,
en ekki er hægt að hæla því
að hætta að vera maður.
Theódór Einarsson sem lengi var þekktur
gamanvísnahöfundur og flestir eldri Akur-
nesingar munu kannast við orti á sínum efri
árum:
Fyrr ég gat á árum ort
eins og best ég vildi.
Nú er ég eins og kreditkort
sem komið er úr gildi.
En hverjum er það að kenna ef skrokkurinn
endist ekki eins lengi og við viljum? Það má
alveg velta því fyrir sér. Var hér um hönnun-
argalla að ræða eða var vikið frá teikningunni
með óleyfilegum hætti? Aðeins að skoða sjón-
arhorn Þorsteins Guðmundssonar:
Drottinn skapti mig til manns
úr mold og leir og ryki.
Var það ekki á ábyrgð hans
að ekki smíðin sviki?
Ólafur Tryggvason læknir var maður prýði-
lega hagmæltur. Á seinni árum sínum flutti
hann í húsnæði ætlað eldri borgurum og ný-
lega innfluttur stóð hann á svölum sínum og
horfði niður í garðinn á nábýlinga sína sitj-
andi í heitum potti:
Margar furður maður sér
á mannlífs ystu jöðrum.
Þeir sem áður undu sér
við ástarleiki og mjaðarker
samankropnir sitja nú hér
í soðinu hver af öðrum.
Það er nú svosem ekki eins og unga fólkið
starfi ekki að skemmtanamálum, bæði sínum
eigin og annarra. Það eru nú orðin nokkur ár
síðan eftirfarandi var ort í Menntaskólanum á
Akureyri og má segja að framtíð stökunnar er
ekki í bráðri hættu meðan ungt fólk yrkir með
þessum hætti:
Saman kætumst kvöldum á
cool og sæt að vanda.
Drykknum mæta dreypum á,
diet Sprite og landa.
Rósberg Snædal var einn af okkar allra
fremstu hringhendumönnum en hann orti
einnig óhefðbundið og brá reyndar ýmsu fyr-
ir sig. Eftirfarandi ljóð nefnist „Sonnetta á
hausti“:
Senn er nú þessi blessuð tíð að baki.
Bráðum mun vetur sækja dalinn heim.
Burtu eru lóur, - aftur einn ég vaki
einmana skáld - og horfi á eftir þeim.
Og enginn, enginn spyr hvað að mér amar.
Einræður mínar þyl ég tæmdri skál.
Herjar á lyngið haustsins rauðabál.
Kvíði og myrkur hverja hugsun lamar.
Og vorið kemur kannski aldrei framar.
Ekki veit ég um hvern eftirfarandi mann-
lýsing er ort og ekki einu sinni viss að mig
langi til að vita það:
Þekkti ég vel til þessa manns
þegar hann við mér horfði.
Blítt og stillt var brosið hans
en broddur í hverju orði
Þorbjörn Sveinbjarnarson hét maður og var
um tíma vinnumaður á Uppsölum í Hálsasveit
hjá Þorleifi og þeim systkinum. Eitt kvöld
kom hann seint inn til kvöldverðar og var
Leifur þá að verka tófuskinn í eldhúsinu með-
an Þorbjörn var að næra sig. Eitthvað mislík-
aði Þorbirni þetta og hafði orð um og end-
aði með vistaskiptum en af þessu tilefni kvað
Guðlaugur Jóhannesson í orðastað Þorleifs:
Þú ei ræður Þorbjörn minn.
Þú ert æði vandsetinn.
Þó mín séu gæði mórautt skinn
meðan þú snæðir kvöldverðinn.
,,Eitt bros getur dimmu í dagsljós breytt“
segir í kvæðinu og ætli okkur sé ekki gott að
hafa þá hugsun að leiðarljósi eins og segir í
vísu Ragnars Gröndal:
Ég get verið þíðan þín
þegar allt er frosið
því sólin hún er systir mín
sagði litla brosið.
Með þökk fyrir lesturinn,
Dagbjartur Dagbjartsson
Hrísum, 320 Reykholt
S 435 1189 og 849 2715
dd@simnet.is
Samankropnir sitja nú hér - í soðinu hver af öðrum
Skólafólk á Akranesi fór í verkfall
fyrir loftslagið á Akranesi síðastlið-
inn föstudag. Milli 80 og 90 manns
voru þar saman komin í hádeginu
til að vekja athygli á málstaðnum.
Flestir á fjölbrautaskólaaldri en þó
nokkuð af grunnskólakrökkum líka,
allt niður í 5. bekk, sem og eldra
fólk sem lokið hefur skólagöngu en
brennur fyrir málstaðnum.
Það var umhverfisnefnd Fjöl-
brautaskóla Vesturlands sem boðaði
til verkfallsins. Nefndin hafði und-
anfarna daga unnið að skipulagn-
ingu og undirbúningi viðburðarins
undir handleiðslu Helenu Valtýs-
dóttur kennara. Er verkfallið að fyr-
irmynd bylgju loftslagsverkfalla sem
hin sænska Greta Thunberg hefur
komið af stað meðal barna og ung-
menna víða um heim. Á sama tíma
voru skólaverkföll fyrir loftslagið á
nærri 1700 stöðum í meira en 100
löndum um heim allan, þar af einnig
á Akureyri og í Reykjavík.
Skessuhorn hitti Jórunni Narcisu
Gutierrez, Kötlu Kristínu Ófeigs-
dóttur og Sindra Leví Ingason í að-
draganda verkfallsins, en þau sitja öll
í umhverfisnefnd FVA. „Tilgangur-
inn með því að hvetja nemendur til
að skrópa í skólanum og fara í lofts-
lagsverkfall er að reyna að neyða
stjórnmálamenn til að fara að huga
af einhverri alvöru að umhverfismál-
um og loftslagsmálum. Okkur stend-
ur ekki á sama því það erum við sem
munum þurfa að glíma við afleið-
ingarnar í framtíðinni, ekki þeir sem
eru eldri. Enda virðist þeim flestum
standa nokkurn veginn á sama, það
hefur allavega ekki mikið verið gert,“
segja þau. „Það er löngu kominn tími
til að gera eitthvað í málunum, það er
ekkert plan B. Við eigum bara þessa
einu plánetu og við höfum ekki tíma
til að bíða, við þurfum breytingar og
það strax.“
Bæjarstjórn krafin um
breytingar
Ungmennaráð Akraness sendi frá sér
yfirlýsingu á föstudag vegna lofts-
lagsverkfallsins. Þar er minnt á að
með verkfalli sé verið að mótmæla
slæmum vinnubrögðum stjórnvalda
um allan heim varðandi loftslagsmál.
Ungmennaráð krafði bæjarstjórn um
breytingar og það strax. „Nú er verið
að vinna í umhverfisstefnu Akranes-
kaupstaðar og biðlum við því til ykk-
ar að ráðast strax í aðgerðir og setja
Akraneskaupstað í forystu sveitarfé-
laga á Íslandi í umhverfis- og lofts-
lagsmálefnum. Fylgja þarf eftir nið-
urstöðum samráðshóps um aðgerða-
áætlun í plastmálefnum sem skilaði
tillögum til umhverfis- og auðlind-
aráðherra í lok síðasta árs. Auka þarf
vitund fólks í bænum um ofnotk-
un á einnota plastvörum og skað-
semi þeirra fyrir umhverfið, draga úr
notkun einnota plasts, draga úr los-
un örplasts í hafið með bættri hreins-
un skólps og hvetja til göngu og hjól-
reiða um bæinn til að minnka útblást-
ur. Okkar framtíð er í hættu! Það er
engin pláneta B! Það er löngu kom-
inn tími á aðgerðir. Við höfum ekki
tíma til að bíða, breytingar strax,“
segir í yfirlýsingu ráðsins. kgk
Verkfall fyrir loftslagið á Akranesi
Nemendur með mótmælaspjöld á lofti á meðan verkfallinu á Akratorgi stóð á
föstudag.
Eydís Gunnlaugsdóttir, nemandi í 5. bekk Grundaskóla, var að því er Skessuhorn kemst
næst yngsti nemandinn sem lagði niður störf fyrir loftslagið á Akranesi á föstudag. Hér
er hún með skiltið sitt á lofti fyrir framan hópinn. Gunnhildur Ósk Signarsdóttir talar í
gjallarhornið.
Helena Valtýsdóttir kennari sagði
nokkur orð þar sem hún hrósaði
krökkunum fyrir framtakið, en það var
umhverfisnefnd FVA sem skipulagði
viðburðinn undir hennar handleiðslu.
„Græn framtíð“ og „aðgerðir strax“!
Skiltin á lofti í hádeginu á föstudag. Viðburðurinn var vel sóttur, þar sem á að
giska 80 til 90 manns lögðu leið sína á Akratorg.