Morgunblaðið - Sunnudagur - 01.03.2020, Blaðsíða 22

Yfirkokkurinn og annar eig-enda Kastrup, Stefán Mel-sted, tekur vel á móti blaða-
manni einn vetrardag í vikunni. Í
húsnæði sem áður hýsti eina Mic-
helin-stað Íslands, Dill, er nú kom-
inn glænýr veitingastaður sem býð-
ur upp á danskt eðalsmurbrauð,
auk annarra gómsætra rétta.
Lærði að tala jósku
Stefán nær í tvo espresso í litlum
glösum og segir blaðamanni frá
upphafinu; hvernig hann endaði á
því að bjóða upp á dansk-franskan
mat á Kastrup í Ingólfsstræti.
„Ég lærði til kokks í Danmörku,
en þar bjó ég í um fimm ár. Ég var
þar í grunnnámi en svo var mjög
erfitt að finna lærlingspláss, líka af
því ég var ekkert sérlega sleipur í
dönsku en ég var þá bara búinn að
vera sex mánuði í landinu. Ég vann
þá hjá danska póstinum og bar út
póst á meðan ég var að leita. Svo
fékk ég pláss á stað sem heitir
Restaurant Grønnegade. Þetta er
lítill huggulegur fransk-danskur
staður í Grønnegade 39,“ segir
hann.
„Þarna var ég í fjögur ár, með-
fram því að mæta í skólann. Þarna
lærði ég dönsku í eldhúsinu og á
barnum. Ég var að vinna með strák
frá Jótlandi þannig að ég talaði eig-
inlega jósku,“ segir Stefán og hlær.
Fimmtíu pelsar í röðum
„Þetta var fínn tími. Þarna var
kokkur sem hætti ári áður en ég
útskrifaðist og gerðist „sous chef“ á
D’Angleterre. Ég ætlaði aldeilis
heim til Íslands að halda upp á
sveinsprófið en þá hringdi hann og
bauð mér í prufu mánudeginum á
eftir; það vantaði kokk. Það var
ekki hægt að segja nei við því og
ég var farinn að vinna á D’Angle-
terre á miðvikudegi. Það var gam-
an að vinna þar því í Grønnegade
var pínulítið eldhús en á D’Angle-
terre alveg risa. Það er mikil saga
þarna og dálítið snobb í kringum
staðinn. Um helgar mætti allt fína
fólkið í dögurð og þá mátti sjá
fimmtíu pelsa í fatahenginu,“ segir
hann og hlær.
„Það var skemmtileg stemmning
þarna og ég öðlaðist mikla reynslu,
en þarna vann ég í eitt ár. Þá kom
einhver heimþrá í mig,“ segir Stef-
án og segist hafa þá flutt heim.
„Ég fékk þá vinnu á hóteli hér í
bænum og var svo kokkur eitt
sumar á Hótel Flatey í Flatey á
Breiðafirði. Það haustið var ég eitt-
hvað að mæla göturnar og spá í
hvað ég ætti að gera næst þegar
kokkurinn á Brauðbæ hafði sam-
band. Úr varð að ég og vinur minn
tókum það á leigu og breyttum því
í Snaps. Svo seldi ég stóran hluta
rekstursins og síðan höfum við fjar-
lægst Snaps,“ segir hann. „Svo
kom þetta!“
Tókum bara úr lás
Stefán segir að þeir hafi fengið
húsnæðið upp í hendurnar og
ákveðið að opna stað.
„Fyrst leist okkur ekki á þetta
en svo sáum við að það þyrfti í
raun bara að skúra og byrja. Þann-
ig við opnuðum hér 29. nóvember á
síðasta ári. Svo settum við upp
smurbrauðsseðil og fórum að
dunda okkur. Svo varð þetta mjög
vinsælt!“ segir Stefán.
„Við sögðum engum frá þessu og
auglýstum ekkert; tókum bara úr
lás. Svo var alveg pakkað hér í
desember, þetta spurðist út. Svo
tókum við okkur hlé af því að við
vissum ekki hvað við ættum að
gera en úr varð að við ákváðum að
opna aftur um 20. janúar. Mér
finnst þetta skemmtilegt; þetta er
lítið og við erum eiginlega bara
tveir, þrír hérna. Ég er líka að
þjóna en kann það ekkert, ég bara
geri mitt besta. Við þurfum að fara
að finna þjón,“ segir Stefán og
brosir.
Amerískt naut slær í gegn
Stefán segist bæði vera hrifinn af
danska og franska eldhúsinu og á
Kastrup reynir hann að blanda
þessu tvennu saman. „Á kvöldin er
ég með annan matseðil en í hádeg-
inu. Ég ætlaði ekki að vera með
smurt brauð á kvöldin en Íslend-
ingar eru svo skrýtnir, þeir vilja
líka borða smurbrauð á kvöldin.
Þetta er allt mjög einfalt en við
stílum inn á að vera með góð hrá-
efni og gera hlutina vel. Ekkert
húllumhæ,“ segir Stefán og nefnir
að einungis sé opið á kvöldin frá
miðvikudegi til laugardags. Hádeg-
ismatur er alla daga nema sunnu-
daga og mánudaga.
„Ég er mikið fyrir smurbrauð og
mikið fyrir síld, egg og rækjur,
hönsesalat og rauðsprettu. Ég
elska þetta allt. Svo á kvöldin erum
við með sólflúru, sem er ræktuð í
landeldi fyrir vestan. Þetta er rosa
flottur fiskur; einn sá dýrasti í
heimi. Svo er ég líka með steik á
kvöldin, en við kaupum sérstakt
amerískt rib-eye nautakjöt,“ segir
Stefán og gefur lesendum nokkuð
einfaldaðar útgáfur af vinsælum
smurbrauðum Kastrups.
Það er liðið að hádegi og gestir
fara að streyma inn og mál að linni.
Blaðamaður situr eftir með fulla
diska af dönsku smurbrauði; ekki
leiðinlegt hlutskipti það!
Morgunblaðið/Ásdís
Ekkert húllumhæ
Nikulás Ágústsson og Stefán
Melsted reka Kastrup, nýjan
stað í Ingólfsstræti.
Kastrup finnst á fleiri
stöðum en í Danmörku
því nýlega var opnaður
veitingastaður með sam-
nefndu nafni í Ingólfs-
stræti. Þar má gæða sér á
dönsku smurbrauði og
jafnvel fá sér einn öl
með. Á kvöldin er svo
boðið upp á sólflúru og
alvöru nautasteik frá
Ameríku.
Ásdís Ásgeirsdóttir asdis@mbl.is
Sólflúran er
vinsæl á
kvöldin.
22 MORGUNBLAÐIÐ SUNNUDAGUR 1.3. 2020
LÍFSSTÍLL
SÉRBLAÐ
Fermingarblaðið hefur
verið eitt af vinsælustu
sérblöðum Morgunblaðsins.
Fjallað verður um allt
sem tengist fermingunni.
NÁNARI UPPLÝSINGAR GEFUR:
Katrín Theódórsdóttir
Sími: 569 1105 kata@mbl.is
PÖNTUN AUGLÝSINGA:
Til mánudagsins 16. mars.
Fermingarblað
Morgunblaðsins
kemur út föstudaginn
20. mars 2020